സ്പെയിനെ അട്ടിമറിച്ച് മൊറൊക്കോ ക്വാർട്ടറിൽ. ലോകകപ്പ് ചരിത്രത്തിൽ ആദ്യമായാണ് മൊറോക്കോ ക്വാർട്ടറിൽ എത്തുന്നത്‌. പെനാൾട്ടി ഷൂട്ടൗട്ടിൽ ആയിരുന്നു മൊറോക്കോയുടെ വിജയം. നിശ്ചിത സമയത്ത് കളി ഗോൾ രഹിതമായതോടെ കളി പെനാൾട്ടിയിൽ എത്തിയത്. ഷൂട്ടൗട്ടിൽ 3-0നാണ് മൊറോക്കോ ജയിച്ചത്. മൂന്ന് പെനാൾട്ടിയാണ് മൊറോക്ക് കീപ്പർ ബുനോ സേവ് ചെയ്തത്.
ഇന്ന് എജുക്കേഷൻ സിറ്റി സ്റ്റേഡിയത്തിൽ സ്പെയിനിന്റെ ടിക്കി ടാക്ക് എല്ലാം മൊറോക്കോയുടെ മുന്നിൽ തകരുന്നതാണ് ആദ്യ പകുതിയിൽ കണ്ടത്‌. മൊറോക്കോയുടെ താരങ്ങൾ സ്പെയിനിന്റെ എല്ലാ നീക്കവും സമർത്ഥമായി തടയുകയും നല്ല അവസരങ്ങൾ എതിർ ഭാഗത്ത് സൃഷ്ടിക്കുകയും ചെയ്തു. ഹകീമിയും സിയെചും സ്പെയിൻ ഡിഫൻസിന് നിരന്തരം വെല്ലുവിളിയായി.
26ആം മിനുട്ടിൽ മൊറോക്കോ കീപ്പർ ബോനോയുടെ ഒരു മിസ് പാസ് സ്പെയിന് അവസരം നൽകി. ഡാനി ഓൽമോ തൊടുത്ത ഷോട്ട് ഗോൾ കീപ്പറും പോസ്റ്റും കൂടിയാണ് തടഞ്ഞത്. അത് ഗോളായിരുന്നു എങ്കിലും കണക്കിൽ വരില്ലായിരുന്നു. സൈഡ് ലൈൻ റഫറിയുടെ ഫ്ലാഗ് ഉയർന്നിരുന്നു.
33ആം മിനുട്ടിൽ മസറോയിയുടെ ഒരു ലോങ് ഷോട്ട് സിമോൺ തടഞ്ഞു. ആദ്യ പകുതിയിൽ മൊറോക്കോ തന്നെ ആയിരുന്നു മെച്ചപ്പെട്ട ഫുട്ബോൾ കളിച്ചത്.
രണ്ടാം പകുതിയിൽ 54ആം മിനുട്ടിൽ ഡാനി ഓൽമോ ഒരു ഫ്രീകിക്കിൽ നിന്ന് ബോനോയെ പരീക്ഷിച്ചു. സ്പെയിന്റെ ആദ്യ ഷോട്ട് ഓൺ ടാർഗറ്റ് ആയി ഇത്. സ്പെയിൻ ആൽവാരോ മൊറാട്ടോയെയും നികോ വില്യംസിനെയും ഇറക്കി ഗോളടിക്കാനുള്ള അവസരങ്ങൾ സൃഷ്ടിക്കാൻ സ്പെയിൻ നോക്കി. മൊറോക്കോയും നിരവധി മാറ്റങ്ങൾ വരുത്തി.
88ആം മിനുട്ടിൽ നികോ വില്യംസിന് കിട്ടിയ മികച്ച ഒരു അവസരം സോഫിയാൻ അമ്രബെറ്റിന്റെ മികച്ച ബ്ലോക്കിലൂടെ ആണ് തടയപ്പെട്ടത്. ഇഞ്ച്വറി ടൈമിന്റെ അവസാന മിനുട്ടിൽ സ്പെയിനിന്റെ ഒരു ഫ്രീകിക്ക് ബോനോയുടെ സേവിൽ ആണ് രക്ഷപ്പെട്ടത്‌. അവസാനം കളി എക്സ്ട്രാ ടൈമിൽ എത്തി.
എക്സ്ട്രാ ടൈമിൽ അമ്രാബറ്റ് ഒരു പാസിലൂടെ സാബിരിയെ കണ്ടെത്തി. സാബിരി ഷോട്ട് തൊടുക്കിന്നതിന് തൊട്ടു മുമ്പ് ഒരു ടാക്കിളിലൂടെ ലപോർടെ സ്പെയിനിനെ രക്ഷിച്ചു. എക്സ്ട്രാ ടൈമിന്റെ ആദ്യ പകുതിയുടെ അവസാന മിനുട്ടിൽ ഉനായ് സിമന്റെ വലിയ സേവ് സ്പെയിനിനെ രക്ഷിച്ചു. ചെദിരയുടെ ഷോട്ട് പോയിന്റെ ബ്ലാങ്കിൽ വെച്ചാണ് ഇനായ് സിമൺ സേവ് ചെയ്ത് രക്ഷിച്ചത്.
എക്സ്ട്രാ ടൈമിന്റെ അവസാന നിമിഷം സരാബിയയുടെ ഷോട്ട് പോസ്റ്റിൽ തട്ടിമടങ്ങുന്നതും കാണാൻ ആയി.
120 മിനുട്ട് കഴിഞ്ഞിട്ടും ഗോൾ വരാതെ ആയതോടെ കളി പെനാൾട്ടി ഷൂട്ടൗട്ടിലേക്ക് നീങ്ങി. ആദ്യ കിക്ക് എടുത്തത് മൊറോക്കോയുടെ സബീരി. ഉനായ് സിമണെ മറികടന്ന് വലയിൽ. സ്പെയിനു വേണ്ടി സരാബിയ ആണ് ആദ്യ കിക്ക് എടുത്തത്. സരാബിയയുടെ പെനാൾട്ടിയും പോസ്റ്റിൽ തട്ടി മടങ്ങി. മൊറോക്കോ 1-0 സ്പെയിൻ. സിയെചും മൊറോക്കോയ്ക്ക് ആയി കിക്ക് വലയിൽ എത്തിച്ചു. സോളർ സ്പെയിന്റെ രണ്ടാം കിക്ക് ബൂണോ സേവ് ചെയ്തു. മൊറോക്കോ 2-0.
മൊറോക്കോയുടെ മൂന്നാം പെനാൾട്ടി ഉനായ് സിമൺ സേവ് ചെയ്തത് സ്പെയിന് പ്രതീക്ഷ തിരികെ നൽകി. ബുസ്കറ്റ്സിന്റെ കിക്കും ബുനോ സേവ് ചെയ്തു. ആ പ്രതീക്ഷ അസ്തമിച്ചു. സ്കോർ 2-0 തന്നെ. ഹകീമിയുടെ കിക്ക് മൊറോക്കോയെ ക്വാർട്ടറിലേക്ക് എത്തിച്ചു.
