Category: FIFA World Cup

വനിതാ ഫുട്ബോൾ ലോകകപ്പിൽ അർജന്റീനയുടെ മാരക തിരിച്ചുവരവ്. ഇന്ന് ഗ്രൂപ്പ് ഘട്ടത്തിലെ രണ്ടാം മത്സരത്തിൽ ദക്ഷിണാഫ്രിക്കയെ നേരിട്ട അർജന്റീന 66 മിനുട്ട് വരെ 2-0ന് പിറകിൽ ആയിരുന്നു. അവിടെ നിന്ന് തിരിച്ചടിച്ച് 2-2ന്റെ സമനില സ്വന്തമാക്കാൻ അർജന്റീനക്ക് ആയി. അർജന്റീനയുടെ ആദ്യ പോയിന്റ് ആണ് ഇത്.

30ആം മിനുട്ടിൽ ലിൻഡ മിടാലോ നേടിയ ഗോളിൽ ദക്ഷിണാഫ്രിക്ക ലീഡ് എടുത്തു. രണ്ടാം പകുതിയിൽ 66ആം മിനുട്ടിൽ തെംബി ഗറ്റ്ലാണ ദക്ഷിണാഫ്രിക്കയുടെ ലീഡ് ഇരട്ടിയാക്കി. 2-0. ഈ ലീഡ് 74ആം മിനുട്ട് വരെ തുടർന്നു. 74ആം മിനുട്ടിൽ സോഫിയ ബർൺ ഒരു ഗോൾ നേടി അർജന്റീനയെ കളിയിലേക്ക് തിരികെ കൊണ്ടുവന്നു. 79ആം മിനുട്ടിൽ റൊമിന നുനസ് സമനില ഗോളും നേടി.

ഇനി ഗ്രൂപ്പിലെ അവസാന മത്സരത്തിൽ അർജന്റീന സ്വീഡനെയും ദക്ഷിണാഫ്രിക്ക ഇറ്റലിയെയും നേരിടും.

വനിതാ ഫുട്ബോൾ ലോകകപ്പിൽ ജപ്പാൻ പ്രക്വാർട്ടർ ഏതാണ്ട് ഉറപ്പിച്ചു‌. ഇന്ന് നടന്ന ഗ്രൂപ്പിലെ രണ്ടാം മത്സരത്തിലും ജപ്പാൻ വിജയിച്ചതോടെയാണ് പ്രീക്വാർട്ടറിൽ എത്തുന്നതിന് അടുത്ത് എത്തിയത്‌. ഇന്ന് കോസ്റ്റാറിക്കയെ നേരിട്ട ജപ്പാൻ എതിരില്ലാത്ത രണ്ടു ഗോളുകളുടെ വിജയം സ്വന്തമാക്കി. ആദ്യ പകുതിയിൽ ആണ് ജപ്പാന്റെ രണ്ട് ഗോളുകളും വന്നത്.

25ആം മിനുട്ടിൽ ഹികാറോ നവൊമൊതോയുടെ സ്ട്രൈക്കിൽ ജപ്പാൻ ലീഡ് എടുത്തു. ആ ഗോൾ പിറന്ന് രണ്ട് മിനുട്ടിനകം അവീബ ഫുജിനോയുടെ ഗോൾ ലീഡ് ഇരട്ടിയാക്കി‌. രണ്ട് ഗോളും ഒരുക്കിയത് മിന തനാക ആയിരുന്നു. ജപ്പാൻ നിരവധി അവസരങ്ങൾ സൃഷ്ടിച്ചു എങ്കിലും കൂടുതൽ ഗോൾ നേടാൻ അവർക്ക് ഇന്ന് ആയില്ല. ആദ്യ മത്സരത്തിൽ ജപ്പാൻ 5 ഗോളുകൾക്ക് സാംബിയയെ തോൽപ്പിച്ചിരുന്നു‌.

സ്പെയിൻ ഇന്ന് സാംബിയയോട് തോൽക്കാതിരുന്നാൽ ജപ്പാന്റെ പ്രീക്വാർട്ടർ പ്രവേശനം ഔദ്യോഗികമാകും. ഗ്രൂപ്പിലെ അവസാന മത്സരത്തിൽ സ്പെയിൻ ആയിരിക്കും ജപ്പാന്റെ എതിരാളികൾ.

വനിതാ ഫുട്ബോൾ ലോകകപ്പിൽ ബ്രസീലിന് വിജയ തുടക്കം. ഇന്ന് ഗ്രൂപ്പിലെ ആദ്യ മത്സരത്തിൽ പനാമയെ നേരിട്ട ബ്രസീൽ എതിരില്ലാത്ത നാലു ഗോളുകളുടെ വിജയമാണ് നേടിയത്. ആരി ബോർജസ് നേടിയ ഹാട്രിക്ക് ആണ് ബ്രസീലിന്റെ വിജയത്തിന് കരുത്തായത്. 23കാരിയായ ആരി ബോർജസിന് ഇത് ആദ്യ ലോകകപ്പ് ആണ്. 19ആം മിനുട്ടിൽ ഗോൾ നേടിയ ആരി കണ്ണീരോടെ ആണ് ആദ്യ ഗോൾ ആഘോഷിച്ചത്. പിന്നാലെ 39ആം മിനുട്ടിൽ അവൾ തന്നെ ലീഡ് ഇരട്ടിയാക്കി.

രണ്ടാം പകുതിയുടെ തുടക്കത്തിൽ സെനരിറ്റോ ജാവോയുടെ ഫിനിഷിൽ ബ്രസീൽ ലീഡ് 3-0 ആക്കി ഉയർത്തി. ഈ ഗോൾ ഒരുക്കിയതും ആരി ബോർജസ് ആയിരുന്നു. മത്സരത്തിന്റെ 70ആം മിനുട്ടിൽ ആരി ഹാട്രിക്ക് പൂർത്തിയാക്കി. ഈ ലോകകപ്പിലെ ആദ്യ ഹാട്രിക്കാണിത്.

ബ്രസീൽ ഈ വിജയത്തോടെ ഗ്രൂപ്പ് എഫിൽ ഒന്നാമത് എത്തി. ഇനി ഫ്രാൻസും ജമൈക്കയും ആണ് ഗ്രൂപ്പിൽ ബ്രസീലിന് മുന്നിൽ ഉള്ള എതിരാളികൾ.

വനിതാ ഫുട്ബോൾ ലോകകപ്പിൽ വൻ വിജയത്തോടെ ജർമ്മനി. ഇന്ന് മൊറോക്കോയെ നേരിട്ട ജർമ്മനി എതിരില്ലാത്ത ആറ് ഗോൾകളുടെ വിജയമാണ് സ്വന്തമാക്കിയത്. അലക്സാന്ദ്ര പോപ്പ് ഇരട്ട ഗോളുകൾ നേടി തുടക്കത്തിൽ തന്നെ മൊറോക്കൊ പ്രതിരോധത്തെ തകർത്തു. മൊറോക്കോയുടെ വനിതാ ലോകകപ്പ് ചരിത്രത്തിലെ ആദ്യ മത്സരമായിരുന്നു ഇത്. ഈ ലോകകപ്പിൽ ഇതുവരെയുള്ള ഏറ്റവും വലിയ മാർജിൻ വിജയമാണ് ജർമ്മനി ഇന്ന് നേടിയത്.

13ആം മിനുട്ടിലും 39ആം മിനുട്ടിലുമായിരുന്നു പോപിന്റെ ഗോളുകൾ. രണ്ടാം പകുതിയുടെ തുടക്കത്തിൽ ക്ലാര ബുഹൽ ലീഡ് മൂന്ന് ആക്കി ഉയർത്തി. 54ആം മിനുട്ടിൽ ജർമ്മനിക്ക് അനുകൂലമായി ഒരു സെൽഫ് ഗോളും വന്നു. സ്കോർ 4-0. 79ആം മിനുട്ടിൽ വീണ്ടും ഒരു സെൽഫ് ഗോൾ. സ്കോർ 5-0.

മത്സരത്തിന്റെ 90ആം മിനുട്ടിൽ ലിയ ഷുളറും ഗോൾ നേടി. ജർമ്മനിക്കായി ഷുളറിന്റെ 37ആം ഗോളായിരുന്നു ഇത്. ഗ്രൂപ്പ് എച്ചിൽ കൊറിയയും കൊളംബിയയും ആണ് ഇനി ജർമ്മനിയുടെ എതിരാളികൾ.

വനിതാ ഫുട്ബോൾ ലോകകപ്പിൽ ഗ്രൂപ്പ് ജിയിൽ നടന്ന പോരാട്ടത്തിൽ ഇറ്റലി അർജന്റീനയെ തോൽപ്പിച്ചു. മത്സരം അവസാനിക്കാൻ മൂന്ന് മിനുട്ട് മാത്രം ശേഷിക്കെ പിറന്ന ഗോളിന്റെ മികവിൽ 1-0ന്റെ വിജയമാണ് ഇറ്റലി സ്വന്തമാക്കിയത്. സബ്ബായി എത്തിയ ക്രിസ്റ്റ്യാന ജിറേലിയുടെ ഹെഡർ ആണ് വിജയ ഗോളായി മാറിയത്. 84ആം മിനുട്ടിൽ സബ്ബായി എത്തിയ ജിറേലി 87ആം മിനുട്ടിൽ ഇടതു വിങ്ങിൽ നിന്ന് വന്ന ക്രോസ് ഹെഡ് ചെയ്ത് വലയിൽ എത്തിക്കുക ആയിരുന്നു.

താരത്തിന്റെ ഇറ്റലിക്കായുള്ള 54ആം ഗോളാണിത്. നേരത്തെ ആദ്യ പകുതിയിൽ ഇറ്റലി നിരവധി അവസരങ്ങൾ സൃഷ്ടിക്കുകയും രണ്ട് തവണ വലകുലുക്കുകയും ചെയ്തു. രണ്ട് തവണയും വാർ പരിശോധനയിൽ ഗോൾ നിഷേധിക്കപ്പെട്ടു. ലോക റാങ്കിംഗിൽ 28ആം സ്ഥാനത്തുള്ള അർജന്റീന താരതമ്യേനെ മെച്ചപ്പെട്ട പ്രകടനമാണ് ഇറ്റലിക്ക് എതിരെ നടത്തിയത്.

ഈ പരാജയം അർജന്റീനയുടെ നോക്കൗട്ട് പ്രതീക്ഷകൾക്ക് വലിയ തിരിച്ചടിയാണ്. ഇനി സ്വീഡനും ദക്ഷിണാഫ്രിക്കയും ആണ് ഗ്രൂപ്പിൽ അർജന്റീനക്ക് മുന്നിൽ ഉള്ളത്.