വിന്‍ഡീസിനെതിരെ രണ്ടാം ടി20യില്‍ ഇന്ത്യയ്ക്ക് പരാജയം. ഇന്ന് തിരുവനന്തപുരം സ്പോര്‍ട്സ് ഹബ്ബില്‍ നടന്ന മത്സരത്തില്‍ വിന്‍ഡീസ് 8 വിക്കറ്റിന്റെ ആധികാരിക വിജയമാണ് നേടിയത്. ആദ്യം ബാറ്റ് ചെയ്ത ഇന്ത്യ 7 വിക്കറ്റ് നഷ്ടത്തില്‍ 170 റണ്‍സ് നേടിയപ്പോള്‍ 18.3 ഓവറില്‍ ഇന്ത്യയുടെ ലക്ഷ്യം വിന്‍ഡീസ് മറികടന്നു.
അര്‍ദ്ധ ശതകം നേടിയ ലെന്‍ഡല്‍ സിമ്മണ്‍സിനൊപ്പം എവിന്‍ ലൂയിസ്(40), ഷിമ്രണ്‍ ഹെറ്റ്മ്യര്‍(23), നിക്കോളസ് പൂരന്‍(38*) എന്നിവരാണ് വിന്‍ഡീസ് വിജയം എളുപ്പത്തിലാക്കിയത്. 45 പന്തില്‍ നിന്ന് 67 റണ്‍സ് നേടിയ ലെന്‍ഡല്‍ സിമ്മണ്‍സ് ആണ് മത്സരത്തില്‍ വിന്‍ഡീസിന് മേല്‍ക്കൈ നേടിക്കൊടുത്തത്.
18 പന്തില്‍ നിന്ന് 38 റണ്‍സുമായി പുറത്താകാതെ നിന്ന നിക്കോളസ് പൂരനുമായി ചേര്‍ന്ന് സിമ്മണ്‍സ് 29 പന്തില്‍ നിന്ന് 61 റണ്‍സിന്റെ മികച്ച അപരാജിത കൂട്ടുകെട്ടാണ് മൂന്നാം വിക്കറ്റില്‍ നേടിയത്.
