Tag: Vijay Shankar

ഇന്ത്യയ്ക്ക് വേണ്ടി തനിക്ക് ലഭിച്ച അവസരങ്ങളില്‍ താന്‍ മികച്ച പ്രകടനം നടത്തിയിട്ടുണ്ടെന്ന് പറഞ്ഞ് ഓള്‍റൗണ്ടര്‍ വിജയ് ശങ്കര്‍. ന്യൂസിലാണ്ടിനെതിരെ അവസാന ടി20 പരമ്പരയിലും താന്‍ മൂന്നാം നമ്പറിലും നാലാം നമ്പറിലും മികച്ച സ്കോറുകളാണ് നേടിയതെന്ന് താരം പറഞ്ഞു. എന്നാല്‍ ന്യൂസിലാണ്ട് ടൂറിലുള്ള ഇന്ത്യയുടെ എ ടീമില്‍ തന്നെ തിരഞ്ഞെടുക്കാത്തത് വിഷമമുണ്ടാക്കിയെന്നും റീപ്ലേസ്മെന്റ് താരമായി തിരഞ്ഞെടുത്തത് സങ്കടകരമാണെന്നും താരം വെളിപ്പെടുത്തി.

തനിക്ക് അവസരം ലഭിയ്ക്കാത്തത് തന്റെ കൈയ്യിലുള്ള കാര്യമല്ലെന്നും താരം സൂചിപ്പിച്ചു. 2019 ഏകദിന ലോകകപ്പിലാണ് വിജയ് ശങ്കര്‍ അവസാനമായി ഇന്ത്യയ്ക്ക് വേണ്ടി കളിച്ചത്. പരിക്ക് തന്നെ പലപ്പോഴും അലട്ടിയിട്ടുണ്ടെങ്കിലും തന്റെ പ്രകടനങ്ങളോട് നീതി പുലര്‍ത്തുന്ന തരത്തില്‍ തനിക്ക് ഇന്ത്യന്‍ ടീമില്‍ അവസരം ലഭിച്ചിട്ടില്ലെന്നും താരം വ്യക്തമാക്കി.

താന്‍ പണ്ട് സ്ഥിരം റണ്‍സ് കണ്ടെത്തിയിരുന്നുവെങ്കിലും പ്രാദേശിക ടീമില്‍ സ്പിന്നറായതിനാല്‍ ഇടം ലഭിച്ചിരുന്നില്ലെന്ന് പറഞ്ഞ് വിജയ് ശങ്കര്‍. അതിന് ശേഷം മീഡിയം പേസിലേക്ക് മാറിയെന്നും കാര്യങ്ങള്‍ മാറി മറിയുകയായിരുന്നുവെന്നും പറഞ്ഞ് ഇന്ത്യന്‍ ഓള്‍റൗണ്ടര്‍ വിജയ് ശങ്കര്‍. തമിഴ്നാടിന് വേണ്ടി 2012ല്‍ അരങ്ങേറ്റം കുറിച്ച താരം ഇന്ത്യയ്ക്ക് വേണ്ടി 2018ല്‍ ശ്രീലങ്കയില്‍ നടന്ന നിദാഹസ് ട്രോഫിയിലാണ് അരങ്ങേറ്റം കുറിച്ചത്.

ഇന്ത്യയുടെ ലോകകപ്പ് ടീമിലും ഇടം ലഭിച്ച താരം പിന്നീട് പരിക്കേറ്റ് പുറത്ത് പോകുകയായിരുന്നു. ഇതുവരെ ടീമില്‍ സ്ഥിരതയാര്‍ന്ന പ്രകടനം പുറത്തെടുക്കുവാന്‍ താരത്തിന് സാധിച്ചിട്ടില്ല. സണ്‍റേസേഴ്സ് ടീം നായകന്‍ ഡേവിഡ് വാര്‍ണറുമായി സംസാരിക്കുമ്പോളാണ് താരം ഇക്കാര്യം പങ്കുവെച്ചത്.

ഇന്ത്യന്‍ ടീമിലേക്ക് മടങ്ങിയെത്തുവാന്‍ താന്‍ ശരിയായ ശ്രമങ്ങള്‍ നടത്തുക മാത്രമാണ് ചെയ്യേണ്ടതെന്ന് പറഞ്ഞ് വിജയ് ശങ്കര്‍. തന്റെ സ്വതസിദ്ധായ ശൈലിയില്‍ കളിക്കുക എന്നത് മാത്രമാണ് താന്‍ ചിന്തിക്കുന്നതെന്നും അല്ലാതെ തന്നെ ടീമില്‍ എടുക്കാത്തതിനെക്കുറിച്ച് അനാവശ്യമായി താന്‍ ചിന്തിക്കാറില്ലെന്നും വിജയ് ശങ്കര്‍ പറഞ്ഞു. ഇന്ത്യ ദക്ഷിണാഫ്രിക്ക ഏകദിന പരമ്പരയില്‍ താരത്തിനെ ഉള്‍പ്പെടുത്തിയിരുന്നില്ലെങ്കിലും പിന്നീട് പരമ്പര കൊറോണ പരക്കുന്ന സാഹചര്യത്തില്‍ ഉപേക്ഷിക്കപ്പെടുകയായിരുന്നു.

താന്‍ ഇതിനെക്കുറിച്ച് അധികം ചിന്തിക്കാറില്ല, കാരണം അവസാന നിമിഷമാണ് താന്‍ ന്യൂസിലാണ്ട് എ ടൂറിനു തിരഞ്ഞെടുക്കപ്പെട്ടത്. അന്ന് ഹാര്‍ദ്ദിക്കിന്റെ പകരക്കാരനായാണ് താന്‍ ടീമിലെത്തുന്നത്. രഞ്ജി ട്രോഫിയില്‍ തമിഴ്നാടിന് വേണ്ടി തയ്യാറെടുപ്പുകള്‍ നടത്തുന്നതിനിടെയാണ് അവസാന നിമിഷം തനിക്ക് ടീമിലേക്കുള്ള വിളി വരുന്നത്.

നടക്കേണ്ട സമയത്ത് നടക്കേണ്ട കാര്യങ്ങള്‍ നടക്കുമെന്ന ചിന്താഗതിക്കാരനാണ് താന്‍, താന്‍ ശരിയായ ശ്രമങ്ങള്‍ മാത്രം നടത്തണമെന്ന് ചിന്തിക്കുന്നു. എന്റെ കളി മെച്ചപ്പെടുത്തുവാന്‍ താന്‍ സമയം ചെലവഴിക്കേണ്ടതുണ്ട്. നിരാശനായി ഇരുന്നിട്ട് കാര്യമില്ല ഇത് മറികടക്കുവാനുള്ള കാര്യമാണ് ചെയ്യേണ്ടതെന്നും വിജയ് ശങ്കര്‍ സൂചിപ്പിച്ചു.