ഹാലണ്ടിന്റെ മാസ്മരിക പ്രകടനം!! ബ്രസീലിനെ പുറത്താക്കി നോർവേ ക്വാർട്ടറിൽ

ഈസ്റ്റ് റഥർഫോർഡിൽ നടന്ന ഫിഫ ലോകകപ്പ് പ്രീ-ക്വാർട്ടർ പോരാട്ടത്തിൽ അഞ്ച് തവണ ലോകചാമ്പ്യന്മാരായ ബ്രസീലിനെ ഒന്നിനെതിരെ രണ്ട് ഗോളുകൾക്ക് ഞെട്ടിച്ച് നോർവേ ക്വാർട്ടർ ഫൈനലിലേക്ക് മുന്നേറി. സൂപ്പർ താരം എർലിങ് ഹാലണ്ടിന്റെ ക്ലിനിക്കൽ ഇരട്ട ഗോൾ പ്രകടനമാണ് നോർവേയ്ക്ക് ലോകകപ്പ് ചരിത്രത്തിലെ ഏറ്റവും വലിയ അട്ടിമറി വിജയങ്ങളിലൊന്ന് സമ്മാനിച്ചത്. ഇഞ്ചുറി ടൈമിൽ നെയ്മർ ബ്രസീലിനായി ഒരു ഗോൾ മടക്കിയെങ്കിലും കാനറികളുടെ രക്ഷയ്ക്കെത്തിയില്ല.

മത്സരത്തിന്റെ ആദ്യ പകുതിയിൽ ബ്രസീലിന് അനുകൂലമായി ഒരു പെനാൽറ്റി ലഭിച്ചെങ്കിലും അത് ഗോളാക്കി മാറ്റാൻ ബ്രൂണോ ഗിമാരസിന് സാധിക്കാതെ പോയത് ബ്രസീലിന് വലിയ തിരിച്ചടിയായി. ഗോൾരഹിതമായ ആദ്യ പകുതിക്ക് ശേഷം രണ്ടാം പകുതിയിലാണ് കളി മാറിയത്.
മത്സരത്തിന്റെ 79-ാം മിനിറ്റിൽ ആൻഡ്രിയാസ് ഷെൽഡ്രപ്പിന്റെ മികച്ചൊരു അസിസ്റ്റിൽ നിന്ന് എർലിങ് ഹാലണ്ട് നോർവേയെ മുന്നിലെത്തിച്ചു (1-0).

സമനിലയ്ക്കായി ബ്രസീൽ സർവ്വശക്തിയുമെടുത്ത് പോരാടുന്നതിനിടയിൽ, 90-ാം മിനിറ്റിൽ ഇതേ കൂട്ടുകെട്ട് വീണ്ടും ബ്രസീലിനെ ഞെട്ടിച്ചു. ഷെൽഡ്രപ്പിന്റെ പാസിൽ നിന്ന് ഹാലണ്ട് തന്റെ രണ്ടാം ഗോളും നേടി നോർവേയുടെ വിജയം ഉറപ്പിച്ചു (2-0).

മത്സരത്തിന്റെ അവസാന നിമിഷങ്ങളിൽ, ഇഞ്ചുറി ടൈമിന്റെ പത്താം മിനിറ്റിൽ (90+10′) ലഭിച്ച പെനാൽറ്റി ലക്ഷ്യത്തിലെത്തിച്ച് നെയ്മർ ബ്രസീലിന് നേരിയ പ്രതീക്ഷ നൽകിയെങ്കിലും തൊട്ടടുത്ത നിമിഷം റഫറി ഫൈനൽ വിസിൽ മുഴക്കിയതോടെ ബ്രസീലിന്റെ ലോകകപ്പ് മോഹങ്ങൾ അവസാനിച്ചു.