Tag: Wimbledon

വിംബിൾഡൺ സെമിഫൈനലിലേക്ക് മുന്നേറി സീഡ് ചെയ്യാത്ത ചെക് റിപ്പബ്ലിക് താരം മാർകെറ്റ വോണ്ടറൗസോവ. നാലാം സീഡ് അമേരിക്കൻ താരം ജെസിക്ക പെഗ്യുലയെ അട്ടിമറിച്ചു ആണ് ചെക് താരം വിംബിൾഡൺ അവസാന നാലിലേക്ക് മുന്നേറിയത്. 2019 ഫ്രഞ്ച് ഓപ്പൺ ഫൈനലിസ്റ്റും ഒളിമ്പിക് വെള്ളി മെഡൽ ജേതാവും ആയ ചെക് താരത്തിന്റെ ആദ്യ വിംബിൾഡൺ സെമിഫൈനൽ ആണ് ഇത്.

ആദ്യ സെറ്റ് 6-4 നു ചെക് താരം നേടിയപ്പോൾ 6-2 നു രണ്ടാം സെറ്റ് നേടി ജെസിക്ക തിരിച്ചടിച്ചു. മൂന്നാം സെറ്റിൽ 4-1 നു അമേരിക്കൻ താരം മുന്നിട്ട് നിൽക്കുമ്പോൾ ആണ് മഴ എത്തിയത്. തുടർന്ന് ഇടവേളക്ക് ശേഷം ഒന്നാം നമ്പർ കോർട്ടിൽ റൂഫ് അടച്ച ശേഷം തുടർച്ചയായി 5 ഗെയിമുകൾ നേടിയ ചെക് താരം സെറ്റ് 6-4 നു നേടി മത്സരം സ്വന്തം പേരിലാക്കി. തീർത്തും അപ്രതീക്ഷതമായ ജയത്തിനു ശേഷം കണ്ണീരോടെയാണ് ചെക് താരം റിസൾട്ട് സ്വീകരിച്ചത്.

വിംബിൾഡൺ ക്വാർട്ടർ ഫൈനലിലേക്ക് കരിയറിൽ ആദ്യമായി മുന്നേറി ലോക ഒന്നാം നമ്പർ കാർലോസ് അൽകാരസ്. മുൻ വിംബിൾഡൺ ഫൈനലിസ്റ്റ് ഇറ്റാലിയൻ താരം മറ്റെയോ ബരെറ്റിനിയെ ആദ്യ സെറ്റ് നഷ്ടമായ ശേഷം തിരിച്ചു വന്നു തോൽപ്പിച്ചു ആണ് സ്പാനിഷ് താരം അവസാന എട്ടിൽ സ്ഥാനം ഉറപ്പിച്ചത്. മത്സരത്തിൽ നാലു തവണ ഇറ്റാലിയൻ താരത്തിന്റെ സർവീസ് അൽകാരസ് ഭേദിച്ചു. 3-6, 6-3, 6-3, 6-3 എന്ന സ്കോറിന് ആയിരുന്നു അൽകാരസിന്റെ ജയം.

ക്വാർട്ടർ ഫൈനലിൽ തന്റെ സുഹൃത്തും മുൻ ഡബിൾസ് പങ്കാളിയും ആയ ആറാം സീഡ് ഡാനിഷ് താരം ഹോൾഗർ റൂണെ ആണ് അൽകാരസിന്റെ എതിരാളി. 21 സീഡ് ഗ്രിഗോർ ദിമിത്രോവിനെ ആദ്യ സെറ്റ് 6-3 നു നഷ്ടമായ ശേഷം തിരിച്ചു വന്നാണ് റൂണെ മത്സരത്തിൽ ജയം കണ്ടത്. രണ്ടും മൂന്നും സെറ്റുകളിൽ കടുത്ത ടൈബ്രേക്കർ പോരാട്ടം ഡാനിഷ് താരം അതിജീവിച്ചു. നാലാം സെറ്റിൽ 6-3 നു ജയം കണ്ട റൂണെ മത്സരം സ്വന്തം പേരിലാക്കി. 1958 നു ശേഷം വിംബിൾഡൺ ക്വാർട്ടർ ഫൈനലിൽ എത്തുന്ന ആദ്യ ഡാനിഷ് താരം ആണ് റൂണെ. 20 കാരുടെ പോരാട്ടം ക്വാർട്ടർ ഫൈനലിൽ തീപാറും എന്നുറപ്പാണ്.

കസാഖിസ്ഥാൻ താരം അലക്സാണ്ടർ ബുബ്ലികിനു എതിരെ അഞ്ചു സെറ്റ് നീണ്ട കടുത്ത പോരാട്ടം അതിജീവിച്ചു റഷ്യയുടെ ഏഴാം സീഡ് ആന്ദ്ര റൂബ്ലേവ് വിംബിൾഡൺ ക്വാർട്ടർ ഫൈനലിൽ. വളരെ മികച്ച പോരാട്ടം കണ്ട മത്സരത്തിൽ അഞ്ചാം സെറ്റിൽ റൂബ്ലേവിന്റെ തീർത്തും അവിശ്വസനീയം ആയ ഷോട്ടും കാണാൻ ആയി. ആദ്യ രണ്ടു സെറ്റുകളിൽ ഓരോ തവണ ബ്രേക്ക് കണ്ടത്തി 7-5, 6-3 എന്ന സ്കോറിന് സെറ്റുകൾ സ്വന്തമാക്കിയ റൂബ്ലേവ് എളുപ്പം ജയിക്കും എന്നു കരുതിയ മത്സരത്തിൽ പക്ഷെ മൂന്നും നാലും സെറ്റുകൾ കടുത്ത ടൈബ്രേക്കർ പോരാട്ടത്തിലൂടെ ബുബ്ലിക് കരസ്ഥമാക്കി. എന്നാൽ അഞ്ചാം സെറ്റിൽ നിർണായക ബ്രേക്ക് നേടിയ റൂബ്ലേവ് 6-4 നു സെറ്റ് നേടി കരിയറിൽ ആദ്യമായി വിംബിൾഡൺ അവസാന എട്ടിലേക്ക് മുന്നേറി. മത്സരത്തിൽ റൂബ്ലേവ് 21 ഏസുകൾ ഉതിർത്തപ്പോൾ 39 ഏസുകൾ ആണ് ബുബ്ലിക് ഉതിർത്തത്.

അതേസമയം സീഡ് ചെയ്യാത്ത കൊളംബിയൻ താരം ഡാനിയേൽ ഗാലനു എതിരെ നേരിട്ടുള്ള സെറ്റുകൾക്ക് ജയം കണ്ട എട്ടാം സീഡ് ഇറ്റലിയുടെ യാനിക് സിന്നർ വിംബിൾഡൺ ക്വാർട്ടറിൽ എത്തി. വിംബിൾഡൺ ക്വാർട്ടർ ഫൈനലിൽ 2 തവണ എത്തുന്ന ആദ്യ ഇറ്റാലിയൻ താരമാണ് സിന്നർ. ആദ്യ സെറ്റ് ടൈബ്രേക്കറിലൂടെ 7-6 നു നേടിയ സിന്നർ രണ്ടും മൂന്നും സെറ്റുകൾ 6-4, 6-3 എന്ന സ്കോറിന് സ്വന്തമാക്കി. തികച്ചും ആധികാരിക പ്രകടനം ആണ് സിന്നറിൽ നിന്നുണ്ടായത്. അതിനിടെയിൽ 26 സീഡ് കനേഡിയൻ താരം ഡെന്നിസ് ഷപവലോവിനെ ആദ്യ സെറ്റ് നഷ്ടമായ ശേഷം തിരിച്ചു വന്നു തോൽപ്പിച്ചു സീഡ് ചെയ്യാത്ത റഷ്യൻ താരം റോമൻ സഫിയുല്ലിൻ അവസാന എട്ടിൽ എത്തി. 3-6, 6-3, 6-1, 6-3 എന്ന സ്കോറിന് ആയിരുന്നു റഷ്യൻ താരത്തിന്റെ അട്ടിമറി ജയം.

വിംബിൾഡൺ പുരുഷ ഡബിൾസിൽ ആദ്യ റൗണ്ടിൽ തന്നെ ഇന്ത്യൻ സഖ്യമായ സാഖേത് മയ്നെനി, യൂക്കി ബാംബ്രി സഖ്യം പുറത്ത്. സീഡ് ചെയ്യാത്ത ഇന്ത്യൻ സഖ്യം സീഡ് ചെയ്യാത്ത സ്പാനിഷ്, ഫ്രഞ്ച് സഖ്യം ആയ അലഹാൻഡ്രോ ഡേവിഡനോവിച് ഫോകിന, അഡ്രിയാൻ മന്നറിനോ സഖ്യത്തിനോട് ആണ് പരാജയപ്പെട്ടത്.

മികച്ച പോരാട്ടം ആണ് ഇന്ത്യൻ സഖ്യം മത്സരത്തിൽ നടത്തിയത്. ആദ്യ സെറ്റ് 6-4 നു നഷ്ടമായ ശേഷം രണ്ടാം സെറ്റ് 6-4 നു നേടി ഇന്ത്യൻ സഖ്യം മത്സരം മൂന്നാം സെറ്റിലേക്ക് നീട്ടി. മൂന്നാം സെറ്റിൽ എന്നാൽ 6-4 നു സെറ്റ് നേടിയ സ്പാനിഷ്, ഫ്രഞ്ച് സഖ്യം മത്സരം സ്വന്തം പേരിലാക്കി. ചൈനീസ് സഖ്യം വിംബിൾഡണിൽ നിന്നു അസുഖം കാരണം പിന്മാറിയതോടെയാണ് ഇന്ത്യൻ സഖ്യത്തിന് ടൂർണമെന്റിൽ കളിക്കാൻ അവസരം കിട്ടിയത്.

വിംബിൾഡൺ അവസാന പതിനാറിലേക്ക് മുന്നേറി കരിയറിലെ തന്റെ രണ്ടാമത്തെ മാത്രം ഗ്രാന്റ് സ്ലാം കളിക്കുന്ന റഷ്യൻ താരം മിറ ആന്ദ്രീവ. നാട്ടുകാരിയായ 22 സീഡ് അനസ്താഷിയ പോട്ടപോവയെ നേരിട്ടുള്ള സെറ്റുകൾക്ക് ആണ് ആന്ദ്രീവ തോൽപ്പിച്ചത്. 6 തവണ എതിരാളിയുടെ സർവീസ് ബ്രേക്ക് ചെയ്ത 16 കാരി 6-2, 7-5 എന്ന സ്കോറിന് ആണ് സ്വപ്നജയം നേടിയത്. നാട്ടുകാരിയായ 32 സീഡ് ബോസ്കോവയെ 2-6, 6-4, 6-3 എന്ന സ്കോറിന് തോൽപ്പിച്ചു സീഡ് ചെയ്യാത്ത ചെക് താരം മാർക്കറ്റ വോണ്ടറോസോവയും അവസാന പതിനാറിൽ എത്തി.

ഉക്രൈൻ താരം ലെസിയ സുരെങ്കോയെ നേരിട്ടുള്ള സെറ്റുകൾക്ക് തകർത്തു നാലാം സീഡ് അമേരിക്കൻ താരം ജെസിക്ക പെഗ്യുലയും അവസാന പതിനാറിലേക്ക് മുന്നേറി. 6-1, 6-3 എന്ന സ്കോറിന് ആയിരുന്നു പെഗ്യുലയുടെ ജയം. മത്സരത്തിൽ 5 തവണ എതിരാളിയുടെ സർവീസ് അമേരിക്കൻ താരം ബ്രേക്ക് ചെയ്തു. അതേസമയം പുരുഷ സിംഗിൾസിൽ ഇന്നലെ നിർത്തി വച്ച മത്സരത്തിൽ 21 സീഡ് ഗ്രിഗോർ ദിമിത്രോവ് പത്താം സീഡ് ഫ്രാൻസസ് ടിയെഫോയെ നേരിട്ടുള്ള സെറ്റുകൾക്ക് തകർത്തു അവസാന പതിനാറിലേക്ക് മുന്നേറി. 13 ഏസുകൾ ഉതിർത്ത ദിമിത്രോവ് 5 തവണ എതിരാളിയുടെ സർവീസ് ബ്രേക്ക് ചെയ്തു. 6-2, 6-3, 6-2 എന്ന സ്കോറിന് ആയിരുന്നു ദിമിത്രോവിന്റെ ജയം.