Tag: switzerland

ഇന്നലെ ഖത്തർ ലോകകപ്പിൽ അവസാന ഗ്രൂപ്പ് മത്സരത്തിൽ സെർബിയക്ക് എതിരായ മത്സര വിജയം സ്വിസ് ടീമിന് അവസാന പതിനാറിൽ ഇടം നേടി നൽകിയിരുന്നു. എന്നാൽ മത്സരത്തെ പതിവിൽ കൂടുതൽ ചൂട് പിടിപ്പിച്ചത് അൽബാനിയൻ, കൊസോവൻ വേരുകൾ ഉള്ള സ്വിസ് താരങ്ങൾ ആയ ഗ്രാനിറ്റ് ശാക്ക, ഷഖീരി എന്നിവരുടെ സാന്നിധ്യം ആയിരുന്നു. ലോകത്തിലെ തന്നെ ഏറ്റവും വലിയ ശത്രുത ഇന്നും നിലനിൽക്കുന്ന രാജ്യങ്ങളും ജനവിഭാഗങ്ങളും ആണ് സെർബിയയും അൽബാനിയയും കൊസോവയും. ചെറുപ്പത്തിൽ സെർബിയൻ ക്രൂരതകൾക്കും വേട്ടയാടലുകൾക്കും ശേഷം കുടുംബവും ആയി നാട് വിട്ടു ഓടേണ്ടി വന്ന ചരിത്രം ഉള്ളവർ ആണ് ഇരു താരങ്ങളും. കഴിഞ്ഞ ലോകകപ്പിൽ സെർബിയക്ക് എതിരെ ഗോൾ നേടിയ ശേഷം അൽബാനിയൻ ദേശീയ ചിഹ്നം ആയ കഴുകന്റെ ചിഹ്നം കാണിച്ചതിന് രണ്ടു താരങ്ങൾക്കും എതിരെ ഫിഫ നടപടി എടുത്തിരുന്നു.

ഇന്നലെ ആവട്ടെ ഷഖീരി ഗോൾ നേടിയപ്പോൾ ശാക്ക സെർബിയൻ താരങ്ങളെ പ്രഖ്യാപിച്ചും അവർക്ക് മേൽ ആധിപത്യം നേടിയും മധ്യനിരയിൽ മത്സരം നിയന്ത്രിച്ചു. കളിയിലെ താരവും ആഴ്‌സണൽ മധ്യനിര താരം ആയിരുന്നു. എന്നാൽ മത്സര ശേഷം ശാക്ക അണിഞ്ഞ ജെഴ്‌സി ആണ് നിലവിൽ വിവാദം ആയത്. അൽബാനിയൻ/കൊസോവൻ വേരുകൾ ഉള്ള സ്വിസ് ടീമിലെ മറ്റൊരു അംഗം ‘അർദോൻ ജഷരി’ യുടെ ‘ജഷരി’ എന്നു എഴുതിയ ജെഴ്‌സി തിരിച്ചു അണിഞ്ഞാണ് ശാക്ക ജയം ആഘോഷിച്ചത്. എന്നാൽ സഹതാരത്തിന്റെ പേരിനു അപ്പുറം അൽബാനിയൻ/കൊസോവൻ ദേശീയതകൾക്ക് വളരെ പ്രധാനപ്പെട്ട പേര് ആണ് ജഷരി എന്നത്. കൊസോവയുടെ സ്വാതന്ത്ര്യത്തിന് ആയി അൽബാനിയൻ/കൊസോവൻ വംശജരാൽ രൂപീകരിച്ച കൊസോവ ലിബറേഷൻ ആർമിയുടെ സ്ഥാപകരിൽ ഒരാൾ ആയ ‘ആദം ജഷരി’യെ തന്നെയാണ് ശാക്ക ഈ പ്രവർത്തിയുടെ ഓർമ്മിപ്പിച്ചത്.

അന്നത്തെ യൂഗോസ്ലാവിയയിൽ സെർബിയൻ ഭരണകൂടത്തിന് എതിരെ ആയുധം എടുത്തു പോരാടിയ അദ്ദേഹത്തിനെയും ഭാര്യയെയും കുട്ടിയെയും അടക്കം 57 പേർ അടങ്ങുന്ന കുടുംബത്തെ സെർബിയൻ ഭരണകൂടം കൊലപ്പെടുത്തിയത് കൊസോവക്ക് ഇന്നും പൊറുക്കാൻ ആവാത്ത തെറ്റ് ആണ്. 2008 ൽ കൊസോവ സ്വാതന്ത്ര്യം നേടിയ ശേഷം ‘ആദം ജഷരി’യെ അവർ തങ്ങളുടെ ഹീറോ ആയി പ്രഖ്യാപിച്ചു. നിലവിൽ കൊസോവയിൽ ഫുട്‌ബോൾ സ്റ്റേഡിയം, തിയേറ്റർ, വിമാന താവളം തുടങ്ങി പലതിനും അദ്ദേഹത്തിന്റെ പേര് ഉണ്ട്. സ്റ്റേഡിയത്തിൽ കഴുകൻ ചിഹ്നം കാണിച്ച ആരാധകനെ അധികൃതർ നീക്കം ചെയ്‌തെങ്കിലും മത്സര ശേഷം കഴുകൻ ചിഹ്നം പ്രദർശിപ്പിച്ച് ആയിരുന്നു ശാക്കയും ഷഖീരിയും ജയം ആഘോഷിച്ചത്. കൊസോവ കൂട്ടക്കൊല ഓർമ്മിപ്പിച്ച് ആയിരുന്നു സെർബിയൻ ആരാധകർ ഇന്നലെ ചാന്റ്‌ ചെയ്തത് എന്ന ആരോപണവും നിലവിൽ ഉണ്ട്. നിലവിൽ രാഷ്ട്രീയ സന്ദേശങ്ങൾ ലോകകപ്പിൽ പ്രദർശിപ്പിക്കാൻ പാടില്ല എന്ന നിയമം ഉള്ളപ്പോൾ ശാക്കക്ക് എതിരെ നടപടി വേണം എന്നാണ് സെർബിയൻ പക്ഷം.

ഗ്രൂപ്പ് ഘട്ടത്തിലെ അവസാന മത്സരത്തിൽ ആവേശകരമായ പോരാട്ടത്തിന് ഒടുവിൽ സ്വിറ്റ്സർലാന്റ് വിജയം കണ്ടെത്തി. സെർബിയയെ രണ്ടിനെതിരെ മൂന്ന് ഗോളുകൾക്ക് ആണ് സ്വിറ്റ്സർലാന്റ് പരാജയപ്പെടുത്തിയത്. ഈ വിജയം അവരുടെ പ്രീക്വാർട്ടർ യോഗ്യതയും ഉറപ്പിച്ചു.

ഇന്ന് സ്വിറ്റ്സർലാന്റും സെർബിയയും തമ്മിലുള്ള മത്സരം ഇരു ടീമുകൾക്കും ഒരുപോലെ നിർണായകമായിരുന്നു. അതുകൊണ്ട് തന്നെ അതിന്റെ എല്ലാ ആവേശവും ആ മത്സരത്തിന് ഉണ്ടായിരുന്നു. കളി ആരംഭിച്ച് 20ആം മിനുട്ടിൽ വെറ്ററൻ താരം ഷഖീരിയിലൂടെ സ്വിസ് പട ലീഡ് എടുത്തു. ഇബ്രഹിമ സോയുടെ പാസ് സ്വീകരിച്ചായിരുന്നു ഷഖീരിയുടെ ഫിനിഷ്.

ഈ ഗോളിനോട് നല്ല രീതിയിൽ ആണ് സെർബിയ പ്രതികരിച്ചത്‌. 6 മിനുട്ടുകൾക്ക് അകം സമനില ഗോൾ വന്നു. ടാഡിചിന്റെ ക്രോസിൽ നിന്ന് ഒരു മിട്രോവിച് ഹെഡർ. സ്കോർ 1-1. സെർബിയ അറ്റാക്ക് തുടർന്നു. 35ആം മിനുട്ടിൽ അവർ ലീഡും എടുത്തു. യുവന്റസ് സ്ട്രൈക്കർ വ്ലാഹോവിചിലൂടെ ആയിരിന്നു സെർബിയയുടെ രണ്ടാം ഗോൾ. സ്കോ 2-1. ഇതോടെ തൽക്കാലം ആയെങ്കിലും സെർബിയ ഗ്രൂപ്പിൽ രണ്ടാം സ്ഥാനത്തേക്ക് എത്തി.

ആ ആശ്വാസം അധികം നീണ്ടു നിന്നില്ല. ആദ്യ പകുതി അവസാനിക്കും മുമ്പ് തന്നെ സ്വിസ് പട സമനില കണ്ടെത്തി. വിദ്മറിന്റെ പാസ് സ്വീകരിച്ച് എംബോളോ ആയിരുന്നു ഈ ഗോൾ നേടിയത്‌. ആദ്യ പകുതി 2-2.

രണ്ടാം പകുതിയുടെ തുടക്കത്തിൽ തന്നെ സ്വിസ് പട ലീഡിലും എത്തി. 48ആം മിനുട്ടിൽ ഫ്രൂയിലരിന്റെ ഫിനിഷ് ആണ് സ്വിറ്റ്സർലാന്റിൽ 3-2ന് മുന്നിൽ എത്തിച്ചത്. ഈ വിജയത്തോടെ സ്വിറ്റ്സർലാന്റ് 6 പോയിന്റുമായി ഗ്രൂപ്പ് ഘട്ടം രണ്ടാം സ്ഥാനത്ത് അവസാനിപ്പിച്ചു. അവർ പോർച്ചുഗലിനെ ആകും പ്രീക്വാർട്ടറിൽ നേരിടുക.

ഖത്തർ ലോകകപ്പിൽ കാമറൂണിന് എതിരെ ഗോൾ നേടിയ ശേഷം അത് ആഘോഷിക്കാതെ സ്വിസ് മുന്നേറ്റനിര താരം ബ്രീൽ എംബോളോ. 1997 ൽ കാമറൂണിൽ ജനിച്ച എമ്പോള അഞ്ചാം വയസ്സിൽ ഫ്രാൻസിലേക്ക് കുടിയേറുക ആയിരുന്നു. തുടർന്ന് അമ്മ സ്വിസ് പൗരനെ കല്യാണം കഴിച്ചതോടെ താരം സ്വിസർലാന്റിലേക്ക് കുടുംബത്തിന് ഒപ്പം കുടിയേറി. ഇപ്പോഴും എമ്പോളയുടെ പിതാവ് കാമറൂണിൽ ആണ് ജീവിക്കുന്നത്.

ബേസൽ യൂത്ത് ടീമുകളിൽ കളിച്ചു തുടങ്ങിയ എമ്പോളക്ക് 2014 ൽ ആണ് സ്വിസ് പൗരത്വം ലഭിച്ചത്. യൂത്ത് തലത്തിൽ വിവിധ സ്വിസ് ടീമുകളിൽ കളിച്ച എമ്പോള 2015 ൽ സീനിയർ ടീമിൽ അരങ്ങേറ്റം കുറിച്ചു. 2016 യൂറോ കപ്പ്, 2020 യൂറോ കപ്പ്, 2018 ലോകകപ്പ് എന്നിവയിൽ കളിച്ച താരം കഴിഞ്ഞ ലോകകപ്പിൽ പോർച്ചുഗലിനു എതിരായ ജയത്തിൽ ഗോൾ നേടിയിരുന്നു. ഇത്തവണ രണ്ടാം പകുതി തുടങ്ങിയ ഉടൻ ഷഖീരിയുടെ പാസിൽ നിന്നു ഗോൾ നേടിയ എമ്പോള ജനിച്ച നാടിനോടുള്ള ആദരവ് കാരണം ഗോൾ ആഘോഷം വേണ്ടെന്ന് വക്കുക ആയിരുന്നു.