മലയാളി താരം മഷൂർ ശരീഫ് ഐ എസ് എൽ ക്ലബായ നോർത്ത് ഈസ്റ്റ് യുണൈറ്റഡ് ക്ലബിൽ തുടരും. മഷൂർ നോർത്ത് ഈസ്റ്റ് യുണൈറ്റഡിൽ ഒരു വർഷത്തെ പുതിയ കരാറാണ് ഒപ്പുവെച്ചത്. ഇന്ന് ഇത് സംബന്ധിച്ച് ഔദ്യോഗിക പ്രഖ്യാപനവും വന്നു. മഷൂർ കഴിഞ്ഞ രണ്ട് സീസണിലും നോർത്ത് ഈസ്റ്റിനായി ഗംഭീര പ്രകടനം കാഴ്ചവെച്ചിരുന്നു.
രണ്ട് സീസണിലായി മഷൂർ 26 മത്സരങ്ങൾ നോർത്ത് ഈസ്റ്റിനായി കളിച്ചിട്ടുണ്ട്. താരം 2 അസിസ്റ്റും ഒരു ഗോളും നോർത്ത് ഈസ്റ്റിനായി നേടിയിട്ടുണ്ട്. ഗോളും അസിസ്റ്റുകളും കഴിഞ്ഞ സീസണിൽ ആയിരുന്നു വന്നത്‌.
താരം ഇന്ത്യക്കായും കളിച്ചിട്ടുണ്ട്. മുമ്പ് മൂന്ന് സീസണുകളിൽ ചെന്നൈ സിറ്റിക്ക് ഒപ്പം ഐലീഗിൽ കളിച്ച താരമാണ് മഷൂർ. ചെന്നൈ സിറ്റി ഐ ലീഗ് നേടിയപ്പോൾ അവരുടെ പ്രധാന താരമായിരുന്നു. മധ്യനിരക്കാരനാണെ‌ങ്കിലും മഷൂർ ഡിഫൻസിലാണ് പലപ്പോഴും നോർത്ത് ഈസ്റ്റിനായി പ്രത്യക്ഷപ്പെടുന്നത്. മലപ്പുറം കാവുങ്ങൽ സ്വദേശിയാണ്. മുമ്പ് ചെന്നൈ ലീഗിൽ ഹിന്ദുസ്ഥാൻ ഈഗിൾസിനു വേണ്ടി തിളങ്ങിയിരുന്നു. എയർ ഇന്ത്യ, പ്രയാഗ് യുണൈറ്റഡ് എന്നീ ക്ലബുകൾക്കും മഷൂർ കളിച്ചിട്ടുണ്ട്. മുൻ എം എസ് പി താരം കൂടിയാണ് മഷൂർ.
