Author: rashimc

2023 ഫോർമുല 1 സീസൺ മുതൽ നടത്തേണ്ട സ്പ്രിന്റ് റേസുകളുടെ എണ്ണം വർധിപ്പിക്കുന്നതിന് അംഗീകാരം ലഭിച്ചു. ഇതോടെ സ്പ്രിന്റ് റേസുകളുടെ എണ്ണം മൂന്നിൽ നിന്ന് ആറായി വർദ്ധിക്കും. സ്പ്രിന്റ് സെഷനുകൾ 2021ലാണ് ഫോർമുല 1-ൽ ആദ്യമായി അവതരിപ്പിച്ചത്. യോഗ്യതാ റൗണ്ട് വെള്ളിയാഴ്ചയിലേക്ക് മാറ്റുകയും ഞായറാഴ്ചത്തെ ഗ്രാൻഡ് പ്രിക്കായി ഗ്രിഡ് സജ്ജീകരിക്കുന്നതിന് ശനിയാഴ്ചയിലേക്ക് 100 കിലോമീറ്റർ ദൈര്‍ഘ്യമുള്ള സ്പ്രിന്റ് റേസ് അവതരിപ്പിക്കുകയുമാണ് ഫോർമുല 1 ചെയ്തത്.

2021-ൽ ആദ്യമായി ബ്രിട്ടണും ബ്രസീലും ഇറ്റലിയിലെ മോൺസയുമായിരുന്നു വേദികൾ. എന്നാൽ 2022-ൽ ബ്രസീലിൽ വേദി നിലനിർത്തിയപ്പോൾ പുതുതായി ഓസ്ട്രിയയിലെ റെഡ്ബുൾ റിങ്ങും ഇറ്റലിയിലെ ഇമോളായും വേദികളായി പ്രഖ്യാപിച്ചു. 2023 മുതൽ ഉള്ള വേദികളുടെ പ്രഖ്യാപനം ഉടൻ ഉണ്ടായേക്കും.

സ്വിസ് ടീമായ ആൽഫ റോമിയോ 2023 ലെ ഫോർമുല-1 സീസണിനായി ഗ്വാന്യൂവിനെ നിലനിർത്തുമെന്ന് ഔദ്യോഗികമായി പ്രഖ്യാപിച്ചു. 2022 ലെ അതേ ടീമുമായാണ് 2023-ലും ആൽഫ റോമിയോ രംഗത്തിറങ്ങുക. വാൽട്ടേരി ബോട്ടാസിന് ഇതിനകം തന്നെ ഒന്നിലധികം വർഷത്തേക്കുള്ള കരാർ അവർ നൽകി കഴിഞ്ഞു. 2022-ൽ ഫോർമുല-2 ൽ നിന്ന് ഉയർന്നു വന്നപ്പോൾ, അന്നത്തെ ഫോർമുല 2 വിജയി ഓസ്‌കാർ പിയാസ്‌ത്രിക്ക് സീറ്റ് ലഭിക്കാത്തതിനാൽ പലരും ഗ്വാന്യൂവിനെ വിമർശിചിരുന്നു. പോയിന്റ് സ്‌കോർ ചെയ്‌തിട്ടും നിരവധി പ്രശ്‌നങ്ങൾ കാറിന്റെ ഭാഗത്ത് നിന്ന് ഗ്വാന്യൂവിന് നേരിടേണ്ടി വന്നിട്ടുണ്ട്. എന്നിരുന്നാലും, ഇതുവരെ താരതമ്യേന മികച്ച സീസൺ ഉള്ളതിനാൽ, താരം ചൈനീസ് റേസർ ആരാധകർക്കിടയിൽ പ്രിയങ്കരനാണ്.

ഫോർമുല 1 -ൽ മത്സരിക്കുന്ന ആദ്യത്തെ ചൈനീസ് വംശജൻ എന്ന ഖ്യാതിയോടു കൂടി അരങ്ങേറിയ ഗ്വാന്യൂവിനെ പക്ഷെ ആരാധകർ ഓർത്തിരിക്കുക ബ്രിട്ടീഷ് ഗ്രാൻപ്രിയിലെ അപകടത്തിലൂടെ ആകും.
എന്നും ആ മത്സരം ഗ്വാന്യൂവിനും ആരാധകർക്കും മറക്കാനാവാത്ത ഒന്നായിരിക്കും. അത്ഭുതകരമായി ആ അപകടത്തിൽ നിന്ന് രക്ഷപ്പെട്ട് പിന്നീടുള്ള മത്സരങ്ങളിൽ മികച്ച പ്രകടനം നടത്താനും ഗ്വാന്യൂവിന് കഴിഞ്ഞു.

“മറ്റൊരു സീസണിൽ ടീമിന്റെ ഭാഗമാകാനുള്ള അവസരം തന്നതിൽ ഞാൻ ആൽഫ റോമിയോ ടീമിനോട് നന്ദി രേഖപെടുത്തുന്നു. ഫോർമുല വണ്ണിൽ എത്തുക എന്നത് ഒരു സ്വപ്ന സാക്ഷാത്കാരമായിരുന്നു, ആദ്യമായി മത്സരിച്ച ആ നിമിഷം എന്നോടൊപ്പം എന്നേക്കും നിലനിൽക്കും. ടീം അവിശ്വസനീയമായവിധം പിന്തുണയ്ക്കുകയും ആദ്യ ദിവസം മുതൽ എന്നെ സ്വാഗതം ചെയ്യുകയും ടീമുമായി പൊരുത്തപ്പെടാൻ എന്നെ സഹായിക്കുകയും ചെയ്തിരുന്നു” എന്ന് ഗ്വാന്യൂ തന്റെ കരാർ പ്രഖ്യാപനത്തിന് ശേഷം പറഞ്ഞു.

2022 ഫോർമുല 1 സീസണിന്റെ അവസാനത്തിൽ കനേഡിയൻ താരമായ നിക്കോളാസ് ലത്തീഫി ടീമിൽ നിന്ന് പുറത്തുപോകുമെന്ന് വില്യംസ് റേസിംഗ് പ്രഖ്യാപിച്ചു. അലക്സാണ്ടർ ആൽബണിന്റെ കരാർ വർഷത്തിന്റെ തുടക്കത്തിൽ നീട്ടിയതിന് ശേഷം 2022 ഫോർമുല 1 സീസണിനപ്പുറം ലത്തീഫിക്ക് വില്യംസിൽ തുടരാൻ സാധ്യതയില്ലെന്ന് ഊഹാപോഹങ്ങൾ ഉണ്ടായിരുന്നു. 50-ലധികം ഗ്രാൻഡ് പ്രികളിൽ മത്സരിച്ച ലത്തീഫി , ഇതുവരെ ആകെ ഏഴ് പോയിന്റുകളാണ് തന്റെ 3 വർഷത്തെ കാലയളവിൽ നേടിയിട്ടുള്ളത്. ഈ വർഷം ടീമിനു വേണ്ടി ഒരു പോയിന്റുപോലും നേടാൻ ലത്തീഫിക്ക് കഴിഞ്ഞിട്ടുമില്ല.

“കഴിഞ്ഞ മൂന്ന് വർഷമായി വില്യംസ് റേസിംഗിലെ എല്ലാവർക്കും – ഫാക്ടറിയിലെ എല്ലാ ആളുകളോടും ട്രാക്ക്സൈഡിൽ ജോലി ചെയ്യുന്നവരോടും – നന്ദി പറയാൻ ഞാൻ ഈ അവസരം വിനിയോഗിക്കുന്നു. കഴിഞ്ഞ വർഷം ഹംഗറിയിൽ ആദ്യ പോയിന്റുകൾ നേടിയത് എനിക്ക് ഒരിക്കലും മറക്കാനാവാത്ത ഒരു നിമിഷമായിരുന്നു, ഈ ടീമിനൊപ്പമുള്ള കാലയളിവിലെ ഓർമ്മകളുമായി ഞാൻ എന്റെ കരിയറിന്റെ അടുത്ത അധ്യായത്തിലേക്ക് കടക്കും. സീസണിന്റെ അവസാനം വരെ ഞങ്ങൾ എല്ലാ ശ്രമങ്ങളും തുടർന്നുകൊണ്ടേ ഇരിക്കും.” എന്ന് ലത്തീഫി പറഞ്ഞു.

മക്‌ലാരൻ വിടുന്ന ഡാനിയൽ റിക്കിയാർഡോയ്‌ക്കൊപ്പം നിക്ക് ഡി വ്രീസ്, ലോഗൻ സാർജന്റ്, മിക്ക് ഷൂമാക്കർ എന്നിവരുടെ പേരുകളാണ് അടുത്ത വർഷം വില്യംസിൽ ലത്തീഫിക്ക് പകരം മത്സരിക്കാൻ സാധ്യത ഉള്ളവരുടെ പട്ടികയിലുള്ളത്. പകരക്കാരന്റെ പ്രഖ്യാപനം ഉടൻ തന്നെ ഉണ്ടായേക്കും.

മോൻസയിൽ നടക്കുന്ന ഇറ്റാലിയൻ ഗ്രാന്റ് പ്രീയിൽ, നിക്ക് ഡി വ്രീസിന്റെ ഫോർമുല വൺ അരങ്ങേറ്റം വില്യംസ് സ്ഥിരീകരിച്ചു. അപ്പെൻഡിസൈറ്റിസ് ബാധിച്ച അലക്സാണ്ടർ ആൽബോണിന് പകരക്കാരൻ ആയാണ് ഡി വ്രീസ് ഫോർമുല വൺ അരങ്ങേറുന്നത്. ആൽബണിനെ അപ്പെൻഡിസൈറ്റിസ് ചികിത്സയ്ക്കായി ആശുപത്രിയിലേക്ക് കൊണ്ടുപോയി. അതിന്റെ ഫലമായി, ആൽബോണിനെ ഡോക്ടർമാർ മോൺസയിൽ മത്സരിക്കാൻ അനുവദിച്ചില്ല. അതുകൊണ്ട് തന്നെ മെഴ്‌സിഡസ് റിസർവ് ഡ്രൈവർ ഡി വ്രീസിനെ പകരം കൊണ്ടുവരാൻ വില്യംസ് റേസിംഗ് നിർബന്ധിതരായി.

ഫോർമുല വൺ സ്‌പാനിഷ് ഗ്രാന്റ് പ്രീയിൽ 2022-ലെ തന്റെ ആദ്യത്തെ എഫ്‌പി 1(ഫ്രീ പ്രാക്ടീസ്) ഡ്രൈവ് ചെയ്യുവാൻ ഡച്ചുകാരനായ ഡി വ്രീസ് ഉണ്ടായിരുന്നു. അതിനുശേഷം, ഫ്രഞ്ച് ജിപിയിൽ മെഴ്‌സിഡസിനൊപ്പവും നടന്നുകൊണ്ടിരിക്കുന്ന ഇറ്റാലിയൻ ജിപിയിൽ ആസ്റ്റൺ മാർട്ടിനുമൊപ്പവും അദ്ദേഹം എഫ്‌പി 1-ൽ പങ്കെടുക്കുകയുണ്ടായി. ഫോർമുല ഇ ചാമ്പ്യനായ ഡി വ്രീസ്, ഒടുവിൽ മോൻസയിൽ തന്റെ ദീർഘകാലമായി കാത്തിരുന്ന ഫോർമുല വൺ അരങ്ങേറ്റം നടത്തും.

ഫോർമുല വണ്ണിൽ രണ്ടാം പകുതിയിൽ തങ്ങളുടെ ശൈലി മാറ്റേണ്ട കാര്യമില്ലെന്ന് വ്യക്തമാക്കി ഫെറാറി ഉടമ ബിനോട്ടോ. വളരെ ശക്തമായ രീതിയിലായിരുന്നു ഫെറാറി ഈ സീസൺ ആരംഭിച്ചത്. ബഹ്‌റൈനിൽ വെച്ചു നടന്ന ആദ്യ മത്സരത്തിൽ തന്നെ പോൾ പൊസിഷനും വിജയവും കൂടെ വേഗമേറിയ ലാപ്പും നേടാൻ ഫെറാറിയുടെ ചാൾസ് ലെക്ലെർക്കിന് സാധിച്ചു. പിന്നീട് നിരവധി തവണ എൻജിൻ തകരാറ് സംഭവിക്കുകയും,തന്ത്രങ്ങളിലെ പിഴവുകളും,അപകടം സംഭവിച്ചതിൽ നിന്നും അവർക്ക് നഷ്ടമായത് അവരുടെ ആധിപത്യമാണ്. ഈ അവസരം മുതലെടുത്ത് റെഡ്ബുൾ മുന്നേറുകയും ചെയ്തു.

എന്നാൽ സീസണിന്റെ രണ്ടാം പകുതി ആരംഭിക്കാനിരിക്കെയാണ്, തങ്ങളുടെ ശൈലിയിലോ സമീപനത്തിലോ മാറ്റം വരുത്തേണ്ടതില്ലെന്ന് ഫെറാറിയുടെ ടീം ഉടമ മാറ്റിയ ബിനോട്ടോ അവകാശപ്പെട്ടത്. ബിനോട്ടോയുടെ ചുമതലയിൽ ഇത് നാലാം തവണയാണ് ഫെറാറി മത്സരിക്കുന്നത്. മോശം തന്ത്രങ്ങളും വാഹനത്തിന്റെ തകരാറുകളും തന്റെ മേൽ സമ്മർദ്ദം ചെലുത്തിയിട്ടു പോലും, തന്റെ ടീം ശരിയായ പാതയിൽ തന്നെയാണ് എന്നാണ് ബിനോട്ടോയുടെ വിശ്വാസം. “മാറ്റേണ്ടതായി ഒന്നുമില്ല. എപ്പോഴും ആത്മവിശ്വാസം, അനുഭവം,കഴിവ് എന്നിവയിൽ ആണ് കാര്യം എന്ന് ഞാൻ കരുതുന്നു ” ബിനോട്ടോ പറഞ്ഞു.

2023 മുതൽ പുതിയ മൾട്ടി-ഇയർ ഡീലിൽ അലക്സാണ്ടർ ആൽബണിനെ ടീമിനൊപ്പം നിലനിർത്തുന്നതായി പ്രഖ്യാപിച്ചു ഫോർമുല വൺ ടീം ആയ വില്യംസ് റേസിംഗ്. ഒരു വർഷത്തെ വിട്ടു നിൽക്കലിന് ശേഷം 2022 ൽ ഫോർമുല വണ്ണിൽ വില്യംസിനു ഒപ്പം ചേർന്ന ആൽബണിനു 2023 മുതലുള്ള പുതിയ കരാർ ടീം നൽകുക ആയിരുന്നു. ഈ സീസണിൽ ഇത് വരെ വില്യംസിനൊപ്പം ആൽബൺ മികച്ച പ്രകടനമാണ് പുറത്ത് എടുത്തത്.

ഈ സീസണില്‍ തന്റെ സഹതാരം നിക്കോളാസ് ലത്തീഫിക്ക് മുമ്പേ ടീമിനായി പോയിന്റുകൾ നേടി നൽകാനും ആൽബണിനു ആയിരുന്നു. കഴിഞ്ഞ ദിവസം ആല്‍പൈന്‍ ടീം ഓസ്കാർ പിയാസ്ട്രി തങ്ങളുടെ ടീമിന് ആയി അടുത്ത വർഷം റേസ് ചെയ്യുമെന്ന് പ്രഖ്യാപിച്ചു. പിന്നീട് താൻ ആല്‍പൈന്‍ ടീമിനായി അടുത്ത വർഷം ഡ്രൈവ് ചെയ്യില്ലെന്നും അവരുടെ പ്രഖ്യാപനം തനിക്ക് അറിയില്ല എന്നും പറഞ്ഞു ഓസ്കാർ തന്നെ രംഗത്ത് എത്തിയതോടെ ആല്‍പൈനു സംഭവം നാണക്കേട് ആയിരുന്നു. ഓസ്കാറിന്റെ ഈ പ്രഖ്യാപനത്തെ പരിഹസിച്ച് ട്വീറ്റ് ചെയ്തായിരുന്നു ആൽബൺ തന്നെ വില്യംസ് നിലനിര്‍ത്തിയതിന്റെ സ്ഥിരീകരണം നടത്തിയത്.