ബെല്ലെറിവ് ഓവലിൽ നടന്ന ഫൈനലിൽ സിഡ്നി തണ്ടറിനെ 7 വിക്കറ്റിന് പരാജയപ്പെടുത്തി ഹൊബാർട്ട് ഹരിക്കേൻസ് ബിഗ് ബാഷ് കിരീടം സ്വന്തമാക്കി. മിച്ചൽ ഓവൻ 39 പന്തിൽ നിന്ന് സെഞ്ച്വറി നേടി ഹൊബാർട്ട് ഹരിക്കേൻസിനെ അവരുടെ കന്നി ബിഗ് ബാഷ് ലീഗ് കിരീടത്തിലേക്ക് നയിക്കുക ആയിരുന്നു.
183 റൺസ് പിന്തുടർന്ന ഹൊബാർട് ഓവന്റെ 42 പന്തിൽ നിന്ന് 6 ഫോറുകളും 11 സിക്സറുകളും ഉൾപ്പെടെയുള്ള 108 റൺസിന്റെ ബലത്തിൽ വെറും 14.1 ഓവറിൽ ലക്ഷ്യം പിന്തുടർന്നു.
ആദ്യം ബാറ്റ് ചെയ്ത തണ്ടർ ജേസൺ സംഘയുടെ 67 റൺസിന്റെയും ക്യാപ്റ്റൻ ഡേവിഡ് വാർണറുടെ 48 റൺസിന്റെയും കരുത്തിൽ 182/7 എന്ന സ്കോർ ആണ് നേടിയത്. നാഥൻ എല്ലിസും റൈലി മെറെഡിത്തും ഹറികൻസിന് വേണ്ടി മൂന്ന് വിക്കറ്റുകൾ വീതം വീഴ്ത്തി ബൗളർമാരിൽ മികച്ച പ്രകടനം കാഴ്ചവച്ചു.
ഓവനും കാലെബ് ജുവലും ചേർന്ന് വെറും 7.2 ഓവറിൽ 109 റൺസ് കൂട്ടിച്ചേർത്തു. ജുവലും നിഖിൽ ചൗധരിയും പെട്ടെന്ന് പുറത്തായെങ്കിലും, ഓവൻ തന്റെ ആക്രമണം തുടർന്നു. ഓവൻ ഔട്ട് ആയ ശേഷം മാത്യു വെയ്ഡും (17 പന്തിൽ 32) ബെൻ മക്ഡെർമോട്ടും (12 പന്തിൽ 18) പിന്നീട് ടീമിനെ അനായാസം വിജയത്തിലേക്ക് നയിച്ചു.
ഹരിക്കേൻസിന്റെ 14 വർഷത്തെ കാത്തിരിപ്പിന് ഈ വിജയം അവസാനം കുറിച്ചു. .
