ഫോർമുല വൺ ബ്രസീലിയൻ ഗ്രാന്റ് പ്രീയിൽ റെഡ് ബുൾ ഡ്രൈവർമാർ തമ്മിലുള്ള ഭിന്നത പരസ്യമായി. ഇതിനകം തന്നെ ലോക ചാമ്പ്യൻ ആയ മാക്സ് വെർസ്റ്റാപ്പനെ സംബന്ധിച്ച് ഈ റേസ് തീർത്തും അപ്രസക്തമായിരുന്നു. നിർമാതാക്കളുടെ വിഭാഗത്തിൽ റെഡ് ബുൾ കിരീടം ഉറപ്പിച്ചതിനാൽ റെഡ് ബുള്ളിനും റേസ് അപ്രസക്തമായിരുന്നു. അതിനാൽ തന്നെ നിലവിൽ രണ്ടാം സ്ഥാനത്ത് എത്താൻ റെഡ് ബുള്ളിന്റെ രണ്ടാം ഡ്രൈവർ സെർജിയോ പെരസ് എന്ന ചെക്കോക്ക് ഈ റേസ് പ്രധാനപ്പെട്ടത് ആയിരുന്നു. അതിനാൽ തന്നെ റേസിൽ ആറാം സ്ഥാനത്ത് ഉണ്ടായിരുന്ന വെർസ്റ്റാപ്പനോട് റെഡ് ബുൾ അതിനാൽ തന്നെ തൊട്ടു പിറകിലുള്ള സെർജിയോ പെരസിനെ മുന്നോട്ട് കയറാൻ ആവശ്യപ്പെട്ടു. എന്നാൽ എല്ലാവരെയും ഞെട്ടിച്ച വെർസ്റ്റാപ്പൻ ടീം നിർദേശം അവഗണിക്കുക ആയിരുന്നു.
നമ്മൾ ഇതിനെക്കുറിച്ച് മുമ്പും പറഞ്ഞത് ആണ് ഞാൻ പെരസിനെ മുമ്പോട്ട് പോവാൻ സമ്മതിക്കില്ല എന്നായിരുന്നു ഡച്ച് ഡ്രൈവറുടെ പ്രതികരണം. അതേസമയം ഈ തീരുമാനം പെരസിനെ അറിയിച്ചപ്പോൾ വെർസ്റ്റാപ്പന്റെ ശരിയായ മുഖം ഇപ്പോൾ കാണാൻ ആയി അത് എല്ലാവരും അറിയട്ടെ എന്നായിരുന്നു മെക്സിക്കൻ ഡ്രൈവറുടെ പ്രതികരണം. നിലവിൽ രണ്ടാം സ്ഥാനത്തിന് ആയി സെർജിയോ പെരസും ഫെറാറിയുടെ ചാൾസ് ലേക്ലെർക്കും ഇനിയുള്ള അവസാന റേസിൽ പോര് മുറുകും. വെർസ്റ്റാപ്പൻ സമാന പ്രവർത്തി തുടർന്നാൽ പെരസിന് രണ്ടാം സ്ഥാനം ആവും നഷ്ടമാവുക. റെഡ് ബുള്ളിനു വലിയ തിരിച്ചടിയാണ് ഈ റേസ് കാരണം ഉണ്ടായത്. തനിക്ക് പ്രത്യേകിച്ച് ലാഭം ഒന്നും ഇല്ലായിരുന്നു എന്നിട്ടു കൂടി തന്റെ സഹ ഡ്രൈവറോട് വെർസ്റ്റാപ്പൻ കാണിച്ച പ്രവർത്തിക്കു എതിരെ റെഡ് ബുൾ, വെർസ്റ്റാപ്പൻ ആരാധകരിൽ നിന്നു പോലും വലിയ വിമർശനം ആണ് നേരിടുന്നത്.
എല്ലാവരോടും റേസിന് അകത്തും പുറത്തും നല്ല പെരുമാറ്റവും സൗഹൃദവും കാത്ത് സൂക്ഷിക്കുന്ന സെർജിയോ പെരസ് ഈ സീസണിലും വെർസ്റ്റാപ്പൻ കിരീടം നേടിയ കഴിഞ്ഞ സീസണിലും പല രീതിയിൽ വെർസ്റ്റാപ്പനെ സഹായിച്ചിരുന്നു. കഴിഞ്ഞ സീസണിൽ പലപ്പോഴും വെർസ്റ്റാപ്പന്റെ കിരീടപോരാട്ടത്തിലെ മുഖ്യ എതിരാളി ഹാമിൾട്ടനെ പ്രതിരോധിച്ച പെരസ് ആയിരുന്നു വെർസ്റ്റാപ്പനു ലോക കിരീടം നേടാൻ പ്രധാനപങ്ക് വഹിച്ചത്. ഫ്രാൻസിലും തുർക്കിയിലും അബുദാബിയിലും ബാകുവിലും എല്ലാം പെരസ് ഹാമിൾട്ടനെ തടഞ്ഞത് ആണ് ഡച്ച് ഡ്രൈവർക്ക് തുണയായത്. അതിനാൽ തന്നെ തീർത്തും അപ്രധാനമായ റേസിൽ വെർസ്റ്റാപ്പന്റെ പ്രവർത്തി എല്ലാവരിലും ഡച്ച് ഡ്രൈവറിലുള്ള പ്രീതി കുറച്ചിട്ടുണ്ട്. റെഡ് ബുൾ ടീമിൽ ഇരുവരും തമ്മിലുള്ള ഭിന്നത അടുത്ത സീസണിൽ അടക്കം എങ്ങനെ ടീമിന്റെ പ്രകടനത്തെ ബാധിക്കും എന്നു കണ്ടു തന്നെ അറിയാം.
