ഇംഗ്ലീഷ് പ്രീമിയർ ലീഗിൽ ചെൽസിക്ക് തുടർച്ചയായ രണ്ടാം പരാജയം. ഇന്ന് സ്വന്തം ഹോം ഗ്രൗണ്ടായ സ്റ്റാംഫോബ്രിഡ്ജിൽ വോൾവ്സിനോടാണ് ചെൽസി പരാജയപ്പെട്ടത്. കഴിഞ്ഞ മത്സരത്തിൽ അവർ ലിവർപൂളിനോടും പരാജയപ്പെട്ടിരുന്നു. ഇന്ന് ഒരു ഗോളിന് മുന്നിൽ എത്തിയ ശേഷം തകർന്നടിഞ്ഞ ചെൽസി 2-4ന്റെ പരാജയമാണ് ഏറ്റുവാങ്ങിയത്. മാത്യുസ് കുന്യ വോൾവ്സിനായി ഇന്ന് ഹാട്രിക്ക് നേടി.
മത്സരത്തിന്റെ 19ആം മിനുട്ടിൽ കാൾ പാൽമറിലൂടെ ആയിരുന്നു ചെൽസി ലീഡ് എടുത്തത്. ആ ലീഡ് 3 മിനുട്ട് മാത്രമാണ് നീണ്ടു നിന്നത്. 22ആം മിനുട്ടിൽ മാത്യു കുന്യയിലൂടെ അവർ സമനില നേടി. ആദ്യ പകുതി അവസാനിക്കുന്നതിന് 2 മിനുട്ട് മുമ്പ് ഡിസാസിയുടെ ഒരു സെൽഫ് ഗോൾ വോൾവ്സിനെ 2-1ന് മുന്നിൽ എത്തിച്ചു.
രണ്ടാം പകുതിയിൽ ചെൽസി തിരികെവരാൻ ശ്രമിച്ചു എങ്കിലും ഫലം ഉണ്ടായില്ല. 63ആം മിനുട്ടിൽ വീണ്ടും മാത്യു കുന്യയുടെ ഗോൾ. വോൾവ്സ് 3-1ന് മുന്നിൽ. 82ആം മിനുട്ടിൽ ഒരു പെനാൾട്ടി കൂടെ ലൽഷ്യത്തിൽ എത്തിച്ച് കുന്യ ഹാട്രിക്ക് തികച്ചു. സ്കോർ 4-1. പിന്നാലെ തിയാഗോ സിൽവ ചെൽസിക്കായി ഒരു ഗോൾ മടക്കി എങ്കിലും ഇത് പരാജയ ഭാരം കുറക്കാൻ മാത്രം സഹായിച്ചു.
ഈ വിജയത്തോടെ വോൾവ്സ് 32 പോയിന്റുമായി ചെൽസിയെ മറികടന്ന് പത്താം സ്ഥാനത്തെത്തി. 31 പോയിന്റുള്ള ചെൽസി പതിനൊന്നാം സ്ഥാനത്തേക്ക് താഴ്ന്നു.
