ബിഗ് ബാഷില്‍ തന്റെ അവസാന മത്സരം ജയത്തോടെ അവസാനിപ്പിച്ച് മൈക്കല്‍ ക്ലിംഗര്‍. ഇന്നലെ പെര്‍ത്തിന്റെ മെല്‍ബേണ്‍ സ്റ്റാര്‍സിനെതിരെയുള്ള വിജയം താരത്തിന്റെ ബിഗ് ബാഷിലെ അവസാന മത്സരമായിരുന്നു. ആദ്യം ബാറ്റ് ചെയ്ത പെര്‍ത്ത് 182/3 എന്ന സ്കോര്‍ നേടിയപ്പോള്‍ മെല്‍ബേണ്‍ സ്റ്റാര്‍സിനു 155/9 എന്ന സ്കോര്‍ മാത്രമേ നേടാനായുള്ളു.
ക്ലിംഗര്‍ തന്റെ അവസാന മത്സരത്തില്‍ 30 റണ്‍സ് നേടിയപ്പോള്‍ 42 പന്തില്‍ 69 റണ്‍സ് നേടി ആഷ്ടണ്‍ ടര്‍ണറും 27 പന്തില്‍ 44 റണ്‍സ് നേടിയ കാമറൂണ്‍ ബാന്‍ക്രോഫ്ടുമാണ് ടീമിനായി തിളങ്ങിയത്. പെര്‍ത്തിനു വേണ്ടി ജോഷ് ഇംഗ്ലിസ് 26 റണ്‍സ് നേടി.
ഗ്ലെന്‍ മാക്സ്വെല്ലും മാര്‍ക്കസ് സ്റ്റോയിനിസും സ്റ്റാര്‍സിനു വേണ്ടി തിളങ്ങിയെങ്കിലും ജയം നേടുവാന്‍ ടീമിനു സാധിച്ചില്ല. മാക്സ്വെല്‍ 40 പന്തില്‍ 61 റണ്‍സ് നേടിയപ്പോള്‍ സ്റ്റോയിനിസ് 49 റണ്‍സ് നേടി. ഇരുവരും പുറത്തായ ശേഷം വിക്കറ്റുകളുമായി പെര്‍ത്ത് മത്സരത്തിലേക്ക് തിരികെ എത്തുകയായിരുന്നു. 20 ഓവര്‍ അവസാനിച്ചപ്പോള്‍ 155 റണ്‍സാണ് 9 വിക്കറ്റുകളുടെ നഷ്ടത്തില്‍ സ്റ്റാര്‍സ് നേടിയത്.
മൂന്ന് വീതം വിക്കറ്റുമായി മാത്യൂ കെല്ലിയും നഥാന്‍ കോള്‍ട്ടര്‍-നൈലുമാണ് പെര്‍ത്തിന്റെ ബൗളര്‍മാരില്‍ തിളങ്ങിയവര്‍. ആന്‍ഡ്രൂ ടൈ രണ്ട് വിക്കറ്റ് നേടി.
