Category: Wimbledon

സെന്റർ കോർട്ടിൽ നടന്ന വിംബിൾഡൺ ഫൈനലിൽ കാർലോസ് അൽകാരാസിനെ 4-6, 6-4, 6-4, 6-4 എന്ന സ്കോറിന് പരാജയപ്പെടുത്തി യാനിക്ക് സിന്നർ തന്റെ കന്നി വിംബിൾഡൺ കിരീടം സ്വന്തമാക്കി ചരിത്രത്തിൽ ഇടംനേടി. നിലവിൽ ലോക ഒന്നാം നമ്പർ താരമായ ഈ ഇറ്റാലിയൻ, വിംബിൾഡൺ സിംഗിൾസ് കിരീടം നേടുന്ന തന്റെ രാജ്യത്ത് നിന്നുള്ള ആദ്യ പുരുഷ താരമായി, തന്റെ മികച്ച കരിയറിലെ മറ്റൊരു തിളക്കമാർന്ന നേട്ടമാണിത്.

ആദ്യ സെറ്റ് നഷ്ടപ്പെട്ടതിന് ശേഷം, പക്വതയോടെയും കൃത്യതയോടെയും സിന്നർ തിരിച്ചുവന്നു. ആൽകാരാസിന്റെ വേഗതയെ തന്റെ ആഴത്തിലുള്ള ഗ്രൗണ്ട്സ്ട്രോക്കുകളും സ്ഥിരതയാർന്ന സെർവുകളും ഉപയോഗിച്ച് നിർവീര്യമാക്കി. രണ്ട് തവണ നിലവിലെ ചാമ്പ്യനായി ഫൈനലിലെത്തിയ അൽകാരാസ് ആദ്യ സെറ്റിന് ശേഷം തന്റെ മികവിലേക്ക് ഉയർന്നതേ ഇല്ല.

ഈ വിജയം സിന്നറുടെ നാലാമത്തെ ഗ്രാൻഡ് സ്ലാം കിരീടമാണ്, ഹാർഡ് കോർട്ടുകൾക്ക് പുറത്ത് നേടുന്ന ആദ്യ കിരീടം കൂടിയാണിത്.

വിംബിൾഡൺ കിരീടം ആദ്യമായി ഉയർത്തി എട്ടാം സീഡും പോളണ്ട് താരവും ആയ ഇഗ സ്വിറ്റെക്. ഒരു ഗെയിം പോലും നഷ്ടമാവാതെ 6-0, 6-0 എന്ന സ്കോറിന് 13 സീഡ് അമേരിക്കയുടെ അമാന്ത അനിസിമോവയെ ആണ് ഇഗ തകർത്തത്. 1911 നു ശേഷം ആദ്യമായി ആണ് വിംബിൾഡൺ ഫൈനൽ ഈ സ്കോറിന് അവസാനിക്കുന്നത്. ഓപ്പൺ യുഗത്തിൽ 1988 ലെ ഫ്രഞ്ച് ഓപ്പൺ ഫൈനലിന് ശേഷം ഇത്തരം ഒരു ഫൈനൽ സ്കോറും ഇത് ആദ്യമായാണ്. ഫൈനൽ ഒരു മണിക്കൂർ പോലും നീണ്ടു നിന്നില്ല.

പുരുഷ, വനിത വിഭാഗങ്ങളിൽ പോളണ്ടിൽ നിന്നുള്ള ആദ്യ വിംബിൾഡൺ ജേതാവ് ആയും ഇഗ ഇതോടെ മാറി. കരിയറിലെ ആറാം ഗ്രാന്റ് സ്ലാം ആണ് ഇഗക്ക് ഇത്, കളിച്ച 6 ഫൈനലുകളും ഇഗ ജയിച്ചു. മൂന്നു സർഫസുകളിലും ഗ്രാന്റ് സ്ലാം കിരീടവും ഇഗ ഇതോടെ നേടി. കരിയറിലെ 23 മത്തെ കിരീടം ആയിരുന്നു 24 കാരിയായ താരത്തിന് ഇത്. 2024 ഫ്രഞ്ച് ഓപ്പൺ കിരീടത്തിനു ശേഷമുള്ള കിരീടനേട്ടത്തോടെ റാങ്കിംഗിൽ മൂന്നാം സ്ഥാനത്തേക്കും ഇഗ മുന്നേറും.

ചരിത്രപരമായ ഒരു വിജയത്തിൽ, ജൂലിയൻ കാഷും ലോയ്ഡ് ഗ്ലാസ്‌പൂളും വിംബിൾഡൺ 2025 പുരുഷ ഡബിൾസ് കിരീടം സ്വന്തമാക്കി. 1936-ന് ശേഷം ഈ ട്രോഫി നേടുന്ന ആദ്യ ഓൾ-ബ്രിട്ടീഷ് സഖ്യമായി ഇവർ മാറി. സെന്റർ കോർട്ടിൽ നടന്ന ഫൈനലിൽ അഞ്ചാം സീഡുകളായ ഇരുവരും, ഫൈനലിസ്റ്റുകളായ റിങ്കി ഹിജികാറ്റയെ (ഓസ്ട്രേലിയ), ഡേവിഡ് പെല്ലിനെ (നെതർലൻഡ്‌സ്) 6-2, 7-6(3) എന്ന സ്‌കോറിന് നേരിട്ടുള്ള സെറ്റുകൾക്ക് പരാജയപ്പെടുത്തി.

ഈ ഗ്രാസ്-കോർട്ട് സീസണിൽ ക്വീൻസ് ക്ലബ്ബിലും ഈസ്റ്റ്ബോണിലും കിരീടങ്ങൾ നേടി കാഷും ഗ്ലാസ്‌പൂളും ഇതിനകം ശ്രദ്ധ നേടിയിരുന്നു. തങ്ങളുടെ ആദ്യ ഗ്രാൻഡ് സ്ലാം കിരീടം നേടിക്കൊണ്ട് അവർ ഈ വേനൽക്കാലത്തെ സ്വപ്നതുല്യമായ ഓട്ടത്തിന് ഒരു അന്ത്യം കുറിച്ചു.

ബ്രിട്ടീഷ് സഖ്യം ശക്തമായിട്ടാണ് തുടങ്ങിയത്. പെല്ലിന്റെ തുടക്കത്തിലെ പിഴവുകളും ദുർബലമായ സർവ് ഗെയിമും മുതലെടുത്ത് ആദ്യ സെറ്റിൽ ആധിപത്യം സ്ഥാപിച്ചു. രണ്ടാം സെറ്റിൽ എതിരാളികൾ മികച്ച വെല്ലുവിളി ഉയർത്തി, സെറ്റിനെ ടൈബ്രേക്കറിലേക്ക് എത്തിച്ചു. എന്നാൽ കാഷും ഗ്ലാസ്‌പൂളും ശാന്തത പാലിക്കുകയും തങ്ങളുടെ കളി മെച്ചപ്പെടുത്തുകയും ചെയ്ത് സ്വന്തം കാണികൾക്ക് മുന്നിൽ വിജയം സ്വന്തമാക്കി.

തുടർച്ചയായ മൂന്നാം വിംബിൾഡൺ ഫൈനലിലേക്ക് മുന്നേറി രണ്ടാം സീഡും കഴിഞ്ഞ രണ്ടു വർഷത്തെ ചാമ്പ്യനും ആയ കാർലോസ് അൽകാരാസ് ഗാർഫിയ. തുടർച്ചയായ മൂന്നാം വിംബിൾഡൺ കിരീടം ലക്ഷ്യം വെക്കുന്ന സ്പാനിഷ് താരം അഞ്ചാം സീഡ് അമേരിക്കയുടെ ടെയ്‌ലർ ഫ്രിറ്റ്സിനെ നാലു സെറ്റ് പോരാട്ടത്തിൽ ആണ് മറികടന്നത്. ആദ്യ സെറ്റ് 6-4 നു നേടിയ അൽകാരാസ് രണ്ടാം സെറ്റ് 7-5 നു കൈവിട്ടെങ്കിലും 6-3 നു മൂന്നാം സെറ്റും ടൈബ്രേക്കറിലൂടെ നാലാം സെറ്റും നേടി അൽകാരാസ് ഫൈനൽ ഉറപ്പിച്ചു.

കഴിഞ്ഞ 5 ഗ്രാന്റ് സ്ലാം ഫൈനലുകളും ജയിച്ച അൽകാരാസിന് ഇത് കരിയറിലെ ആറാം ഗ്രാന്റ് സ്ലാം ഫൈനൽ ആണ്. തുടർച്ചയായ 24 മത്തെ ജയവും വിംബിൾഡണിലെ തുടർച്ചയായ 20 മത്തെ ജയവും ആണ് അൽകാരാസിന് ഇത്. പുൽ മൈതാനത്ത് ആവട്ടെ തുടർച്ചയായ 18 മത്തെ ജയവും. 2022 നു ശേഷം വിംബിൾഡണിൽ പരാജയം അറിയാത്ത അൽകാരാസ് ഫൈനലിൽ നൊവാക് ജ്യോക്കോവിച്, യാനിക് സിന്നർ മത്സരവിജയിയെ ആണ് നേരിടുക.

5 തവണ ഗ്രാന്റ് സ്ലാം ജേതാവ് ആയ പോളണ്ട് താരം ഇഗ സ്വിറ്റെക് കരിയറിൽ ആദ്യമായി വിംബിൾഡൺ ഫൈനലിലേക്ക് മുന്നേറി. എട്ടാം സീഡ് ആയ പോളണ്ട് താരം പുൽ മൈതാനത്ത് മികവ് കാട്ടുന്നില്ല എന്ന പരാതി തീർത്താണ് വിംബിൾഡൺ ഫൈനൽ പ്രവേശനം ഉറപ്പിച്ചത്.

സ്വിസ് താരവും മുൻ ഒളിമ്പിക് ജേതാവും ആയ ബെലിന്ത ബെനചിനെ ഒരവസരവും നൽകാതെ തകർത്താണ് ഇഗ ഫൈനലിൽ എത്തിയത്. 6-2, 6-0 എന്ന നേരിട്ടുള്ള സ്കോറിന് ആയിരുന്നു ഇഗയുടെ ജയം. ഇത് വരെ കളിച്ച 5 ഗ്രാന്റ് സ്ലാം ഫൈനലുകളും ജയിച്ച ഇഗക്ക് ആദ്യ ഫൈനൽ കളിക്കുന്ന അമേരിക്കൻ താരം അമാന്ത അനിസിമോവയാണ് ഫൈനലിലെ എതിരാളി.

ലോക ഒന്നാം നമ്പർ ആര്യാന സബലെങ്കയെ ഞെട്ടിച്ചു 23 കാരിയായ അമേരിക്കൻ താരം അമാന്ത അനിസിമോവ കരിയറിലെ ആദ്യ ഗ്രാന്റ് സ്ലാം ഫൈനലിൽ. 13 സീഡ് ആയ അനിസിമോവ 3 സെറ്റ് പോരാട്ടത്തിൽ ആണ് സബലെങ്കയെ വീഴ്ത്തിയത്. ആദ്യ സെറ്റ് 6-4 നു നേടിയ അനിസിമോവക്ക് എതിരെ രണ്ടാം സെറ്റ് 6-4 നു നേടി സബലെങ്ക തിരിച്ചടിച്ചു എങ്കിലും മൂന്നാം സെറ്റ് 6-4 നു നേടി അനിസിമോവ വിംബിൾഡൺ ഫൈനൽ ഉറപ്പിച്ചു.

കരിയറിൽ ആദ്യമായാണ് അനിസിമോവ ലോക ഒന്നാം നമ്പർ താരത്തിന് എതിരെ ജയിക്കുന്നത്. 19 മത്തെ വയസ്സിൽ ഫ്രഞ്ച് ഓപ്പൺ സെമിഫൈനലിൽ എത്തിയ ശേഷം പരിക്കുകൾ വേട്ടയാടിയ കരിയർ ആയിരുന്നു അനിസിമോവയുടേത്. 2023 ൽ മാനസിക സമ്മർദ്ദം കാരണം ടെന്നീസിൽ നിന്നു ഇടവേള എടുത്ത താരം മാസങ്ങളോളം ടെന്നീസ് റാക്കറ്റ് കൈ കൊണ്ട് തൊട്ടില്ല. തുടർന്ന് അച്ഛന്റെ വിയോഗവും താരത്തെ തളർത്തി. എന്നാൽ അതിൽ നിന്നുള്ള തിരിച്ചു വരവ് ആയി താരത്തിന് ഇത്. സബലെങ്കക്ക് എതിരെ ഒമ്പതാം മത്സരം കളിച്ച അനിസിമോവ ആറാം തവണയാണ് ബലാറസ് താരത്തിന് എതിരെ ജയിക്കുന്നത്.

ഗ്രിഗോർ ദിമിത്രോവിനു എതിരെ വിയർത്തെങ്കിലും ക്വാർട്ടർ ഫൈനലിൽ തന്റെ വിശ്വരൂപം കാണിച്ചു ലോക ഒന്നാം നമ്പർ യാനിക് സിന്നർ. പത്താം സീഡ് അമേരിക്കൻ താരം ബെൻ ഷെൽട്ടനെ നേരിട്ടുള്ള സെറ്റുകൾക്ക് തോൽപ്പിച്ചു ആണ് ഇറ്റാലിയൻ താരം കരിയറിലെ ഏഴാം ഗ്രാന്റ് സ്ലാം സെമിഫൈനലിലേക്ക് മുന്നേറിയത്. കരിയറിലെ രണ്ടാം വിംബിൾഡൺ സെമിഫൈനൽ കൂടിയാണ് താരത്തിന് ഇത്.

ടൈബ്രേക്കറിലേക്ക് നീണ്ട ആദ്യ സെറ്റ് ടൈബ്രേക്കറിലെ അവസാന 7 പോയിന്റുകളും ജയിച്ചു 7-6 സ്വന്തമാക്കിയ സിന്നർ രണ്ടും മൂന്നും സെറ്റുകളിൽ കൂടുതൽ ആധിപത്യം കാണിച്ചു. നിർണായക ബ്രേക്ക് ഓരോ സെറ്റിലും കണ്ടെത്തിയ സിന്നർ 6-4, 6-4 എന്ന സ്കോറിന് ജയം കണ്ടെത്തി വിംബിൾഡൺ അവസാന നാലിൽ സ്ഥാനം ഉറപ്പിച്ചു. സെമിയിൽ നൊവാക് ജ്യോക്കോവിച്, ഫ്ലാവിയോ കൊബോളി മത്സരവിജയിയാണ് സിന്നറിന്റെ എതിരാളി.

തുടർച്ചയായ മൂന്നാം വിംബിൾഡൺ സെമിഫൈനലിലേക്ക് മുന്നേറി രണ്ടാം സീഡും ഹാട്രിക് കിരീടവും ലക്ഷ്യം വെക്കുന്ന കാർലോസ് അൽകാരാസ്. സെന്റർ കോർട്ടിൽ ബ്രിട്ടീഷ് താരം കാമറൂൺ നോരിയെ നേരിട്ടുള്ള സെറ്റുകൾക്ക് ആണ് അൽകാരാസ് വീഴ്ത്തിയത്. 13 ഏസുകൾ മത്സരത്തിൽ ഉതിർത്ത അൽകാരാസ് 5 തവണ എതിരാളിയുടെ സർവീസ് ഭേദിച്ചു.

അധികം വിയർക്കാതെ 6-2, 6-3, 6-3 എന്ന സ്കോറിന് ആയിരുന്നു സ്പാനിഷ് താരത്തിന്റെ ക്വാർട്ടർ ഫൈനൽ വിജയം. 2025 ൽ തുടർച്ചയായ 23 മത്തെ മത്സരത്തിൽ ആണ് അൽകാരാസ് വിജയം നേടുന്നത്. വിംബിൾഡണിൽ തുടർച്ചയായ 19 മത്തെ ജയവും ആണ് അൽകാരാസിന് ഇത്. കരിയറിലെ എട്ടാം ഗ്രാന്റ് സ്ലാം സെമിഫൈനൽ കളിക്കുന്ന അൽകാരാസിന് അമേരിക്കൻ താരം ടെയ്‌ലർ ഫ്രിറ്റ്സ് ആണ് സെമിയിലെ എതിരാളി. ഹാട്രിക് കിരീടം തന്നെയാണ് അൽകാരാസിന്റെ ലക്ഷ്യം.