Tag: Wimbledon

നിലവിലെ വിംബിൾഡൺ ജേതാവും മൂന്നാം സീഡും ആയ കസാഖിസ്ഥാൻ താരം എലേന റിബാക്കിന അവസാന പതിനാറിൽ. ബ്രിട്ടീഷ് താരം കേറ്റി ബോൽട്ടറിനു എതിരെ ഒരു ദയയും ഇല്ലാത്ത പ്രകടനം ആണ് കസാഖ് താരം പുറത്ത് എടുത്തത്.

വെറും ഒരു മണിക്കൂറിൽ താഴെ 6-1, 6-1 എന്ന സ്കോറിന് റിബാക്കിന മത്സരം സ്വന്തം പേരിലാക്കി. മത്സരത്തിൽ 5 തവണ എതിരാളിയെ ബ്രേക്ക് ചെയ്ത റിബാക്കിന 7 തവണ ഏസുകൾ ഉതിർക്കുകയും ചെയ്തു. വിംബിൾഡണിൽ താരം നേടുന്ന തുടർച്ചയായ പത്താം ജയം ആയിരുന്നു ഇത്.

വിംബിൾഡൺ മൂന്നാം റൗണ്ടിലേക്ക് മുന്നേറി ലോക ഒന്നാം നമ്പർ താരം കാർലോസ് അൽകാരസ്. ഓസ്‌ട്രേലിയൻ താരം അലക്സാണ്ടർ മുള്ളറിനെ നേരിട്ടുള്ള സെറ്റുകൾക്ക് ആണ് അൽകാരസ് തോൽപ്പിച്ചത്. മത്സരത്തിൽ 5 ഏസുകൾ ഉതിർത്ത സ്പാനിഷ് താരം 2 തവണ എതിരാളിയുടെ സർവീസ് ബ്രേക്ക് ചെയ്തു. 6-4, 7-6, 6-3 എന്ന സ്കോറിന് മത്സരം ജയിച്ച അൽകാരസിന് രണ്ടാം സെറ്റിൽ ടൈബ്രേക്കർ നേരിട്ടത് ഒഴിച്ചാൽ കാര്യമായ വെല്ലുവിളി ഒന്നും നേരിട്ടില്ല.

അതേസമയം സ്പാനിഷ് താരം റോബർട്ടോയെ 6-3, 7-6, 6-4 എന്ന സ്കോറിന് മറികടന്ന ആറാം സീഡ് ഹോൾഗർ റൂണെയും മൂന്നാം റൗണ്ടിലേക്ക് മുന്നേറി. മൂന്നാം റൗണ്ടിൽ ഫ്രഞ്ച് താരം ക്വന്റൻ ഹലയ്സിനെ ആദ്യ സെറ്റ് നഷ്ടമായ ശേഷം 3-6, 6-2, 6-3, 6-4 എന്ന സ്കോറിന് തോൽപ്പിച്ചു എട്ടാം സീഡ് യാനിക് സിന്നർ നാലാം റൗണ്ടിലേക്ക് മുന്നേറി. ജപ്പാനീസ് താരത്തെ മറികടന്നു 19 സീഡ് സാഷ സെരവ് മൂന്നാം റൗണ്ടിലേക്ക് മുന്നേറി. മൂന്നാം റൗണ്ടിൽ 15 സീഡ് അലക്‌സ് ഡിമിനോറിനെ നേരിട്ടുള്ള സെറ്റുകൾക്ക് ഞെട്ടിച്ച മുൻ വിംബിൾഡൺ ഫൈനലിസ്റ്റ് ഇറ്റാലിയൻ താരം മറ്റെയോ ബരെറ്റിനി ആണ് സാഷയുടെ എതിരാളി. മൂന്നാം റൗണ്ടിൽ 14 സീഡ് ലോറൻസോ മുസേറ്റി 17 സീഡ് ഉമ്പർട്ട് ഹുർകാശിനോട് നേരിട്ടുള്ള സെറ്റുകൾക്ക് തോറ്റു വിംബിൾഡണിൽ നിന്നു പുറത്തായി.

വിംബിൾഡൺ രണ്ടാം റൗണ്ടിൽ നേരിട്ടുള്ള സെറ്റുകൾക്ക് ജയം കണ്ടു കസാഖ് താരവും നിലവിലെ ജേതാവും ആയ മൂന്നാം സീഡ് എലേന റിബാക്കിന. ഫ്രഞ്ച് താരം ആലീസ് കോർണറ്റെയെ 6-2, 7-6 എന്ന സ്കോറിന് ആണ് കസാഖ് താരം മറികടന്നത്. ഇടക്ക് തെന്നി വീണ എതിരാളിയെ ഓടി വന്നു നോക്കാനും റിബാക്കിന മറന്നില്ല. സ്പാനിഷ് താരം ക്രിസ്റ്റീനയെ 6-1, 6-4 എന്ന സ്കോറിന് തകർത്ത നാലാം സീഡ് അമേരിക്കയുടെ ജെസീക്ക പെഗുലയും മൂന്നാം റൗണ്ടിലേക്ക് മുന്നേറി.

മുൻ യു.എസ് ഓപ്പൺ ഫൈനലിസ്റ്റ് ആയ ലൈയ്ല ഫെർണാണ്ടസിനെ മൂന്നു സെറ്റ് പോരാട്ടത്തിൽ ആദ്യ സെറ്റ് നഷ്ടമായ ശേഷം തിരിച്ചു വന്നു തോൽപ്പിച്ചു അഞ്ചാം സീഡ് ഫ്രഞ്ച് താരം കരോളിൻ ഗാർസിയയും മൂന്നാം റൗണ്ടിലേക്ക് മുന്നേറി. വിക്ടോറിയ അസരങ്ക, ബെലിന്ത ബെനചിച്, ഡോണ വെകിച് എന്നിവർ മൂന്നാം റൗണ്ടിലേക്ക് മുന്നേറിയപ്പോൾ രണ്ടാം റൗണ്ടിൽ പത്താം സീഡ് ബാർബറോ ക്രജികോവ പരിക്കേറ്റു പിന്മാറി.

വിംബിൾഡൺ രണ്ടാം റൗണ്ടിൽ വമ്പൻ അട്ടിമറി. നാലാം സീഡും ഫ്രഞ്ച് ഓപ്പൺ ഫൈനലിസ്റ്റും ആയ നോർവീജിയൻ താരം കാസ്പർ റൂഡ് രണ്ടാം റൗണ്ടിൽ പുറത്ത്. 29 കാരനായ ബ്രിട്ടീഷ് വൈൾഡ് കാർഡ് ലിയാം ബ്രോഡി ആണ് 5 സെറ്റ് നീണ്ട പോരാട്ടത്തിന് ഒടുവിൽ റൂഡിനെ അട്ടിമറിച്ചത്. മത്സരത്തിൽ 10 ഏസുകൾ ഉതിർത്ത റൂഡിന്റെ സർവീസ് 6 തവണയാണ് ബ്രോഡി ബ്രേക്ക് ചെയ്തത്. ആദ്യ സെറ്റ് ബ്രോഡി 6-4 നു നേടിയപ്പോൾ രണ്ടും മൂന്നും സെറ്റുകൾ 6-3, 6-4 സ്കോറിന് നേടി റൂഡ് തിരിച്ചടിച്ചു. എന്നാൽ 6-3, 6-0 എന്ന സ്കോറിനു നാലും അഞ്ചും സെറ്റുകൾ നേടിയ ബ്രിട്ടീഷ് താരം സെന്റർ കോർട്ടിൽ കരിയറിലെ ഏറ്റവും വലിയ ജയം കുറിച്ചു.

നാട്ടുകാരനായ കാരറ്റ്സേവിനെ വീഴ്ത്തി ഏഴാം സീഡായ റഷ്യൻ താരം ആന്ദ്ര റൂബ്ലേവ്, സ്വിസ് താരവും മുൻ ഗ്രാന്റ് സ്ലാം ജേതാവും ആയ സ്റ്റാൻ വാവറിങ്കയും മൂന്നാം റൗണ്ടിലേക്ക് മുന്നേറി. മൂന്നാം റൗണ്ടിൽ ജ്യോക്കോവിച് ആണ് വാവറിങ്കയുടെ എതിരാളി. ആദ്യ രണ്ടു സെറ്റുകൾ നേടിയ ശേഷം സ്വീഡിഷ് താരം മിഖേൽ യമറിനോട് 5 സെറ്റ് പോരാട്ടത്തിൽ പരാജയപ്പെട്ട ഒമ്പതാം സീഡ് അമേരിക്കയുടെ ടെയ്‌ലർ ഫ്രിറ്റ്സും രണ്ടാം റൗണ്ടിൽ പുറത്തായി. പത്താം സീഡ് അമേരിക്കൻ താരം ഫ്രാൻസസ് ടിയഫോ അതേസമയം അനായാസ ജയവുമായി മൂന്നാം റൗണ്ടിലേക്ക് മുന്നേറി.