വിംബിൾഡൺ അവസാന പതിനാറിലേക്ക് അനായാസം മുന്നേറി ലോക ഒന്നാം നമ്പർ താരം ഇഗ സ്വിറ്റെക്. ക്രൊയേഷ്യൻ താരവും 30 സീഡും ആയ പെട്ര മാർട്ടിചിനെ 6-2, 7-5 എന്ന സ്കോറിന് ആണ് ഇഗ മൂന്നാം റൗണ്ടിൽ തകർത്തത്. മത്സരത്തിൽ 2 തവണ ബ്രേക്ക് വഴങ്ങിയ ഇഗ 5 തവണ എതിരാളിയെ ബ്രേക്ക് ചെയ്തു. കിരീടം ലക്ഷ്യം വച്ചു കുതിക്കുന്ന ഇഗ മികവ് തുടരുകയാണ്. അവസാന പതിനാറിൽ 14 സീഡ് സ്വിസ് താരം ബെലിന്ത ബെനചിച്നെ ആണ് ഇഗ നേരിടുക. പോളണ്ട് താരം ലിനറ്റെയെ 6-3, 6-1 എന്ന സ്കോറിന് മറികടന്നു ആണ് ബെനചിച് അവസാന പതിനാറിൽ എത്തിയത്.
32 സീഡ് ചെക് താരം മേരി ബൗസ്കോവയോട് മൂന്നു സെറ്റ് പോരാട്ടത്തിൽ 6-7, 6-4, 7-5 എന്ന സ്കോറിന് പരാജയപ്പെട്ട അഞ്ചാം സീഡ് ഫ്രഞ്ച് താരം കരോളിൻ ഗാർസിയ വിംബിൾഡൺ മൂന്നാം റൗണ്ടിൽ പുറത്തായി. അതേസമയം സീഡ് ചെയ്യാത്ത ഇറ്റാലിയൻ താരം എലിസത്തായെ 6-4, 6-0 എന്ന നേരിട്ടുള്ള സ്കോറിന് തകർത്ത നാലാം സീഡും യു.എസ് താരവും ആയ ജെസിക്ക പെഗ്യുലയും അവസാന പതിനാറിൽ എത്തി. സോഫിയ കെനിനെ വീഴ്ത്തി ഏലീന സ്വിറ്റോലിന, 20 സീഡ് ഡോണ വെകിച്ചിനെ വീഴ്ത്തി വോണ്ടറൗസോവ എന്നിവരും അവസാന പതിനാറിൽ എത്തി. അതേസമയം ചൈനീസ് താരം ബായിയെ 6-1, 6-1 എന്ന സ്കോറിന് തകർത്തു ആറാം സീഡ് ടുണീഷ്യൻ താരം ഒൻസ് യാബ്യുർ മൂന്നാം റൗണ്ടിലേക്ക് മുന്നേറി.
