Category: Premier League

ഇംഗ്ലീഷ് പ്രീമിയർ ലീഗിൽ അതുഗ്രൻ ത്രില്ലർ മത്സരത്തിൽ ബോർൺമൗതിനെ 3-2 നു വീഴ്ത്തി സണ്ടർലാന്റ് നാലാം സ്ഥാനത്ത്. 2 ഗോൾ പിറകിൽ പോയ ശേഷം തിരിച്ചു വന്നാണ് സണ്ടർലാന്റ് സ്റ്റേഡിയം ഓഫ് ലൈറ്റിൽ അവിസ്മരണീയ ജയം നേടിയത്. ഏഴാം മിനിറ്റിൽ റീബോണ്ടിൽ അമീൻ ആദിലും 15 മത്തെ മിനിറ്റിൽ മൈതാനത്തിന്റെ ഏതാണ്ട് മധ്യഭാഗത്ത് നിന്നു ഉഗ്രൻ ഷോട്ടിൽ നിന്നു ടെയ്‌ലർ ആദംസും നേടിയ ഗോളുകളിൽ ബോർൺമൗത് വിജയം പ്രതീക്ഷിച്ചത് ആണ്. എന്നാൽ തീർത്തും അവിസ്മരണീയ പോരാട്ടം നടത്തുന്ന സണ്ടർലാന്റിനെ ആണ് പിന്നീട് കണ്ടത്. 30 മത്തെ മിനിറ്റിൽ എൻസോ ലീ ഫീ പെനാൽട്ടിയിലൂടെ ഒരു ഗോൾ മടക്കി. തുടർന്ന് രണ്ടാം പകുതി തുടങ്ങിയ ഉടൻ തന്നെ ഗ്രാനിറ്റ് ഷാക്കയുടെ പാസിൽ നിന്നു ഗോൾ നേടിയ ബെർട്രാന്റ് ട്രയോരെ സണ്ടർലാന്റിനെ മത്സരത്തിൽ ഒപ്പമെത്തിച്ചു.

69 മത്തെ മിനിറ്റിൽ എൻസോ ലീ ഫീയുടെ പാസിൽ നിന്നു പകരക്കാരൻ ബ്രയാൻ ബ്രോബി സണ്ടർലാന്റിനു അർഹിച്ച ജയം സമ്മാനിക്കുക ആയിരുന്നു. അവസാന നിമിഷങ്ങളിൽ സമനില ഗോളിന് ആയുള്ള ബോർൺമൗത് ശ്രമങ്ങൾ പക്ഷെ ജയം കണ്ടില്ല. ലൂയിസ് കുക്ക് അവസാന നിമിഷം ചുവപ്പ് കാർഡ് കണ്ടു പുറത്ത് പോയതും അവർക്ക് തിരിച്ചടിയായി. അതേസമയം ബ്രന്റ്ഫോർഡ് ബേർൺലിയെ 3-1 നു മറികടന്നു എട്ടാം സ്ഥാനത്തേക്ക് കയറി. സമനിലയിലേക്ക് പോകും എന്ന് കരുതിയ മത്സരത്തിൽ 81 മത്തെ മിനിറ്റിൽ ഉഗ്രൻ ഫോമിലുള്ള ഇഗോർ തിയാഗോയുടെ പെനാൽട്ടി ഗോളിൽ ബ്രന്റ്ഫോർഡ് മത്സരത്തിൽ മുന്നിലെത്തി. എന്നാൽ 85 മത്തെ മിനിറ്റിൽ ഫ്ലെമിങ് പെനാൽട്ടിയിലൂടെ ഈ ഗോൾ മടക്കി. എന്നാൽ തൊട്ടടുത്ത നിമിഷം തന്റെ രണ്ടാം ഗോൾ നേടിയ ഇഗോർ തിയാഗോ ബ്രന്റ്ഫോർഡിന് വീണ്ടും മുൻതൂക്കം നൽകി. 93 മത്തെ മിനിറ്റിൽ ഗോൾ നേടിയ ഡാൻഗോ ഒട്ടാര അവരുടെ ജയവും പൂർത്തിയാക്കുക ആയിരുന്നു.

ഇംഗ്ലീഷ് പ്രീമിയർ ലീഗിൽ പന്ത്രണ്ടാം മത്സരത്തിലും ജയം കാണാൻ ആവാതെ വോൾവ്സ്. ഇന്നത്തെ മത്സരത്തിൽ ക്രിസ്റ്റൽ പാലസിനോട് 2-0 നും കൂടി തോറ്റതോടെ 12 മത്സരങ്ങൾക്ക് ശേഷം വെറും 2 പോയിന്റുകളും ആയി അവസാന സ്ഥാനത്ത് ആണ് അവർ. ഗോൾ രഹിതമായ ആദ്യ പകുതിക്ക് ശേഷം രണ്ടാം പകുതിയിൽ ആണ് പാലസ് വോൾവ്സ് പ്രതിരോധം ഭേദിച്ചത്. 63 മത്തെ മിനിറ്റിൽ ഡാനിയേൽ മൂനോസും 69 മത്തെ മിനിറ്റിൽ യെറമി പിനോയും ആണ് പാലസ് ഗോളുകൾ നേടിയത്. ജയത്തോടെ പാലസ് 12 കളികളിൽ നിന്നു 20 പോയിന്റും ആയി ലീഗിൽ നാലാം സ്ഥാനത്തേക്ക് കയറി.

അതേസമയം മറ്റൊരു മത്സരത്തിൽ ഫുൾഹാം സണ്ടർലാന്റിനെ എതിരില്ലാത്ത ഒരു ഗോളിന് തോൽപ്പിച്ചു. 84 മത്തെ മിനിറ്റിൽ റോൾ ഹിമനസ് ആണ് ഫുൾഹാമിനു ജയം സമ്മാനിച്ചത്. പരാജയത്തോടെ സണ്ടർലാന്റ് ആറാം സ്ഥാനത്തേക്ക് വീണു. ബ്രന്റ്ഫോർഡിനെ 2-1 നു ബ്രൈറ്റൺ മറികടന്നപ്പോൾ ബോർൺമൗത് വെസ്റ്റ് ഹാം മത്സരം 2-2 സമനിലയിൽ അവസാനിച്ചു. 2 ഗോൾ പിറകിൽ നിന്ന ശേഷം ബോർൺമൗത് സമനില കണ്ടെത്തിയപ്പോൾ 1-0 നു പിറകിൽ നിന്ന ശേഷം തിരിച്ചു വന്നു ജയം കാണുക ആയിരുന്നു ബ്രൈറ്റൺ. ജയത്തോടെ ലീഗിൽ അഞ്ചാം സ്ഥാനത്തേക്കും അവർ കയറി.

ഇംഗ്ലീഷ് പ്രീമിയർ ലീഗിൽ കഴിഞ്ഞ മത്സരത്തിൽ ആഴ്‌സണലിനോട് വഴങ്ങിയ പരാജയത്തിനു ശേഷം വിജയവഴിയിൽ തിരിച്ചെത്തി ക്രിസ്റ്റൽ പാലസ്. ബ്രന്റ്ഫോർഡിനെ എതിരില്ലാത്ത രണ്ടു ഗോളിനു തോൽപ്പിച്ച പാലസ് ലീഗിൽ ഏഴാം സ്ഥാനത്തേക്കും കയറി. മുപ്പതാം മിനിറ്റിൽ ലെർമയുടെ പാസിൽ നിന്നു മറ്റെറ്റ നേടിയ ഗോളും 51 മത്തെ മിനിറ്റിലെ കോളിൻസിന്റെ സെൽഫ് ഗോളും ആണ് പാലസിനു ജയം നൽകിയത്. ലീഗിൽ കഴിഞ്ഞ മത്സരത്തിൽ മാഞ്ചസ്റ്റർ യുണൈറ്റഡിനോട് തോൽവി വഴങ്ങിയ ബ്രൈറ്റണും ലീഗിൽ വിജയവഴിയിൽ തിരിച്ചെത്തി. ലീഡ്സിനെ എതിരില്ലാത്ത 3 ഗോളിന് ആണ് ബ്രൈറ്റൺ തകർത്തത്. ഡീഗോ ഗോമസ് ഇരട്ടഗോൾ നേടിയ മത്സരത്തിൽ ഡാനി വെൽബക്ക് ആണ് ബ്രൈറ്റണിന്റെ ഗോൾ വേട്ടക്ക് തുടക്കം കുറിച്ചത്.

അതേസമയം പത്താം ലീഗ് മത്സരത്തിലും ജയം കാണാൻ ആവാതെ വോൾവ്സ്. ഫുൾഹാമിനു എതിരെ എതിരില്ലാത്ത 3 ഗോളുകൾക്ക് ആണ് അവർ തോറ്റത്. വെറും 2 സമനിലയും ആയി ലീഗിലെ അവസാന സ്ഥാനക്കാർ ആയ വോൾവ്സ് ലീഗിൽ എട്ടാം പരാജയം ആണ് ഏറ്റുവാങ്ങിയത്. കഴിഞ്ഞ സീസണിലും ആദ്യ 10 മത്സരങ്ങളിൽ വോൾവ്സിന് ഒരു മത്സരം പോലും ജയിക്കാൻ ആയിരുന്നില്ല. ഇമ്മാനുവൽ ചുവപ്പ് കാർഡ് കണ്ടു 10 പേരായി ചുരുങ്ങിയ വോൾവ്സിന് എതിരെ റയാൻ സെസനിയോൻ, ഹാരി വിൽസൻ എന്നിവർ ആണ് ഗോൾ നേടിയത്. ഫുൾഹാമിന്റെ മൂന്നാം ഗോൾ യെർസൻ മൊസ്ക്വരയുടെ സെൽഫ്‌ ഗോൾ ആയിരുന്നു. മോശം പ്രകടനങ്ങൾ തുടരുന്ന വോൾവ്സിന് എതിരെ നിലവിൽ ആരാധകരും വലിയ പ്രതിഷേധം ആണ് ഉയർത്തുന്നത്.

ഇംഗ്ലീഷ് ഫുട്‌ബോളിലെ വലിയ പാരമ്പര്യം ആയ ക്രിസ്തുമസ് കാലത്തെ ഫെസ്റ്റീവ് മത്സരങ്ങളിൽ മാറ്റവും ആയി ഇംഗ്ലീഷ് പ്രീമിയർ ലീഗ്. മറ്റ് ലീഗുകൾ ക്രിസ്തുമസ് കാലത്ത് ഇടവേള എടുക്കുമ്പോൾ ആ സമയത്ത് മത്സരങ്ങൾ നടത്തുന്ന പ്രീമിയർ ലീഗ്, ക്രിസ്തുമസ് കഴിഞ്ഞ അടുത്ത ദിവസം ബോക്സിങ് ഡേയിൽ നടത്തുന്ന മത്സരങ്ങളിൽ ആണ് മാറ്റങ്ങൾ പ്രഖ്യാപിച്ചത്. ബോക്‌സിങ് ഡേയിൽ എല്ലാ ടീമുകളുടെയും മത്സരം സംഘടിപ്പിക്കുക എന്ന പതിറ്റാണ്ടുകളുടെ ശീലമാണ് ലീഗ് ഇത്തവണ നിർത്തുന്നത്. നിലവിൽ മാഞ്ചസ്റ്റർ യുണൈറ്റഡ്, ന്യൂകാസ്റ്റിൽ യുണൈറ്റഡ് മത്സരം മാത്രമാണ് ബോക്സിങ് ഡേ ദിവസം നടക്കുക. മറ്റ് മത്സരങ്ങൾ ഡിസംബർ 27 ശനിയാഴ്ച, 28 ഞായറാഴ്ച ദിവസങ്ങളിൽ ആവും നടക്കുക.

യൂറോപ്യൻ മത്സരങ്ങൾ കൂടിയതിനാൽ വീക്കെൻഡുകൾക്ക് ഇടയിൽ ബോക്സിങ് ഡേയിൽ കൂടി കളിക്കുന്നത് താരങ്ങളുടെ ജോലി ഭാരം കൂട്ടും എന്നതിനാൽ ആണ് ഈ തീരുമാനം എന്നാണ് പ്രീമിയർ ലീഗ് പറഞ്ഞത്. കലണ്ടറിൽ വീക്കെൻഡ് ആണെങ്കിൽ ആണ് ബോക്സിങ് ഡേ മത്സരങ്ങൾ തിരിച്ചു വരിക എന്നാണ് പ്രീമിയർ ലീഗ് തീരുമാനം. അടുത്ത കൊല്ലം ശനിയാഴ്ച ദിവസമാണ് ബോക്സിങ് ഡേ എന്നതിനാൽ എല്ലാ മത്സരങ്ങളും അന്ന് തന്നെ ആവും നടക്കുക. ഫെസ്റ്റീവ് ദിവസം ആയതിനാൽ തന്നെ പരമാവധി ആരാധകരെ സ്റ്റേഡിയത്തിൽ ആകർഷിക്കാൻ ടിവി ബ്ലാക്ക് ഔട്ട് ശീലം ഡിസംബർ 26,27,28 ദിവസങ്ങളിൽ തുടരുന്നതിനാൽ ബ്രിട്ടനിൽ അന്നത്തെ ദിവസത്തെ പ്രീമിയർ ലീഗ് മത്സരങ്ങൾ സംപ്രേഷണം ചെയ്യുന്നതിലും നിയന്ത്രണം ഉണ്ടാവും.