Category: Bundesliga

രണ്ടു ഗോൾ വഴങ്ങിയ ശേഷം തകർപ്പൻ തിരിച്ചു വരവുമായി ബയേൺ കരുത്തു കാണിച്ച മത്സരത്തിൽ ലെപ്സീഗുമായി സമനിലയിൽ പിരിഞ്ഞു ലീഗ് ചാമ്പ്യന്മാർ. ഓപെന്ത, ലുകെബ എന്നിവർ ആദ്യ പകുതിയിൽ ലെപ്സീഗിനായി വല കുലുക്കിയപ്പോൾ, രണ്ടാം പകുതിയിൽ പിറന്ന ബയേണിന്റെ ഗോളുകൾ ഹാരി കെയ്ൻ, ലീറോയ് സാനെ എന്നിവർ കുറിച്ചു. ഇതോടെ ബയേൺ പോയിന്റ് പട്ടികയിൽ മൂന്നാം സ്ഥാനത്തും ലെപ്സീഗ് അഞ്ചാം സ്ഥാനത്തും ആണ്.

ബയേണിന് തന്നെ ആയിരുന്നു തുടക്കം മുതൽ ആധിപത്യം. നാലാം മിനിറ്റിൽ തന്നെ ഹാരി കെയിനിന്റെ മികച്ചൊരു പാസിൽ മുസ്‌യാലയുടെ ഷോട്ട് ബ്ലാസ്വിച്ച് തടുത്തു. പതിമൂന്നാം മിനിറ്റിൽ ഉൾറിക്കിന്റെ പിഴവിൽ ലെപ്സിഗ് ഗോളിന് അടുത്തെത്തി. 20ആം മിനിറ്റിൽ ലെപ്സീഗ് ലീഡ് എടുത്തു. പന്തുമായി ബോക്സിലേക്ക് കുതിച്ച ഓപെന്തയെ തടയാൻ കിം മിൻ ജെ എത്തിയെങ്കിലും ലെപ്സീഗ് താരത്തിന്റെ ഷോട്ട് മിൻ-ജയിൽ തട്ടി ചെറിയൊരു ഡിഫ്‌ലെക്ഷനോടെ വലയിൽ പതിച്ചു. വെറും ആറു മിനിട്ടുകൾക്ക് ശേഷം ലെപ്സീഗ് ലീഡ് ഇരട്ടി ആക്കിയതോടെ ബയെൺ വിറച്ചു. കോർണറിൽ നിന്നെത്തിയ പന്തിൽ നിന്നും ലുക്കെബയാണ് വല കുലുക്കിയത്. ആദ്യ പകുതിയിൽ ഗോൾ തിരിച്ചടിക്കാൻ ബയേണിനായില്ല.

57ആം മിനിറ്റിൽ പെനാൽറ്റിയിലൂടെ ഹാരി കെയ്ൻ ടീമിന് വേണ്ടി ഗോൾ കണ്ടെത്തി. റാഫേൽ ഗ്വിരെറോയുടെ മികച്ചൊരു ശ്രമം ലക്ഷ്യം കാണാതെ പോയി. ഒടുവിൽ 70ആം മിനിറ്റിൽ സാനെ സമനില ഗോൾ നേടി. കൗണർ നീക്കത്തിൽ മുസ്യാലയുടെ പാസ് സ്വീകരിച്ചു അതിവേഗം കുതിച്ച് കീപ്പറെ കീഴക്കിയ താരം തൊടുത്ത ഷോട്ട് വലയിലേക്ക് തന്നെ എത്തി. പിന്നീട് ഇരു ടീമുകൾക്കും അവസരങ്ങൾ വീണു കിട്ടി. കാർവലോയുടെ ക്രോസിലേക്ക് എത്തിച്ചേരാൻ സെസ്കൊക്ക് സാധിച്ചില്ല. ലെപ്സീഗിന്റെ ഗോൾ എന്നുറപ്പിച്ച ശ്രമം തടയാൻ ബോക്‌സ് വിട്ടിറങ്ങി ഉൾറിച്ച് സെസ്കൊയുടെ കാലുകളിൽ നിന്നും പന്ത് തട്ടിയക്കറ്റിയതും അവസാന മിനിറ്റുകളിൽ നിർണായകമായി.

ജർമ്മൻ ബുണ്ടസ് ലീഗയിൽ ആദ്യ മത്സരത്തിൽ ജയത്തോടെ തുടങ്ങി ബൊറൂസിയ ഡോർട്ട്മുണ്ട്. എഫ്.സി കോളിനെ സ്വന്തം മൈതാനത്ത് എതിരില്ലാത്ത ഒരു ഗോളിന് ആണ് ഡോർട്ട്മുണ്ട് തോൽപ്പിച്ചത്. മത്സരത്തിൽ പന്ത് കൈവശം വെക്കുന്നതിൽ അടക്കം ഡോർട്ട്മുണ്ട് ആധിപത്യം കണ്ടെങ്കിലും കൂടുതൽ അവസരങ്ങൾ കോളിൻ ആണ് തുറന്നത്.

സമനിലയിലേക്ക് പോവും എന്നു തോന്നിയ മത്സരത്തിൽ 88 മത്തെ മിനിറ്റിൽ ഡച്ച് താരം ഡോണിയൽ മലെൻ ആണ് ഡോർട്ട്മുണ്ടിന്റെ വിജയഗോൾ നേടിയത്. കോർണറിൽ നിന്നു ഫെലിക്‌സ് നമെച ഹെഡ് ചെയ്തു നൽകിയ പാസിൽ നിന്നു ആയിരുന്നു മലെന്റെ മികച്ച വിജയഗോൾ. കഴിഞ്ഞ സീസണിൽ കയ്യെത്തും ദൂരത്ത് കിരീടം നഷ്ടമായ ഡോർട്ട്മുണ്ട് ഈ സീസണിലും പൊരുതാൻ ഉറച്ചു തന്നെയാണ് ഇറങ്ങുക.

സ്പാനിഷ് പരിശീലകൻ സാബി അലോൺസോയുടെ സേവനം രണ്ടു വർഷത്തേക്ക് കൂടി നീട്ടി ബയേർ ലെവർകൂസൻ. അടുത്ത സീസണോടെ നിലവിലെ കരാർ അവസാനിക്കുന്ന സാബി, 2026 വരെയുള്ള പുതിയ കരാർ ആണ് ജർമൻ ക്ലബ്ബിൽ ഒപ്പിട്ടിരിക്കുന്നത്. ഇതോടെ വരുന്ന സീസണുകളിലും മുൻ ബയേൺ മ്യൂണിച്ച് താരം തന്നെ തന്ത്രങ്ങൾ ഓതും എന്നുറപ്പായി. സാബിക്ക് കീഴിൽ മികച്ച പ്രകടനമാണ് ലെവർകൂസൻ പുറത്തെടുത്തു കൊണ്ടിരുന്നത്.

കഴിഞ്ഞ സീസണിന്റെ തുടക്കത്തിൽ മോശം ഫോമിലൂടെ ടീം കടന്ന് പോയപ്പോഴാണ് അന്നത്തെ പരിശീലകൻ ജെറാർഡോ സിയോണക്ക് പകരക്കാരനായി സാബി അലോൺസോയെ ലെവർകൂസൻ ടീമിലേക്ക് കൊണ്ടു വരുന്നത്. റയൽ മാഡ്രിഡ് യൂത്ത് ടീമിലും സോസിഡാഡ് ബി ടീമിലും മാത്രം പരിശീലന പരിചയം ഉണ്ടായിരുന്ന അലോൺസോയിൽ വിശ്വാസം ആർപ്പിക്കാനായിരുന്നു അവരുടെ തീരുമാനം. സീസൺ അവസാനിച്ചപ്പോൾ ലീഗിൽ ആറാം സ്ഥാനത്ത് ടീമിനെ എത്തിച്ചും യൂറോപ്പിലേക്ക് യോഗ്യത നേടിയും അദ്ദേഹം മാനേജ്‌മെന്റിന്റെ വിശ്വാസം കാത്തു. ദുഷ്കരമായ ഘട്ടത്തിലൂടെ നീങ്ങിയ സമയത്ത് അലോൺസോ ടീമിൽ സന്തുലിതാവസ്ഥ കൊണ്ടു വന്നെന്ന് ലെവർകൂസൻ ചെയർമാൻ പുതിയ കാരറിനോട് പ്രതികരിച്ചു സംസാരിച്ചു. ഇനി ടീമിനെ ആത്മവിശ്വാസത്തോടെ കൂടുതൽ മെച്ചപ്പെടുത്തുകയാണ് ലക്ഷ്യമെന്നും അദ്ദേഹം പറഞ്ഞു. ലെവർകൂസൻ തന്നിൽ അർപ്പിച്ച വിശ്വാസത്തിൽ സാബി അലോൺസോ നന്ദി അറിയിച്ചു. മുന്നോട്ടുള്ള പാതയിൽ തനിക്കും മാനേജ്‌മെന്റിനും ഒരേ ലക്ഷ്യമാണ് ഉള്ളതെന്നും താനും മറ്റ് കോച്ചിങ് സ്റ്റാഫും ഈ ക്ലബ്ബിലെ സാഹചര്യം ആസ്വദിക്കുന്നുണ്ടെന്നും അദ്ദേഹം പറഞ്ഞു.

കോച്ച് ഡാനിയൽ ഫർകെ ടീം വിടുന്നതായി മോഞ്ചൻഗ്ലാഡ്ബാച് അറിയിച്ചു. മുഖ്യ പരിശീലകനുമായി പരസ്പര ധാരണയിൽ വഴി പിരിയാനാണ് ജർമൻ തീരുമാനിച്ചത്. ഫർകെയുടെ കൂടെ സഹപരിശീലകർ ആയ റെയ്മർ, ക്രിസ്റ്റഫർ ജോൺ, ക്രിസ് ഡോമോഗാല്ല എന്നിവരും ടീം വിടും. ഇതോടെ കഴിഞ്ഞ ജൂണിൽ മാത്രം ടീമിന്റെ സാരഥ്യം ഏറ്റെടുത്ത 46കാരന്റെ ബുണ്ടസ്ലീഗയിലെ ആദ്യത്തെ അധ്യായം ഒരേയൊരു സീസണിൽ അവസാനിക്കുകയാണ്. മൂന്ന് വർഷത്തെ കരാറിൽ ആയിരുന്നു അദ്ദേഹം ടീമിൽ എത്തിയത്.

സീസണിന് മുൻപ് ആദി ഹുതൂരിന് പകരക്കാരനായാണ് മോഞ്ചൻഗ്ലഡ്ബാച് പരിശീലകൻ ആയി ഫർകെ എത്തുന്നത്. മുൻപ് ഡോർട്മുണ്ട് ബി ടീമിനെ അടക്കം പരിശീലിപ്പിച്ചിട്ടുണ്ട്. എന്നാൽ സീസണിൽ പ്രതീക്ഷിച്ച പ്രകടനം ടീമിൽ നിന്നും ഉണ്ടായില്ല. ആദ്യ മത്സരങ്ങളിൽ തോൽവി അറിയാതെ കുതിച്ചെങ്കിലും സീസൺ അവസാനിക്കുമ്പോൾ പത്താം സ്ഥാനത്ത് മാത്രമാണ് ടീം. യുറോപ്യൻ മത്സരങ്ങൾക്കുള്ള യോഗ്യത നേടാൻ സാധിക്കാതെ പോയതും തിരിച്ചടി ആയി. ആകെ പതിനൊന്ന് വിജയങ്ങൾ മാത്രമാണ് സമ്പാദ്യമായിട്ടുള്ളത്. മുൻപ് നോർവിച്ചിനൊപ്പം ചാമ്പ്യൻഷിപ്പ് കിരീടമടക്കം ഇദ്ദേഹത്തിന് നേടാൻ സാധിച്ചിട്ടുണ്ട്.