Tag: Mashrafe Mortaza

2019 ലോകകപ്പ് കഴിഞ്ഞ് ഒട്ടനവധി താരങ്ങളുടെ വിരമിക്കല്‍ പ്രഖ്യാപനമുണ്ടാകുമെന്നാണ് കരുതുന്നതെങ്കിലും താന്‍ അതിനില്ലെന്ന് അറിയിച്ച് ബംഗ്ലാദേശ് നായകന്‍ മഷ്റഫെ മൊര്‍തസ. മൊര്‍തസ് ലോകകപ്പ് കഴിഞ്ഞയുടനെ വിരമിക്കില്ലെന്നാണ് താരം തന്നെ വ്യക്തമാക്കിയത്. ലോകകപ്പിന് ശേഷം തന്റെ 18 വര്‍ഷത്തെ കരിയറിന് വിട പറയുമെന്ന് താരം അറിയിച്ചിരുന്നുവെങ്കിലും അത് ടൂര്‍ണ്ണമെന്റ് കഴിഞ്ഞ ഉടനെ ഉണ്ടാകില്ലെന്നാണ് മൊര്‍തസ പറഞ്ഞത്.

എന്നാല്‍ ബോര്‍ഡ് ആവശ്യപ്പെടുകയാണെങ്കില്‍ താന്‍ വിരമിക്കുമെന്ന് താരം വ്യക്തമാക്കി. തനിക്ക് ഇനിയും കളിക്കണമെന്ന് ആഗ്രഹമുണ്ടെന്നും എന്നാല്‍ ബോര്‍ഡ് പറഞ്ഞാല്‍ ഉടനടി വിരമിക്കുമെന്നും അറിയിച്ചു. എന്നാല്‍ ഈ വിഷയത്തില്‍ ബോര്‍ഡില്‍ നിന്ന് തനിക്കൊരു നിര്‍ദ്ദേശവും ലഭിച്ചിട്ടില്ലെന്ന് താരം പറഞ്ഞു. ഈ ലോകകപ്പ് തന്റെ അവസാന ലോകകപ്പാണെന്ന് താന്‍ നേരത്തെ അറിയിച്ചിരുന്നു, അത് തന്റെ കുടുംബാംഗങ്ങള്‍ക്ക് ഇത്തരം ഒരു ടൂര്‍ണ്ണമെന്റില്‍ താന്‍ അവസാനമായി കളിക്കുന്നത് കാണുവാനുള്ള അവസരത്തിന് വേണ്ടിയായിരുന്നു.

ഇപ്പോള്‍ താന്‍ വിരമിക്കലിനെക്കുറിച്ച് ആലോചിക്കുന്നില്ലെന്നും അത് ശ്രദ്ധ തെറ്റുവാന്‍ ഇടയാക്കുമെന്നും മൊര്‍തസ പറഞ്ഞു. ബംഗ്ലാദേശിന്റെ സെമി സാധ്യതകള്‍ സജീവമായി തന്നെയുണ്ടെന്നും അതിനാല്‍ ഇപ്പോള്‍ ഇത് ആലോചിച്ച് വ്യാകുലപ്പെടേണ്ട സാഹചര്യമില്ലെന്നും ബംഗ്ലാദേശ് നായകന്‍ വ്യക്തമാക്കി.

അഫ്ഗാനിസ്ഥാനെതിരെയുള്ള മത്സരം അരങ്ങേറിയ സൗത്താംപ്ടണിലെ പിച്ച് ബാറ്റിംഗിന് അനായാസമായിരുന്നില്ലെന്നു ബംഗ്ലാദേശ് നിരയിലെ താരങ്ങള്‍ കടുത്ത സാഹചര്യങ്ങളെ മറികടന്നാണ് 262 റണ്‍സ് നേടിയതെന്നും പറഞ്ഞ് ബംഗ്ലാദേശ് നായകന്‍ മഷ്റഫെ മൊര്‍തസ. മുഷ്ഫിക്കുര്‍ റഹിം-ഷാക്കിബ് അല്‍ ഹസന്‍ കൂട്ടുകെട്ടും ഓപ്പണിംഗ് ഇറങ്ങി തമീം നടത്തിയ പ്രകടനവും ശ്രദ്ധേയമായിരുന്നു. മഹമ്മദുള്ളയും മൊസ്ദേക്ക് ഹൊസൈനും നല്‍കിയ അവസാനവും നിര്‍ണ്ണായകമായി എന്ന് മൊര്‍തസ പറഞ്ഞു.

മഹമ്മദുള്ളയുടെ പരിക്കിനെക്കുറിച്ചുള്ള തീരുമാനം ഫിസിയോ ആണ് എടുക്കേണ്ടതെന്നും ഒരാഴ്ച അവശേഷിക്കുന്നതിനാല്‍ ഇന്ത്യയ്ക്കെതിരെയുള്ള മത്സരത്തിന് മുമ്പ് താരം ശരിയാകുമെന്നാണ് കരുതുന്നതെന്നും മൊര്‍തസ പറഞ്ഞു. ഇതുപോലെ മികച്ച രീതിയില്‍ കളിച്ചാല്‍ ഇന്ത്യയ്ക്കെതിരെയും പാക്കിസ്ഥാനെതിരെയും ബംഗ്ലാദേശിന് മികവ് പുലര്‍ത്താനാകുമെന്നും ബംഗ്ലാദേശ് നായകന്‍ പ്രതീക്ഷ പുലര്‍ത്തി.

ബംഗ്ലാദേശ് ഫീല്‍ഡിംഗില്‍ 40-50 റണ്‍സ് കൈവിട്ടുവെന്നും അതല്ലായിരുന്നുവെങ്കില്‍ ഈ റണ്‍ ചേസ് ചരിത്രമായിരുന്നേനെ എന്നും പറഞ്ഞ് ടീം നായകന്‍ മഷ്റഫെ മൊര്‍തസ. എല്ലാ ക്രെഡിറ്റും ഡേവിഡ് വാര്‍ണറക്കും മറ്റു ഓസീസ് ബാറ്റ്സ്മാന്മാര്‍ക്കുമാണ്. അവസാന പത്തോവറില്‍ 131 റണ്‍സാണ് അവര്‍ നേടിയത്, അതിനൊപ്പം ബംഗ്ലാദേശ് കൈവിട്ട ഫീല്‍ഡിംഗിലെ റണ്‍സ് കൂടിയായപ്പോള്‍ കാര്യങ്ങള്‍ കൂടുതല്‍ ശ്രമകരമായെന്നും ബംഗ്ലാദേശ് നായകന്‍ പറഞ്ഞു.

381 റണ്‍സ് എപ്പോളും കടുപ്പമേറിയ ചേസിംഗ് ആണ്. സൗമ്യ സര്‍ക്കാര്‍ മികച്ച തുടക്കത്തിനു ശേഷം റണ്ണൗട്ടായത് തിരിച്ചടിയായി. ഷാക്കിബും തമീമും നന്നായി കളിച്ചു, പിന്നീട് മുഷ്ഫിക്കുറും മഹമ്മദുള്ളയും തിളങ്ങിയെങ്കിലും 381 റണ്‍സ് എന്നത് അപ്രാപ്യമായ കാര്യം തന്നെയായിരുന്നു. ബംഗ്ലാദേശ് പോസിറ്റീവ് ക്രിക്കറ്റാണ് കളിക്കുന്നതെന്നും അതില്‍ അഭിമാനമുണ്ടെന്നും മൊര്‍തസ കൂട്ടിചേര്‍ത്തു.

ലോകകപ്പില്‍ ബംഗ്ലാദേശ് നായകനായ മഷ്റഫെ മൊര്‍തസയ്ക്ക് ബൗളിംഗില്‍ അത്ര മികച്ച ഫോമൊന്നുമല്ല ഇതുവരെ പുറത്തെടുക്കുവാനായത്. ഇതുവരെ കളിച്ച മത്സരങ്ങളില്‍ 21 ഓവറില്‍ നിന്ന് 149 റണ്‍സ് വഴങ്ങിയ താരം ഇതുവരെ ഒരു വിക്കറ്റ് മാത്രമാണ് നേടിയിട്ടുള്ളത്. താന്‍ അത്ര മികച്ച ഫോമിലല്ലെന്നും ഇനിയും ഏറെ മെച്ചപ്പെടാനുണ്ടെന്നും സമ്മതിച്ച മൊര്‍തസ താന്‍ മുഴുവന്‍ ക്വോട്ടയും എറിയേണ്ട ആവശ്യമില്ലെന്നും പറഞ്ഞു.

ഇംഗ്ലണ്ടിനെതിരെ കഴിഞ്ഞ മത്സരത്തില്‍ താന്‍ എട്ട്-ഒമ്പത് ഓവര്‍ വരെ മികച്ച രീതിയിലാണ് പന്തെറിഞ്ഞത്. അവസാന ഓവറില്‍ 18 റണ്‍സ് വഴങ്ങേണ്ടി വന്നത് തന്റെ പത്തോവറിലെ വഴങ്ങിയ റണ്‍സ് 68 ആക്കി ഉയര്‍ത്തി. താന്‍ മുഴുവന്‍ ഓവറുകളും എപ്പോളും എറിയണമെന്ന ചിന്ത തനിക്കൊരിക്കലുമില്ല എന്നും മൊര്‍തസ പറഞ്ഞു. മറ്റാരെങ്കിലും മികച്ച രീതിയില്‍ പന്തെറിയുകയാണെങ്കില്‍ താന്‍ അവര്‍ക്ക് കൂടുതല്‍ ഓവറുകള്‍ നല്‍കുവാനാണ് ശ്രമിക്കുന്നതെന്നും മൊര്‍തസ പറഞ്ഞു. എന്നാല്‍ ഇപ്പോള്‍ മുഴുവന്‍ ക്വോട്ടയും പൂര്‍ത്തിയാക്കേണ്ടി വരുന്ന സാഹചര്യത്തില്‍ താന്‍ കുറച്ച് കൂടി മികവ് പുലര്‍ത്തേണ്ടതായിട്ടുണ്ടെന്ന് മൊര്‍തസ പറഞ്ഞു.

താന്‍ മികവ് പുലര്‍ത്തുന്നില്ലെന്നത് ശരിയാണെന്നും അതിനാല്‍ തന്നെ താന്‍ നേരിടുന്ന വിമര്‍ശനങ്ങളില്‍ വിഷമമില്ലെന്നും ഒരു പ്രൊഫഷണല്‍ താരമെന്ന നിലയില്‍ തന്നില്‍ നിന്ന് മികച്ച പ്രകടനമാണ് ഏവരും പ്രതീക്ഷിക്കുന്നതെന്നും അതില്ലാത്തപ്പോള്‍ വിമര്‍ശനങ്ങള്‍ സ്വാഭാവികമാണെന്നും മൊര്‍തസ പറഞ്ഞു. ആളുകള്‍ എന്ത് പറയുന്നതിനെക്കാള്‍ സ്വയം എന്ത് തോന്നുന്നുവെന്നതാണ് പ്രധാനം. ഞാന്‍ മോശമാണെങ്കില്‍ എനിക്ക് സ്വയം ഞാന്‍ മോശമാണെന്ന് തോന്നും അപ്പോള്‍ കാണികള്‍ എന്നെ വിമര്‍ശിക്കുന്നതില്‍ തെറ്റ് കാണുന്നില്ലെന്നും മഷ്റഫെ മൊര്‍തസ പറഞ്ഞു.