ഇന്ത്യയ്ക്കെതിരാളികള്‍ ശ്രീലങ്ക, ഗ്രൂപ്പ് ബി ജേതാക്കളായ ബംഗ്ലാദേശിന് എതിരാളികള്‍ അഫ്ഗാനിസ്ഥാന്‍

അണ്ടര്‍ 19 ഏഷ്യ കപ്പ് സെമി ഫൈനല്‍ ലൈനപ്പ് ആയി. ഗ്രൂപ്പ് എ ഒന്നാം സ്ഥാനക്കാരായ ഇന്ത്യ ശ്രീലങ്കയെ സെമിയില്‍ നേരിടുമ്പോള്‍ ഗ്രൂപ്പ് ബി ഒന്നാം സ്ഥാനക്കാരായ ബംഗ്ലാദേശ് അഫ്ഗാനിസ്ഥാനെ നേരിടും. ഇന്ന് നടന്ന മത്സരത്തില്‍ ശ്രീലങ്കയെ 42 റണ്‍സിന് പരാജയപ്പെടുത്തിയാണ് ബംഗ്ലാദേശ് ഗ്രൂപ്പ് ബിയിലെ ജേതാക്കളായത്. ആദ്യം ബാറ്റ് ചെയ്ത ബംഗ്ലാദേശ് 273/7 എന്ന സ്കോര്‍ നേടിയപ്പോള്‍ ശ്രീലങ്ക 231 റണ്‍സിന് 47.4 ഓവറില്‍ ഓള്‍ഔട്ട് ആയി.

ബംഗ്ലാദേശിനായി മഹമ്മദുള്‍ ഹസന്‍ ജോയ് 126 റണ്‍സ് നേടി ടോപ് സ്കോറര്‍ ആയപ്പോള്‍ മുഹമ്മദ് തൗഹിദ് ഹൃദോയ് 50 റണ്‍സുമായി രണ്ടാമത്തെ പ്രധാന സ്കോറര്‍ ആയി. ശ്രീലങ്കയ്ക്കായി ദില്‍ഷന്‍ മധുഷനക മൂന്നും ആഷിയാന്‍ ഡാനിയേല്‍ രണ്ടും വിക്കറ്റ് നേടി. ശ്രീലങ്കയ്ക്കായി ഒട്ടനവധി താരങ്ങള്‍ക്ക് മികച്ച തുടക്കം ലഭിച്ചുവെങ്കിലും അത് തുടരാനാകാതെ പോയത് ടീമിനെ രണ്ടാം സ്ഥാനത്തേക്ക് പിന്തള്ളി.

42 റണ്‍സ് നേടി റോഷന്‍ സഞ്ജയ സില്‍വ ടീമിന്റെ ടോപ് സ്കോറര്‍ ആയപ്പോള്‍ നിപുന്‍ ധനന്‍ജയ(36), അഹാന്‍ വിക്രമസിംഗേ(33), കമില്‍ മിശ്ര(33) എന്നിവരാണ് റണ്‍സ് കണ്ടെത്തിയ മറ്റ് പ്രധാന താരങ്ങള്‍. ബംഗ്ലാദേശ് നിരയില്‍ റാക്കിബുള്‍ ഹസന്‍ മൂന്നും മുഹമ്മദ് ഷൊറിഫുള്‍ ഇസ്ലാം, മുഹമ്മദ് ആഷ്റഫുള്‍ ഇസ്ലാം സിയാം എന്നിവര്‍ രണ്ട് വീതം വിക്കറ്റും നേടി.