ഐപിഎൽ എലിമിനേറ്റർ; രാജസ്ഥാന് മുന്നിൽ ഹൈദരബാദ് തീർന്നു!

മുള്ളൻപൂരിൽ നടന്ന ആവേശകരമായ ഐപിഎൽ 2026 എലിമിനേറ്റർ പോരാട്ടത്തിൽ സൺറൈസേഴ്‌സ് ഹൈദരാബാദിനെ 47 റൺസിന് പരാജയപ്പെടുത്തി രാജസ്ഥാൻ റോയൽസ് മുന്നേറി. മഹാരാജ യാദവീന്ദ്ര സിംഗ് സ്റ്റേഡിയത്തിൽ നടന്ന മത്സരത്തിൽ രാജസ്ഥാൻ ഉയർത്തിയ 244 റൺസ് എന്ന കൂറ്റൻ വിജയലക്ഷ്യം പിന്തുടർന്ന ഹൈദരാബാദിന് 19.2 ഓവറിൽ 196 റൺസെടുക്കുന്നതിനിടെ എല്ലാ വിക്കറ്റുകളും നഷ്ടമായി. വെറും 29 പന്തിൽ നിന്ന് 12 സിക്സറുകളടക്കം 97 റൺസ് അടിച്ചുകൂട്ടിയ വൈഭവ് സൂര്യവംശിയുടെ ബാറ്റിംഗ് പ്രകടനമാണ് രാജസ്ഥാന് കരുത്തായത്.

ടോസ് നഷ്ടപ്പെട്ട് ബാറ്റിംഗിനിറങ്ങിയ രാജസ്ഥാൻ, സൂര്യവംശിയെ കൂടാതെ 21 പന്തിൽ 50 റൺസ് നേടിയ ധ്രുവ് ജൂറലിന്റെയും 12 പന്തിൽ 26 റൺസ് നേടിയ ക്യാപ്റ്റൻ റിയാൻ പരാഗിന്റെയും മികവിലാണ് നിശ്ചിത ഓവറിൽ 243 റൺസ് എന്ന വലിയ സ്കോർ പടുത്തുയർത്തിയത്. പവർപ്ലേ ഓവറുകളിൽ മാത്രം 80 റൺസ് നേടിയ രാജസ്ഥാൻ തുടക്കം മുതൽ തന്നെ മത്സരത്തിൽ ആധിപത്യം സ്ഥാപിച്ചിരുന്നു.

മറുപടി ബാറ്റിംഗിനിറങ്ങിയ ഹൈദരാബാദിന്റെ തുടക്കം തന്നെ തകർച്ചയോടെയായിരുന്നു. ഓപ്പണർ അഭിഷേക് ശർമ്മ നേരിട്ട ആദ്യ പന്തിൽ തന്നെ പുറത്തായി. ഇഷാൻ കിഷൻ 11 പന്തിൽ 33 റൺസും നിതീഷ് കുമാർ റെഡി 20 പന്തിൽ 38 റൺസും നേടി പൊരുതിയെങ്കിലും മറ്റ് ബാറ്റിംഗ് നിരക്കാർക്ക് തിളങ്ങാനായില്ല. ഹെൻറിച്ച് ക്ലാസൻ 18 റൺസിനും ട്രാവിസ് ഹെഡ് 17 റൺസിനും പുറത്തായതോടെ ഹൈദരാബാദിന്റെ നില പരുങ്ങലിലായി.

രാജസ്ഥാന് വേണ്ടി ബൗളിംഗിൽ ജോഫ്ര ആർച്ചർ മൂന്ന് വിക്കറ്റുകൾ വീഴ്ത്തി മികച്ച പ്രകടനം പുറത്തെടുത്തു. ആർച്ചറെ കൂടാതെ നന്ദ്രെ ബർഗർ, രവീന്ദ്ര ജഡേജ, സുശാന്ത് മിശ്ര എന്നിവർ രണ്ട് വിക്കറ്റുകൾ വീതവും യാഷ് രാജ് പുഞ്ച ഒരു വിക്കറ്റും നേടി. അച്ചടക്കമില്ലാത്ത ബൗളിംഗിലൂടെ ഹൈദരാബാദ് 15 വൈഡുകൾ ഉൾപ്പെടെ 16 എക്സ്ട്രാ റൺസ് വഴങ്ങിയതും അവർക്ക് തിരിച്ചടിയായി. ഈ വിജയത്തോടെ രാജസ്ഥാൻ റോയൽസ് ക്വാളിഫയർ 2വിലേക്ക് യോഗ്യത നേടി. ഇനി അവർ ഗുജറാത്തിനെ നേരിടും.