Category: Formula One

സ്വിസ് ടീമായ ആൽഫ റോമിയോ 2023 ലെ ഫോർമുല-1 സീസണിനായി ഗ്വാന്യൂവിനെ നിലനിർത്തുമെന്ന് ഔദ്യോഗികമായി പ്രഖ്യാപിച്ചു. 2022 ലെ അതേ ടീമുമായാണ് 2023-ലും ആൽഫ റോമിയോ രംഗത്തിറങ്ങുക. വാൽട്ടേരി ബോട്ടാസിന് ഇതിനകം തന്നെ ഒന്നിലധികം വർഷത്തേക്കുള്ള കരാർ അവർ നൽകി കഴിഞ്ഞു. 2022-ൽ ഫോർമുല-2 ൽ നിന്ന് ഉയർന്നു വന്നപ്പോൾ, അന്നത്തെ ഫോർമുല 2 വിജയി ഓസ്‌കാർ പിയാസ്‌ത്രിക്ക് സീറ്റ് ലഭിക്കാത്തതിനാൽ പലരും ഗ്വാന്യൂവിനെ വിമർശിചിരുന്നു. പോയിന്റ് സ്‌കോർ ചെയ്‌തിട്ടും നിരവധി പ്രശ്‌നങ്ങൾ കാറിന്റെ ഭാഗത്ത് നിന്ന് ഗ്വാന്യൂവിന് നേരിടേണ്ടി വന്നിട്ടുണ്ട്. എന്നിരുന്നാലും, ഇതുവരെ താരതമ്യേന മികച്ച സീസൺ ഉള്ളതിനാൽ, താരം ചൈനീസ് റേസർ ആരാധകർക്കിടയിൽ പ്രിയങ്കരനാണ്.

ഫോർമുല 1 -ൽ മത്സരിക്കുന്ന ആദ്യത്തെ ചൈനീസ് വംശജൻ എന്ന ഖ്യാതിയോടു കൂടി അരങ്ങേറിയ ഗ്വാന്യൂവിനെ പക്ഷെ ആരാധകർ ഓർത്തിരിക്കുക ബ്രിട്ടീഷ് ഗ്രാൻപ്രിയിലെ അപകടത്തിലൂടെ ആകും.
എന്നും ആ മത്സരം ഗ്വാന്യൂവിനും ആരാധകർക്കും മറക്കാനാവാത്ത ഒന്നായിരിക്കും. അത്ഭുതകരമായി ആ അപകടത്തിൽ നിന്ന് രക്ഷപ്പെട്ട് പിന്നീടുള്ള മത്സരങ്ങളിൽ മികച്ച പ്രകടനം നടത്താനും ഗ്വാന്യൂവിന് കഴിഞ്ഞു.

“മറ്റൊരു സീസണിൽ ടീമിന്റെ ഭാഗമാകാനുള്ള അവസരം തന്നതിൽ ഞാൻ ആൽഫ റോമിയോ ടീമിനോട് നന്ദി രേഖപെടുത്തുന്നു. ഫോർമുല വണ്ണിൽ എത്തുക എന്നത് ഒരു സ്വപ്ന സാക്ഷാത്കാരമായിരുന്നു, ആദ്യമായി മത്സരിച്ച ആ നിമിഷം എന്നോടൊപ്പം എന്നേക്കും നിലനിൽക്കും. ടീം അവിശ്വസനീയമായവിധം പിന്തുണയ്ക്കുകയും ആദ്യ ദിവസം മുതൽ എന്നെ സ്വാഗതം ചെയ്യുകയും ടീമുമായി പൊരുത്തപ്പെടാൻ എന്നെ സഹായിക്കുകയും ചെയ്തിരുന്നു” എന്ന് ഗ്വാന്യൂ തന്റെ കരാർ പ്രഖ്യാപനത്തിന് ശേഷം പറഞ്ഞു.

2022 ഫോർമുല 1 സീസണിന്റെ അവസാനത്തിൽ കനേഡിയൻ താരമായ നിക്കോളാസ് ലത്തീഫി ടീമിൽ നിന്ന് പുറത്തുപോകുമെന്ന് വില്യംസ് റേസിംഗ് പ്രഖ്യാപിച്ചു. അലക്സാണ്ടർ ആൽബണിന്റെ കരാർ വർഷത്തിന്റെ തുടക്കത്തിൽ നീട്ടിയതിന് ശേഷം 2022 ഫോർമുല 1 സീസണിനപ്പുറം ലത്തീഫിക്ക് വില്യംസിൽ തുടരാൻ സാധ്യതയില്ലെന്ന് ഊഹാപോഹങ്ങൾ ഉണ്ടായിരുന്നു. 50-ലധികം ഗ്രാൻഡ് പ്രികളിൽ മത്സരിച്ച ലത്തീഫി , ഇതുവരെ ആകെ ഏഴ് പോയിന്റുകളാണ് തന്റെ 3 വർഷത്തെ കാലയളവിൽ നേടിയിട്ടുള്ളത്. ഈ വർഷം ടീമിനു വേണ്ടി ഒരു പോയിന്റുപോലും നേടാൻ ലത്തീഫിക്ക് കഴിഞ്ഞിട്ടുമില്ല.

“കഴിഞ്ഞ മൂന്ന് വർഷമായി വില്യംസ് റേസിംഗിലെ എല്ലാവർക്കും – ഫാക്ടറിയിലെ എല്ലാ ആളുകളോടും ട്രാക്ക്സൈഡിൽ ജോലി ചെയ്യുന്നവരോടും – നന്ദി പറയാൻ ഞാൻ ഈ അവസരം വിനിയോഗിക്കുന്നു. കഴിഞ്ഞ വർഷം ഹംഗറിയിൽ ആദ്യ പോയിന്റുകൾ നേടിയത് എനിക്ക് ഒരിക്കലും മറക്കാനാവാത്ത ഒരു നിമിഷമായിരുന്നു, ഈ ടീമിനൊപ്പമുള്ള കാലയളിവിലെ ഓർമ്മകളുമായി ഞാൻ എന്റെ കരിയറിന്റെ അടുത്ത അധ്യായത്തിലേക്ക് കടക്കും. സീസണിന്റെ അവസാനം വരെ ഞങ്ങൾ എല്ലാ ശ്രമങ്ങളും തുടർന്നുകൊണ്ടേ ഇരിക്കും.” എന്ന് ലത്തീഫി പറഞ്ഞു.

മക്‌ലാരൻ വിടുന്ന ഡാനിയൽ റിക്കിയാർഡോയ്‌ക്കൊപ്പം നിക്ക് ഡി വ്രീസ്, ലോഗൻ സാർജന്റ്, മിക്ക് ഷൂമാക്കർ എന്നിവരുടെ പേരുകളാണ് അടുത്ത വർഷം വില്യംസിൽ ലത്തീഫിക്ക് പകരം മത്സരിക്കാൻ സാധ്യത ഉള്ളവരുടെ പട്ടികയിലുള്ളത്. പകരക്കാരന്റെ പ്രഖ്യാപനം ഉടൻ തന്നെ ഉണ്ടായേക്കും.

മോൻസയിൽ നടക്കുന്ന ഇറ്റാലിയൻ ഗ്രാന്റ് പ്രീയിൽ, നിക്ക് ഡി വ്രീസിന്റെ ഫോർമുല വൺ അരങ്ങേറ്റം വില്യംസ് സ്ഥിരീകരിച്ചു. അപ്പെൻഡിസൈറ്റിസ് ബാധിച്ച അലക്സാണ്ടർ ആൽബോണിന് പകരക്കാരൻ ആയാണ് ഡി വ്രീസ് ഫോർമുല വൺ അരങ്ങേറുന്നത്. ആൽബണിനെ അപ്പെൻഡിസൈറ്റിസ് ചികിത്സയ്ക്കായി ആശുപത്രിയിലേക്ക് കൊണ്ടുപോയി. അതിന്റെ ഫലമായി, ആൽബോണിനെ ഡോക്ടർമാർ മോൺസയിൽ മത്സരിക്കാൻ അനുവദിച്ചില്ല. അതുകൊണ്ട് തന്നെ മെഴ്‌സിഡസ് റിസർവ് ഡ്രൈവർ ഡി വ്രീസിനെ പകരം കൊണ്ടുവരാൻ വില്യംസ് റേസിംഗ് നിർബന്ധിതരായി.

ഫോർമുല വൺ സ്‌പാനിഷ് ഗ്രാന്റ് പ്രീയിൽ 2022-ലെ തന്റെ ആദ്യത്തെ എഫ്‌പി 1(ഫ്രീ പ്രാക്ടീസ്) ഡ്രൈവ് ചെയ്യുവാൻ ഡച്ചുകാരനായ ഡി വ്രീസ് ഉണ്ടായിരുന്നു. അതിനുശേഷം, ഫ്രഞ്ച് ജിപിയിൽ മെഴ്‌സിഡസിനൊപ്പവും നടന്നുകൊണ്ടിരിക്കുന്ന ഇറ്റാലിയൻ ജിപിയിൽ ആസ്റ്റൺ മാർട്ടിനുമൊപ്പവും അദ്ദേഹം എഫ്‌പി 1-ൽ പങ്കെടുക്കുകയുണ്ടായി. ഫോർമുല ഇ ചാമ്പ്യനായ ഡി വ്രീസ്, ഒടുവിൽ മോൻസയിൽ തന്റെ ദീർഘകാലമായി കാത്തിരുന്ന ഫോർമുല വൺ അരങ്ങേറ്റം നടത്തും.

വൈകിട്ട് ഇന്ത്യൻ സമയം 6.30ന് നെതർലൻഡ്സിലെ സാൻഡ്വൂർട്ട് സർക്യൂട്ടിൽ പച്ച വെളിച്ചം തെളിയുമ്പോൾ ഏറ്റവും സന്തോഷിക്കുക റെഡ്ബുൾ കാറിലിരിക്കുന്ന മാക്‌സ് വെസ്റ്റാപ്പൻ ആകും. ഇന്നലെ ക്വാളിഫയിങ് റേസിൽ വിജയിച്ചു, ഇന്നത്തെ റേസിൽ പോൾ പൊസിഷൻ നേടിയത് കൊണ്ടു മാത്രമായിരിക്കില്ല ആ സന്തോഷം. തന്റെ സ്വന്തം രാജ്യത്ത് മത്സരിച്ചു ഇക്കൊല്ലത്തെ ചാമ്പ്യൻഷിപ്പ് അരക്കിട്ടുറപ്പിക്കാൻ കിട്ടുന്ന അവസരമാണ് എന്നത് കൊണ്ടാകും. ഇതിന് തയ്യാറായി, ഗാലറികളെ ഓറഞ്ചണിയിക്കാൻ കാണികളും പ്രതീക്ഷയോടെയെത്തും എന്ന കാര്യത്തിൽ സംശയമില്ല.

വെറും .02 സെക്കണ്ടുകളുടെ വ്യത്യാസത്തിനാണ് പോൾ പൊസിഷൻ ലെച്ലെറെക്കിൽ നേടിയതെങ്കിലും, തങ്ങളുടെ ചാമ്പ്യൻ ഡ്രൈവറുടെ മേൽ റെഡ്ബുൾ ടീമിന് തികഞ്ഞ വിശ്വാസമാണ്. പോരാത്തതിന് പോൾ പൊസിഷനിൽ അഞ്ചാം സ്ഥാനത്തു തങ്ങളുടെ രണ്ടാമത്തെ ഡ്രൈവറും സ്ഥാനം പിടിച്ചതിൽ അവർക്ക് ആഹ്ലാദമുണ്ട്. ഇക്കൊല്ലത്തെ ടീം ചാമ്പ്യൻഷിപ്പ് ഉറപ്പിക്കാൻ സാധിക്കും എന്ന വിശ്വാസത്തിൽ തന്നെയാണ് റെഡ്ബുൾ.

1952ൽ ആദ്യമായി ഗ്രാൻഡ്‌പ്രി നടന്ന സാൻഡ്വൂർട്ട് സർ്‌ക്യൂട്ടിൽ റേസുകൾക്കു ഒരു നീണ്ട ഇടവേള വന്നു. 36 വർഷങ്ങൾക്ക് ശേഷം കഴിഞ്ഞ കൊല്ലമാണ് വീണ്ടും f1 തിരിച്ചു അങ്ങോട്ടെത്തിയത്

4.259കിമി ദൈർഘ്യമുള്ള ഈ ട്രാക്കിൽ 77 ലാപ്പാണ് ഓടിയെത്തേണ്ടതു.

വളരെ വേഗതയേറിയത്, ഓൾഡ് സ്‌കൂൾ, തികച്ചും ഭ്രാന്തമായ എന്നൊക്കെ ഡ്രൈവർമാർ വിശേഷിപ്പിക്കുന്ന ഈ സർക്യൂട്ടിൽ കഴിഞ്ഞ കൊല്ലം മേഴ്‌സിഡിസിൽ ലൂയി ഹാമിൽടൻ നേടിയ 1:11.097 ന്റെ ലാപ് റെക്കോർഡ് ഇത്തവണ ആരെങ്കിലും മറികടക്കുമോ എന്നു കാത്തിരിക്കുകയാണ് f1 ആരാധകർ. മണ്കൂനകൾക്ക് ഇടയിലൂടെ ഇന്ന് കാറുകൾ ചീറി പായുമ്പോൾ, മത്സരം പൊടിപാറും എന്നു ഉറപ്പാണ്.

ചെറുതെങ്കിലും, ഫോർമുല വൺ ഭാഷയിൽ ഒരു നീണ്ട വേനൽക്കാല ഇടവേളക്ക് ശേഷം ലോകത്തെ വേഗത കൂടിയ കാറുകളും, അവയുടെ ഡ്രൈവർമാരും വീണ്ടും ഒരു F1 സർക്യൂട്ടിലേക്ക് തിരികെ വരുന്നു. ബെൽജിയം ഗ്രാൻഡ് പ്രിയിൽ പങ്കെടുക്കാൻ ടീമുകൾ നേരത്തെ എത്തിക്കഴിഞ്ഞു. ഇന്ന് ട്രാക്കിൽ പ്രാക്റ്റീസ് സെഷന് ഡ്രൈവർമാർ ഇറങ്ങി. ഓഗസ്റ്റ് 28, ഞായറാഴ്ചയാണ് റേസ്.

ഒരു പാട് ചരിത്രമുള്ള ട്രക്കാണ് സ്പാ-ഫ്രാങ്കോർഷാംപ്സ്‌ ട്രാക്ക്. 1921ൽ ഉണ്ടാക്കിയ ഈ ട്രാക്കിൽ ആദ്യ വര്ഷം ഒരു കാർ മാത്രം പങ്കെടുക്കാൻ എത്തിയത് കൊണ്ട് റേസ് ഉപേക്ഷിക്കേണ്ടി വന്നു. അന്ന് ട്രാക്കിന് 14 കിലോമീറ്റർ നീളം ഉണ്ടായിരിന്നു. പിന്നീട് F1 റേസുകൾക്കായി ഉപയോഗിച്ച് തുടങ്ങിയ ശേഷം പലതവണ മാറ്റങ്ങൾ വരുത്തി ട്രാക്കിൻ്റെ നീളം 1979ൽ 7കിമി ആയി കുറയ്ക്കുകയാണ് ചെയ്തത്. ആദ്യകാലത്തു ട്രാക്കിൻ്റെ ഏറ്റവും താഴ്ന്ന ഭാഗവും ഉയർന്ന ഭാഗവും തമ്മിൽ 100 മീറ്ററിലേറെ ഉയര വ്യത്യാസമുണ്ടായിരുന്നു. അടുത്തുള്ള പട്ടണത്തിലെ നിരത്തുകളും ട്രാക്കിൻ്റെ ഭാഗമായിരുന്നു. അപകടകരമായ ട്രാക്ക് എന്ന് കുര്സിടി നേടിയ ട്രാക്കായി മാറി സ്പാ. 1969ൽ ട്രാക്കിലെ വളവുകൾ അപകടകാരിയാണ് എന്ന് പറഞ്ഞു ഡ്രൈവർമാർ റേസിൽ നിന്ന് മാറി നിന്ന സാഹചര്യം വരെ ഉണ്ടായി.

1950ൽ ഇവിടെ തുടങ്ങിയ F1 ഗ്രാൻഡ്‌പ്രിയുടെ ഇപ്പോഴത്തെ ദൂരം 308.052കിമി, അത് ഓടി തീർക്കുവാൻ 44 ലാപ്പുകൾ എന്നിങ്ങനെയാണ് കണക്ക്. ദീർഘമായ സ്ട്രെയിറ്റ് ട്രാക്കും,വെല്ലുവിളി നിറഞ്ഞ വേഗതയേറിയ വളവുകളും ഇടചേർന്ന സ്പാ ഇന്ന് ഇത് ഡ്രൈവർമാരുടെ ഇഷ്ടപ്പെട്ട ട്രാക്കുകളിൽ ഒന്നാണ്. പക്ഷെ സർക്യൂട്ട് സ്ഥിതി ചെയ്യുന്ന പ്രദേശത്തിന്റെ പ്രത്യേകത കാരണം ചിലപ്പോൾ ട്രാക്കിൻ്റെ ഒരു ഭാഗം തീർത്തും വരണ്ടിരിക്കുമ്പോൾ മറ്റൊരു ഭാഗത്തു മഴ തകർക്കുന്നുണ്ടാകും. ഇത് ഡ്രൈവർമാരെ സംബന്ധിച്ച് വലിയൊരു പരീക്ഷണം തന്നെയാണ്.

2021ലെ ബെൽജിയം ഗ്രാൻഡ് പ്രിയാണ് ചരിത്രത്തിലെ ഏറ്റവും ചെറിയ റേസായി ഇന്ന് അറിയപ്പെടുന്നത്. കഴിഞ്ഞ വര്ഷം പ്രതികൂല കാലാവസ്ഥ കാരണം 3 ലാപ്പുകൾക്ക് ശേഷം റേസ് നിറുത്തി വയ്‌ക്കേണ്ടി വന്നു. അന്ന് ഡ്രൈവർമാർക്ക് നൽകിയ പോയിന്റുകളെ ചൊല്ലി വളരെ അധികം പ്രതിഷേധമുയരുകയും, ചെറുതാക്കപ്പെടുന്ന റേസുകൾക്ക് നൽകേണ്ട പോയിന്റുകളെ സംബന്ധിച്ചു പുതിയ നിയമങ്ങൾ എഴുതി ചേർക്കപ്പെടുകയും ചെയ്തു.

7കിമി ദൈർഘ്യമുള്ള സ്പാ-ഫ്രാങ്കോർഷാംപ്സ്‌ സർക്യൂട്ടിൽ വേഗതയുടെ രാജാക്കന്മാർ ഇറങ്ങുമ്പോൾ, ലോകം ഉറ്റു നോക്കുക റെഡ്ബുൾ കാറുകളെയാകും. വർഷത്തിൻ്റെ ആദ്യ പകുതിയിൽ നേടിയ മുൻകൈ വെസ്റ്റപ്പനും, പെരെസിനും നിലനിറുത്താൻ സാധിക്കുമോ? മെഴ്‌സിഡിസ് വണ്ടിയിൽ ലൂയി ഹാമിൽട്ടൺ തിരികെ മുന്നിലെത്തുമോ? വൈകുന്നേരങ്ങളിൽ നമ്മുടെ വീടുകളിൽ മുഴങ്ങുന്ന പോലെ, അറിയാൻ കാത്തിരിക്കുക, ഞായറാഴ്ച വൈകുന്നേരം 7.30 വരെ!

ഫോർമുല വണ്ണിൽ ചലനം സൃഷ്ടിക്കാൻ ജർമ്മൻ വമ്പന്മാരായ ഓഡി.

2026 മുതൽ ഫോർമുല വണ്ണിന്റെ ഭാഗം ആവാൻ ജർമ്മൻ കാർ നിർമാതാക്കളായ ഓഡി. നിലവിൽ 2026 മുതൽ പവർ യൂണിറ്റ് നിർമാതാക്കളായി തങ്ങൾ ഉണ്ടാവും എന്നു ഓഡി ചെയർമാൻ അറിയിച്ചു. ലെ മാൻസ്, ഡി.ടി.എം, ഫോർമുല ഇയിൽ ഒക്കെ തിളങ്ങാൻ ആയ തങ്ങൾക്ക് ഫോർമുല വണ്ണിലും തിളങ്ങാൻ ആവും എന്ന പ്രതീക്ഷയാണ് ഓഡി ചെയർമാൻ പങ്ക് വച്ചത്.

നിലവിൽ സ്വന്തം ടീം ഇറക്കുമോ അല്ല എഞ്ചിൻ മാത്രം നൽകുക ആണോ തങ്ങൾ ചെയ്യുക എന്ന കാര്യത്തിൽ ഓഡി വ്യക്തത വരുത്തിയിട്ടില്ല. സ്വന്തം ടീം ഉണ്ടോ എന്നതിനെ കുറിച്ച് വരും ദിനങ്ങളിൽ ആവും ഓഡി നിലപാട് വ്യക്തമാക്കുക. നിലവിൽ ആൽഫ റോമെയോ നടത്തുന്ന സ്വിസ് കമ്പനി സോബർ ടീമിനെ ആവും ഓഡി ഏറ്റെടുക്കുക. ഓഡിയുടെ പ്രഖ്യാപനത്തിനു പിന്നാലെ 2023 ൽ തങ്ങൾ സോബറും ആയുള്ള ബന്ധം അവസാനിപ്പിക്കുന്നത് ആയി ആൽഫ റോമെയോയും പ്രഖ്യാപിച്ചു.

ഓഡിയുടെ തീരുമാനത്തെ ചരിത്രപരം എന്നാണ് ഫോർമുല വൺ അധികൃതർ വിളിച്ചത്. പുതിയ നിയമങ്ങളും പരിഷ്‌കാരങ്ങൾക്കും ഒപ്പം ഓഡിയുടെ സാങ്കേതിക മികവ് ഫോർമുല വണ്ണിൽ ചലനങ്ങൾ സൃഷ്ടിക്കുമോ എന്നു കാത്തിരുന്നു കാണാം. അതേസമയം 2026 ൽ റെഡ് ബുള്ളിന് എഞ്ചിൻ പ്രധാനം ചെയ്തു പോർഷെയും ഫോർമുല വണ്ണിൽ അരങ്ങേറ്റം നടത്തും എന്ന സ്ഥിരീകരിക്കാത്ത റിപ്പോർട്ടുകളും പുറത്ത് വരുന്നുണ്ട്. ആവേശകരമായ ഭാവി തന്നെയാണ് ഫോർമുല വണ്ണിനെ കാത്തിരിക്കുന്നത് എന്നുറപ്പാണ്.

Story Highlight : Audi to enter Formula One from 2026 season.