Category: CPL

കരീബിയന്‍ പ്രീമിയര്‍ ലീഗിന്റെ ഫൈനലില്‍ ബാര്‍ബഡോസ് റോയൽസിനെ ജമൈക്ക തല്ലാവാസ് നേരിടും. സെയിന്റ് ലൂസിയ കിംഗിനെ എലിമിനേറ്ററിലും ഗയാന ആമസോൺ വാരിയേഴ്സിനെ രണ്ടാം ക്വാളിഫയറിലും പരാജയപ്പെടുത്തിയാണ് ജമൈക്ക ഫൈനലില്‍ കടന്നത്.

ഇന്നലെ ഗയാനയ്ക്കെതിരെ പടുകൂറ്റന്‍ സ്കോര്‍ നേടിയ ശേഷം 37 റൺസ് വിജയം ആണ് ജമൈക്ക നേടിയത്. ആദ്യം ബാറ്റ് ചെയ്ത് 52 പന്തിൽ 109 റൺസ് നേടിയ ഷമാര്‍ ബ്രൂക്ക്സിന്റെയും 15 പന്തിൽ 41 റൺസ് നേടിയ ഇമാദ് വസീമിന്റെയും ഒപ്പം റോവ്മന്‍ പവൽ(37) മികച്ച് നിന്നപ്പോള്‍ 226/4 എന്ന കൂറ്റന്‍ സ്കോറാണ് തല്ലാവാസ് നേടിയത്.

എതിരാളികളെ 189/8 എന്ന സ്കോറിൽ ഒതുക്കി 37 റൺസ് ജയം നേടിയപ്പോള്‍ ക്രിസ് ഗ്രീനും ഇമാദ് വസീമും രണ്ട് വീതം വിക്കറ്റ് നേടി തിളങ്ങി. 56 റൺസ് നേടിയ കീമോ പോള്‍ ആണ് ഗയാനയുടെ ടോപ് സ്കോറര്‍. ഒഡിയന്‍ സ്മിത്ത് 14 പന്തിൽ 24 റൺസും ഗുദകേഷ് മോട്ടി 13 പന്തിൽ 22 റൺസും നേടി പൊരുതി നോക്കിയെങ്കിലും ലക്ഷ്യം വലുതായിരുന്നു.

ഗയാന ആമസോൺ വാരിയേഴ്സിനെ ഒന്നാം ക്വാളിഫയറിൽ തകര്‍ത്തെറിഞ്ഞ് കരീബിയന്‍ പ്രീമിയര്‍ ലീഗ് ഫൈനലില്‍ പ്രവേശിച്ച് ബാർബഡോസ് റോയൽസ്. ഇന്ന് ആദ്യം ബാറ്റ് ചെയ്ത് 195/5 എന്ന സ്കോര്‍ നേടിയ ടീം എതിരാളികളെ 108 റൺസിലെറിഞ്ഞൊതുക്കിയാണ് ഈ സ്കോര്‍ നേടിയത്. 87 റൺസ് വിജയത്തോടെ ഫൈനലിലേക്ക് ബാര്‍ബഡോസ് കടന്നപ്പോള്‍ ഗയാനയ്ക്ക് ഇനി എലിമിനേറ്റര്‍ വിജയികളുമായി ഒരു അവസരം കൂടിയുണ്ട്.

ആദ്യ ഓവര്‍ മുതൽ വിക്കറ്റുകള്‍ നഷ്ടമായ ഗയാനയ്ക്ക് പിന്നീടൊരു തിരിച്ചുവരവ് സാധ്യമല്ലാതാകുകയായിരുന്നു. 3 വിക്കറ്റ് വീഴ്ത്തിയ റാമോൺ സിമ്മണ്ട്സ് ആണ് ഗയാനയുടെ നടുവൊടിച്ചത്. മുജീബ് ഉര്‍ റഹ്മാനും റഖീം കോൺവാലും രണ്ട് വീതം വിക്കറ്റ് നേടി.

37 റൺസ് നേടിയ ഷിമ്രൺ ഹെറ്റ്മ്യര്‍ ആണ് ഗയാനയുടെ ടോപ് സ്കോറര്‍.

ലീഗ് ഘട്ടത്തിലെ ഏറ്റവും അവസാന മത്സരത്തിൽ ബാര്‍ബഡോസ് റോയൽസിന് തോൽവി സമ്മാനിച്ച് ഗയാന ആമസോൺ വാരിയേഴ്സ്. തുടര്‍ച്ചയായ നാലാം വിജയം ആണ് ഗയാന നേടിയത്. ഇന്നലെ ആദ്യം ബാറ്റ് ചെയ്ത ബാര്‍ബഡോസ് 125 റൺസിന് ഓള്‍ഔട്ട് ആയപ്പോള്‍ 14.3 ഓവറിൽ ഗയാന 5 വിക്കറ്റ് നഷ്ടത്തിൽ വിജയം കുറിച്ചു. ഇത് ബാര്‍ബഡോസിന്റെ രണ്ടാം തോൽവിയാണ്.

പോയിന്റ് പട്ടികയിൽ 16 പോയിന്റുമായി ബാര്‍ബഡോസ് ഒന്നാമതും 11 പോയിന്റുള്ള ഗയാന രണ്ടാം സ്ഥാനത്തുമാണുള്ളത്. ഇരു ടീമുകളും ഒന്നാം ക്വാളിഫയറിൽ ഏറ്റുമുട്ടും. സെയിന്റ് ലൂസിയ കിംഗ്സും ജമൈക്ക തല്ലാവാസും തമ്മിലാണ് എലിമിനേറ്റര്‍ മത്സരം.

കരീബിയന്‍ പ്രീമിയര്‍ ലീഗിൽ എട്ട് മത്സരങ്ങളിൽ ഏഴിലും വിജയിച്ച് ബാർബഡോസ് റോയൽസ്. ഇന്നലെ നടന്ന മത്സരത്തിൽ സെയിന്റ് കിറ്റ്സ് ആന്‍ഡ് നെവിസ് പാട്രിയറ്റ്സിനെ 36 റൺസിനാണ് റോയൽസ് പരാജയപ്പെടുത്തിയത്.

ആദ്യം ബാറ്റ് ചെയ്ത റോയൽസ് അസം ഖാന്റെ ബാറ്റിംഗ് പ്രകടനത്തിന്റെ ബലത്തിൽ 156/3 എന്ന സ്കോര്‍ നേടുകയായിരുന്നു. അസം ഖാന്‍ 42 പന്തിൽ 64 റൺസ് നേടിയപ്പോള്‍ ഹാരി ടെക്ടര്‍ 47 റൺസുമായി പുറത്താകാതെ നിന്നു.

മറുപടി ബാറ്റിംഗിനിറങ്ങിയ പാട്രിയറ്റ്സ് 19.3 ഓവറിൽ 120 റൺസിന് ഓള്‍ഔട്ട് ആകുകയായിരുന്നു. 41 റൺസ് നേടിയ എവിന്‍ ലൂയിസ് ആണ് ടോപ് സ്കോറര്‍. റോയൽസ് ബൗളിംഗിൽ മുജീബ് ഉര്‍ റഹ്മാനും നയീം യംഗും മൂന്ന് വീതം വിക്കറ്റും ജേസൺ ഹോള്‍ഡര്‍ രണ്ട് വിക്കറ്റും നേടി.

ആറ് വിജയങ്ങള്‍ക്ക് ശേഷം ഒരു മത്സരത്തിൽ ബാ‍ർബഡോസ് റോയൽസിന് കാലിടറിയെങ്കിലും വീണ്ടും വിജയ വഴിയിലേക്ക് തിരികെ എത്തി ടീം. ഇന്നലെ നടന്ന കരീബിയന്‍ പ്രീമിയര്‍ ലീഗിലെ മഴ തടസ്സം സൃഷ്ടിച്ച മത്സരത്തിൽ ഡക്ക്വര്‍ത്ത് ലൂയിസ് നിയമപ്രകാരം 29 റൺസിന്റെ വിജയം ആണ് ബാ‍ർബഡോസ് റോയൽസ് നേടിയത്.

16 ഓവറായി ചുരുക്കിയ മത്സരത്തിൽ 40 റൺസ് നേടിയ ജേസൺ ഹോള്‍ഡറുടെ മികവിൽ റോയൽസ് 107/6 എന്ന സ്കോര്‍ നേടുകയായിരുന്നു. മുജീബ് ഉര്‍ റഹ്മാന്‍ 9 പന്തിൽ പുറത്താകാതെ 19 റൺസുമായി ജേസൺ ഹോള്‍ഡര്‍ക്കൊപ്പം അവസാനം വരെ ക്രീസിൽ നിന്നു. ഗയാന ആമസോൺ വാരിയേഴ്സിന് വേണ്ടി ചന്ദ്രപോള്‍ ഹേംരാജ് 3 വിക്കറ്റും ജൂനിയര്‍ സിന്‍ക്ലയര്‍ രണ്ടും വിക്കറ്റാണ് നേടിയത്.

ഗയാന നിരയിൽ ആര്‍ക്കും തന്നെ തിളങ്ങാനാകാതെ പോയപ്പോള്‍ 9 വിക്കറ്റ് നഷ്ടത്തിൽ ടീമിന് 81 റൺസ് മാത്രമേ നേടാനായുള്ളു.