എ സി മിലാന്റെ ലീഗിലെ ഒന്നാം സ്ഥാനം ഭീഷണിയിൽ ആയിരിക്കുകയാണ്. മിലാൻ ഇന്നലെ ലീഗിലെ കുഞ്ഞന്മാരായ സ്പെസിയയോട് ആണ് പരാജയപ്പെട്ടത്. എതിരില്ലാത്ത രണ്ടു ഗോളുകൾക്കായിരുന്നു സ്പെസിയയുടെ വിജയം. രണ്ടാം പകുതിയിൽ ആണ് സ്പെസിയ രണ്ടു ഗോളുകളും നേടിയത്‌. 57ആം മിനുട്ടിൽ മഗിയോറും, 67ആം മിനുട്ടിൽ ബാസ്റ്റോണിയുമാണ് സ്പെസിയക്ക് വേണ്ടി ഗോളുകൾ നേടിയത്‌.
ഈ പരാജയത്തോടെ മിലാന് ലീഗിൽ ഉണ്ടായിരുന്ന മുൻതൂക്കം നഷ്ടപ്പെട്ടു. ഇപ്പോഴും 49 പോയിന്റുമായി ഒന്നാമത് നിൽക്കുകയാണ് എ സി മിലാൻ. എന്നാൽ ഇന്ന് ഇന്റർ മിലാൻ വിജയിച്ചാൽ അവർ ആകും ലീഗിൽ ഒന്നാമത് നിൽക്കുക. ഇന്ററിന് 47 പോയിന്റുണ്ട്.
