ഡെർബിയിൽ ഗോൾരഹിത സമനില; ചെന്നൈയിൽ പോയിന്റ് പങ്കിട്ട് കേരള ബ്ലാസ്റ്റേഴ്‌സ്

ചെന്നൈ, ഒക്ടോബർ 31, 2026: 2026-27 എംജി ഇന്ത്യൻ സൂപ്പർ ലീഗ് സീസണിലെ തങ്ങളുടെ നാലാം മത്സരത്തിൽ കേരള ബ്ലാസ്റ്റേഴ്‌സ് എഫ്‌സി ചെന്നൈയിൻ എഫ്‌സിയോട് ഗോൾരഹിത സമനില വഴങ്ങി. ചെന്നൈ ജവഹർലാൽ നെഹ്‌റു സ്റ്റേഡിയത്തിൽ നടന്ന ആവേശകരമായ സതേൺ ഡെർബിയിൽ ഇരുടീമുകൾക്കും ലക്ഷ്യം കാണാനായില്ല. ആദ്യ പകുതിയിൽ തുല്യശക്തികളുടെ പോരാട്ടം കണ്ട മത്സരത്തിൽ, രണ്ടാം പകുതിയിൽ കൂടുതൽ ആക്രമണോത്സുകമായി കളിച്ച ബ്ലാസ്റ്റേഴ്‌സിന് പെനാൽറ്റി ഉൾപ്പെടെ ലീഡെടുക്കാൻ നിരവധി സുവർണ്ണാവസരങ്ങൾ ലഭിച്ചെങ്കിലും ഫിനിഷിംഗിലെ നിർഭാഗ്യം വിനയായി.

മത്സരത്തിന്റെ തുടക്കം മുതൽ ആക്രമിച്ചു കളിച്ച ബ്ലാസ്റ്റേഴ്‌സിന്റെ കൊറൗ സിംഗിന്റെ മുന്നേറ്റം തടയാൻ ചെന്നൈയിൻ പ്രതിരോധ താരം നംഗ്യാൽ ഭൂട്ടിയ ഫൗൾ ചെയ്തതോടെ തുടക്കത്തിൽത്തന്നെ റഫറി മഞ്ഞക്കാർഡ് പുറത്തെടുത്തു. 27-ാം മിനിറ്റിൽ അഡ്രിയാൻ ലൂണയും ആന്ദ്രെ ഗ്രീനും ചേർന്ന് മെനഞ്ഞ തകർപ്പൻ നീക്കത്തിനൊടുവിൽ മുഹമ്മദ് സനാന് ബോക്സിലേക്ക് ക്രോസ് നൽകാൻ അവസരമൊരുങ്ങിയെങ്കിലും ചെന്നൈയിൻ പ്രതിരോധം തട്ടിയകറ്റി.

മറുഭാഗത്ത് മദിഹ് തലാൽ, ഇർഫാൻ യദ്‌വാദ് എന്നിവരിലൂടെ ചെന്നൈയിൻ ലീഡ് നേടാൻ ശ്രമിച്ചെങ്കിലും ഗോൾവലയ്ക്ക് മുന്നിൽ അമരീന്ദർ സിംഗ് നടത്തിയ നിർണായക ഇടപെടലുകൾ രക്ഷയായി. പ്രതിരോധക്കോട്ട കാക്കുന്നതിൽ ഐബൻ ഡോഹ്ലിംഗും മികച്ച പ്രകടനം പുറത്തെടുത്തു. പ്രതിരോധത്തിന് പിന്നിലെ ഒഴിഞ്ഞ ഇടങ്ങളിലേക്ക് എത്തിയ ചെന്നൈയിന്റെ നീക്കങ്ങളെ കൃത്യമായ ഇന്റർസെപ്ഷനുകളിലൂടെ ഐബൻ നിർവീര്യമാക്കി. ആദ്യ പകുതിയിൽ ഉടനീളം ചെന്നൈയിന്റെ ഭാഗത്തുനിന്ന് കടുത്ത പ്രസ്സിംഗ് ഉണ്ടായെങ്കിലും ഇരുടീമുകൾക്കും സ്കോർ ചെയ്യാനാകാതെ ആദ്യ പകുതി അവസാനിച്ചു.

രണ്ടാം പകുതിയുടെ തുടക്കത്തിൽത്തന്നെ ഹോർമിപാമിന് പകരം സുമിത് ശർമ്മയെ ഇറക്കി ബ്ലാസ്റ്റേഴ്‌സ് മുന്നേറ്റങ്ങൾക്ക് വേഗത കൂട്ടി. വിംഗിലൂടെ നിരന്തരം കുതിച്ച ആന്ദ്രെ ഗ്രീനിന്റെ സാന്നിധ്യം ചെന്നൈയിൻ ബോക്സിൽ വലിയ സമ്മർദ്ദം സൃഷ്ടിച്ചു. ഈ ആക്രമണങ്ങൾക്കൊടുവിൽ ബ്ലാസ്റ്റേഴ്സിന് അനുകൂലമായി റഫറി പെനാൽറ്റി വിധിച്ചെങ്കിലും ക്യാപ്റ്റൻ അഡ്രിയാൻ ലൂണയ്ക്ക് അത് വലയിലെത്തിക്കാൻ സാധിച്ചില്ല. തുടർന്നും മുന്നേറ്റം നയിച്ച ആന്ദ്രെ ഗ്രീൻ വീണ്ടും ലീഡെടുക്കുന്നതിന് തൊട്ടടുത്തെത്തിയെങ്കിലും ചെന്നൈയിൻ ഗോൾകീപ്പർ മുഹമ്മദ് നവാസ് രക്ഷകനായി.

അവസാന നിമിഷം വരെ ഇരുടീമുകളും വിജയഗോളിനായി പൊരുതി. എന്നാൽ മത്സരത്തിന്റെ ഇഞ്ചുറി ടൈമിൽ ഉണ്ടായ സംഭവങ്ങളെത്തുടർന്ന് ചെന്നൈയിന്റെ ഇമ്മാനുവലിനും ബ്ലാസ്റ്റേഴ്‌സിന്റെ ആന്ദ്രെ ഗ്രീനിനും റഫറി ചുവപ്പ് കാർഡ് കാട്ടി. ഒടുവിൽ വിസിൽ മുഴങ്ങുമ്പോൾ 0-0 എന്ന നിലയിൽ ഇരുടീമുകളും ഓരോ പോയിന്റ് പങ്കിട്ടു പിരിഞ്ഞു.

ഇനി ഫിഫ അന്താരാഷ്ട്ര ഇടവേളയ്ക്ക് ശേഷമാണ് ബ്ലാസ്റ്റേഴ്‌സിന്റെ അടുത്ത മത്സരം. നവംബർ 29 ഞായറാഴ്ച ഫറ്റോർഡയിലെ പണ്ഡിറ്റ് ജവഹർലാൽ നെഹ്‌റു സ്റ്റേഡിയത്തിൽ നടക്കുന്ന എവേ പോരാട്ടത്തിൽ ബ്ലാസ്റ്റേഴ്‌സ് എഫ്‌സി ഗോവയെ നേരിടും.