കോമൺവെൽത്ത് സ്കൂൾസ് ചെസ് ചാമ്പ്യൻഷിപ്പ്; അഞ്ച് സ്വർണ്ണവും ഒരു വെങ്കലവുമായി അഭിമാനമായി കൊച്ചുമിടുക്കി ആരാധ്യ

മലേഷ്യയിൽ നടന്ന ഒന്നാമത് കോമൺവെൽത്ത് സ്കൂൾസ് ചെസ് ചാമ്പ്യൻഷിപ്പിൽ മിന്നുന്ന പ്രകടനവുമായി കേരളത്തിന്റെ അഭിമാനമായി മാറിയിരിക്കുകയാണ് കണ്ണൂർ സ്വദേശിയായ ആരാധ്യ കൊമ്മേരി രജനീഷ്. അണ്ടർ-7 ഗേൾസ് വിഭാഗത്തിൽ മത്സരിച്ച ആരാധ്യ അഞ്ച് സ്വർണ്ണമെഡലുകളും ഒരു വെങ്കല മെഡലും രണ്ട് ട്രോഫികളും സ്വന്തമാക്കിയാണ് രാജ്യത്തിന്റെ ശ്രദ്ധ പിടിച്ചുപറ്റിയത്.

റാപ്പിഡ്, ബ്ലിറ്റ്സ്, സ്റ്റാൻഡേർഡ് എന്നീ മൂന്ന് ഇനങ്ങളിലും വ്യക്തിഗത മെഡൽ നേട്ടം കൈവരിച്ചതാണ് ആരാധ്യയുടെ ഈ ചരിത്രനേട്ടത്തിന്റെ പ്രത്യേകത. റാപ്പിഡ് ചെസ് ചാമ്പ്യൻഷിപ്പിൽ വ്യക്തിഗത സ്വർണ്ണമെഡലും ടീം സ്വർണ്ണമെഡലും സ്വന്തമാക്കിയ ആരാധ്യ, ബ്ലിറ്റ്സ് ചെസ് ചാമ്പ്യൻഷിപ്പിലും വ്യക്തിഗത ചാമ്പ്യൻപട്ടവും ടീം സ്വർണ്ണമെഡലും ആവർത്തിച്ചു. തുടർന്ന് സ്റ്റാൻഡേർഡ് ചെസ് ചാമ്പ്യൻഷിപ്പിൽ വ്യക്തിഗത വിഭാഗത്തിൽ വെങ്കല മെഡലും ടീം വിഭാഗത്തിൽ സ്വർണ്ണമെഡലും നേടിയാണ് താരം തന്റെ ആറ് മെഡലുകൾ പൂർത്തിയാക്കിയത്.

ഇന്ത്യ ഓവറോൾ ചാമ്പ്യൻഷിപ്പ് ട്രോഫി സ്വന്തമാക്കിയ ചാമ്പ്യൻഷിപ്പിൽ രാജ്യത്തിന് അഭിമാനകരമായ നേട്ടമാണ് ഈ കൊച്ചുമിടുക്കി സമ്മാനിച്ചത്. സഹോദരൻ ആദേഷിന്റെ കളി കണ്ടാണ് ആരാധ്യ ചെസ്സിനോട് താല്പര്യം വളർത്തിയെടുത്തത്. മാതാപിതാക്കളുടെ പിന്തുണയും പരിശീലകരുടെ മാർഗനിർദേശവും ഈ വലിയ വിജയത്തിന് പിന്നിൽ വലിയ കരുത്തായി മാറി. ചെറുപ്രായത്തിൽ തന്നെ അന്താരാഷ്ട്ര വേദിയിൽ രാജ്യത്തിന്റെ പേര് വാനോളം ഉയർത്തിയ ആരാധ്യയുടെ ഈ വിജയം കേരളത്തിനും ഏറെ അഭിമാനകരമാണ്.