Union Berlin News in Malayalam

ബയേൺ മ്യൂണിക്കിന്റെ വിജയകുതിപ്പിന് അന്ത്യം, യൂണിയൻ ബെർലിനോട് സമനില

സീസണിൽ റെക്കോർഡ് കുറിച്ച ബയേൺ മ്യൂണിക്കിന്റെ വിജയകുതിപ്പിന് അന്ത്യം. സീസണിൽ കളിച്ച 16 കളികളും ജയിച്ച അവരെ യൂണിയൻ ബെർലിൻ 2-2 എന്ന സ്കോറിന് സമനിലയിൽ പിടിക്കുക ആയിരുന്നു. ബെർലിനിൽ നടന്ന മത്സരത്തിൽ പന്ത് കൈവശം വെക്കുന്നതിൽ ബയേണിന്റെ ആധിപത്യം കണ്ടെങ്കിലും 27 മത്തെ മിനിറ്റിൽ അവർ സീസണിൽ ആദ്യമായി ബുണ്ടസ് ലീഗയിൽ ഒരു മത്സരത്തിൽ പിറകിൽ പോയി. ഡാനിലോ ഡോഹെകിയാണ് ബയേണിന്റെ വലയിൽ പന്ത് എത്തിച്ചത്.

എന്നാൽ 38 മത്തെ മിനിറ്റിൽ സ്റ്റാനിസിച്ചിന്റെ പാസിൽ നിന്നു അവിശ്വസനീയം ആയ ആങ്കിളിൽ നിന്നു ഗോൾ നേടിയ ലൂയിസ് ഡിയാസ് അവർക്ക് സമനില ഗോൾ നൽകി. രണ്ടാം പകുതിയിൽ 83 മത്തെ മിനിറ്റിൽ ഒരു ഫ്രീകിക്കിൽ നിന്നു കിട്ടിയ അവസരത്തിൽ തന്റെ രണ്ടാം ഗോൾ നേടിയ ഡാനിലോ ഡോഹെകി ബയേണിനെ വീണ്ടും ഞെട്ടിച്ചു. പരാജയം മുന്നിൽ കണ്ട ബയേണിനെ പക്ഷെ ടോം ബിച്ചോഫിന്റെ ക്രോസിൽ നിന്നു 93 മത്തെ മിനിറ്റിൽ ഗോൾ നേടിയ ഹാരി കെയിൻ രക്ഷിക്കുക ആയിരുന്നു. സീസണിൽ ലീഗിലെ 13 മത്തെ ഗോൾ ആയിരുന്നു ഇംഗ്ലീഷ് ക്യാപ്റ്റന് ഇത്. നിലവിൽ 10 മത്സരങ്ങൾക്ക് ശേഷം ലീഗിൽ 6 പോയിന്റ് മുന്നിൽ ഒന്നാമത് തുടരുകയാണ് ബയേൺ.

ബൊണൂചി ഇനി യൂണിയൻ ബർലിനിൽ

ലിയനാർഡോ ബൊണൂച്ചി ഇനി ജർമ്മനിയിൽ ഫുട്ബോൾ കളിക്കും. താരം ജർമ്മൻ ക്ലബായ യൂണിയൻ ബർലിനുമായി കരാറിൽ എത്തി. യുവന്റസും താരത്തെ കൈമാറാൻ സമ്മതിച്ചിട്ടുണ്ട്. യൂണിയൻ ബെർലിനിൽ ഒരു വർഷത്തെ കരാർ ബൊണൂചി ഒപ്പുവെക്കും. ഒരു വർഷം കൂടെ കരാർ നീട്ടാനും വ്യവസ്ഥയുണ്ടാകും.

യുവന്റ്സ് ബൊണൂചിയോട് ക്ലബ് വിടാൻ കഴിഞ്ഞ മാസം തന്നെ അറിയിച്ചിരുന്നു‌. അദ്ദേഹം ടീമിന്റെ പ്രീ-സീസൺ ടൂറിൽ പോലും ഉണ്ടായിരുന്നില്ല. യുവന്റസ് കളിക്കാരനായി ബൊണൂചിയെ രജിസ്റ്റർ ചെയ്തിരുന്നും ഇല്ല.

2024 ജൂൺ വരെ നീളുന്ന കരാർ ബൊണൂചിക്ക് യുവന്റസിൽ ഉണ്ടെങ്കിലും ഫ്രീ ഏജന്റായി തന്നെ താരത്തിന് ക്ലബ് വിടാം. യുവന്റസ് ക്യാപ്റ്റൻ കൂടിയായിരുന്ന 36കാരൻ ഫിയൊറെന്റീനയുമായി ചർച്ചകൾ നടത്തിയിരുന്നു എങ്കിലും ആ ട്രാൻസ്ഫർ നടന്നില്ല.

രണ്ട് ഘട്ടങ്ങളികായി നാഞ്ഞൂറോളം മത്സരങ്ങൾ യുവന്റസിനായി ബൊണൂചി കളിച്ചിട്ടുണ്ട്. യുവന്റസിനൊപ്പം 8 ലീഗ് കിരീടങ്ങൾ ഉൾപ്പെടെ 17 കിരീടങ്ങൾ അദ്ദേഹം നേടി. ഇറ്റലിക്ക് ഒപ്പം 121 അന്താരാഷ്ട്ര മത്സരങ്ങളും അദ്ദേഹം കളിച്ചു.

സമനില വഴങ്ങി ഡോർട്ട്മുണ്ട്, വമ്പൻ ജയവുമായി യൂണിയൻ ബെർലിൻ

ജർമ്മൻ ബുണ്ടസ് ലീഗയിൽ രണ്ടാം മത്സരത്തിൽ സമനില വഴങ്ങി ബൊറൂസിയ ഡോർട്ട്മുണ്ട്. ബോകമിനു എതിരെ വിയർത്ത ഡോർട്ട്മുണ്ട് 1-1 ന്റെ സമനില ആണ് വഴങ്ങിയത്. മത്സരത്തിൽ കൂടുതൽ അവസരങ്ങൾ സൃഷ്ടിച്ചത് എല്ലാം എതിരാളികൾ ആയിരുന്നു. മത്സരത്തിൽ 13 മത്തെ മാക്സിമിലൻ വിറ്റെകിന്റെ പാസിൽ നിന്നു ഗോൾ നേടിയ കെവിൻ സ്റ്റോഗർ ഡോർട്ട്മുണ്ടിനെ ഞെട്ടിച്ചു. രണ്ടാം പകുതിയിൽ എന്നാൽ ഉഗ്രൻ ഫോമിലുള്ള ഡോണിയൽ മലൻ ജൂലിയൻ ബ്രാന്റിന്റെ പാസിൽ നിന്നു അവർക്ക് സമനില ഗോൾ നേടി കൊടുക്കുക ആയിരുന്നു. തുടർന്ന് വിജയഗോൾ നേടാൻ ഇരു ടീമുകൾക്കും ആയില്ല.

അതേസമയം സ്ഥാനക്കയറ്റം നേടി വന്ന ഡാർമ്സ്റ്റഡിനെ ഒന്നിനെതിരെ നാലു ഗോളുകൾക്ക് തോൽപ്പിച്ച യൂണിയൻ ബെർലിൻ ബുണ്ടസ് ലീഗയിൽ ഒന്നാം സ്ഥാനത്ത് എത്തി. മാർവിൻ മെഹ്ലം എതിരാളികൾക്ക് ആയി ഗോൾ നേടിയപ്പോൾ പുതുതായി ടീമിൽ എത്തിയ ജർമ്മൻ താരം റോബിൻ ഗോസൻസിന്റെ ഇരട്ടഗോളുകൾ ആണ് ബെർലിന് വലിയ ജയം സമ്മാനിച്ചത്. ആദ്യമായി ആദ്യ 11 ൽ ഇടം നേടിയ ഗോസൻസ് ഇരട്ടഗോൾ നേടിയപ്പോൾ ബെഹ്റൻസ്, ഡോയെകി എന്നിവർ ആണ് മറ്റ് ഗോളുകൾ നേടിയത്. ഹോഫൻഹെയിം, വോൾവ്സ്ബർഗ് ടീമുകൾ ജയം കണ്ടപ്പോൾ വെർഡർ ബ്രമൻ ഫ്രയ്ബർഗിനോട് എതിരില്ലാത്ത ഒരു ഗോളിന് പരാജയപ്പെട്ടു. 96 മത്തെ മിനിറ്റിൽ മാക്സിമിലിയൻ ഫിലിപ്പ് ആണ് അവരുടെ വിജയഗോൾ നേടിയത്.

ബൊണൂചി യൂണിയൻ ബെർലിനിലേക്ക് അടുക്കുന്നു

ലിയനാർഡോ ബൊണൂച്ചി ഇനി ജർമ്മനിയിൽ ഫുട്ബോൾ കളിക്കാൻ സാധ്യത. യുവന്റ്സ് വിടും എന്ന് ഉറപ്പായ താരം ജർമ്മൻ ക്ലബായ യൂണിയൻ ബർലിനുമായി കരാറിൽ എത്തുന്നതിന് അടുത്താണെന്ന് ഫബ്രീസിയോ റൊമാനോ റിപ്പോർട്ട് ചെയ്യുന്നു. യൂണിയൻ ബെർലിൻ ഒരു വർഷത്തെ കരാർ ബൊണൂചിക്ക് മുന്നിൽ വെച്ചിട്ടുണ്ട്. ഒരാഴ്ച കൂടിയെ ട്രാൻസ്ഫർ വിൻഡോ അവസാനിക്കാൻ ഉള്ളൂ എന്നതിനാൽ പെട്ടെന്നു തന്നെ ഈ ട്രാൻസ്ഫറിന്റെ അന്തിമ വിധി അറിയാൻ ആകും.

റോബിൻ ഗോസൻസ് യൂണിയൻ ബെർലിനിൽ, പകരം ബ്രസീലിയൻ താരത്തെ ടീമിൽ എത്തിച്ചു ഇന്റർ

ഇന്റർ മിലാന്റെ ജർമ്മൻ ലെഫ്റ്റ് ബാക്ക് റോബിൻ ഗോസൻസ് യൂണിയൻ ബെർലിനിൽ ചേരും. ഏതാണ്ട് 15 മില്യൺ യൂറോ നൽകിയാണ് ജർമ്മൻ ക്ലബ് താരത്തെ സ്വന്തമാക്കുന്നത്. 2022 ൽ അടലാന്റയിൽ നിന്നു ഇന്ററിൽ എത്തിയ 29 കാരനെ ഒരു സീസണിന് ശേഷം വിൽക്കാൻ ഇന്റർ തീരുമാനിക്കുക ആയിരുന്നു. ഗോസൻസിന്റെ അനുഭവസമ്പത്ത് ഇക്കുറി ചാമ്പ്യൻസ് ലീഗ് കളിക്കാൻ എത്തുന്ന ബെർലിന് ഗുണകരമാകും.

അതേസമയം ഗോസൻസിന് പകരക്കാരനായി സീരി എ ടീം ആയ മോൻസയുടെ ബ്രസീലിയൻ ലെഫ്റ്റ് ബാക്ക് കാർലോസ് അഗുസ്റ്റോയെ ഇന്റർ മിലാൻ ടീമിൽ എത്തിക്കും. നിലവിൽ ഈ സീസണിൽ ലോണിൽ ആണ് താരത്തെ ഇന്റർ എത്തിക്കുക. എന്നാൽ അടുത്ത വർഷം താരത്തെ 15 മില്യൺ നൽകി സ്വന്തമാക്കാനുള്ള വ്യവസ്ഥ ഈ കരാറിൽ ഉണ്ട്. ബ്രസീലിൽ നിന്നു 2020 ൽ മോൻസയിൽ എത്തിയ 24 കാരനായ കാർലോസ് സെന്റർ ബാക്ക് ആയും കളിക്കാൻ പറ്റുന്ന താരമാണ്. കഴിഞ്ഞ സീസണിൽ മികച്ച പ്രകടനം ആണ് താരം നടത്തിയത്.

ചെൽസി താരം ഡെട്രോ ഫോഫാന യൂണിയൻ ബെർലിനിൽ

മുന്നേറ്റ താരം ഡേവിഡ് ഡെട്രോ ഫോഫാനയെ ചെൽസി യൂണിയൻ ബെർലിനിലേക്ക് കൈമാറി. ലോണിൽ ആണ് ഇരുപതുകാരൻ ജർമൻ ക്ലബ്ബിലേക്ക് എത്തുന്നത്. ഒരു സീസണിലേക്കുള്ള ലോൺ കാലാവധിക്ക് ശേഷം പക്ഷെ താരത്തെ സ്വന്തമാക്കാൻ യൂണിയൻ ബെർലിനാവില്ല. കഴിഞ്ഞ സീസണിൽ ബുണ്ടസ്ലീഗയിൽ ഞെട്ടിക്കുന്ന പ്രകടനം പുറത്തെടുത്തിരുന്ന യൂണിയൻ ബെർളിന് താരത്തിന്റെ വരവ് വലിയൊരു മുതൽ കൂട്ടാവും. ഡേവിഡിന്റെ വേഗതയും മുൻ നിരയിൽ പല സ്ഥാനങ്ങളിലും കളിക്കാൻ ഉള്ള കഴിവുമാണ് തങ്ങളെ ആകർശിച്ചതെന്ന് ടീം ഡയറക്റ്റർ ഒലിവർ രുണെർട് അറിയിച്ചു. ടീം ഇത്തവണ യൂറോപ്പിലേക്കും യോഗ്യത നേടിയിട്ടുള്ളതിനാൽ ഫോഫാനക്കും മികച്ചൊരു അനുഭവമായിരിക്കും ബെർലിനിൽ.

കഴിഞ്ഞ ജനുവരി ട്രാൻസ്ഫർ വിൻഡോയിലാണ് ഐവറി കോസ്റ്റ് താരമായ ഡെട്രോ ഫോഫാനയെ നോർവെ ടീമായ മോൾഡെയിൽ നിന്നും എത്തിക്കുന്നത്. 2022ൽ ഇരുപതുരണ്ടു ഗോളുകൾ കണ്ടെത്തി അപാരമായ ഫോമിൽ ആയിരുന്നു താരം. ചെൽസിയിൽ പക്ഷെ ആകെ നാല് മത്സരങ്ങളിൽ മാത്രമാണ് അവസരം ലഭിച്ചത്. കഴിഞ്ഞ സീസണിലെ പ്രകടനം മെച്ചപ്പെടുത്താൻ ആഗ്രഹിക്കുന്ന യൂണിയൻ ബെർലിൻ ടീം ശക്തിപ്പെടുത്താൻ ഉള്ള ഒരുക്കത്തിൽ തന്നെയാണ്. ലീഡ്സിൽ നിന്നും ബ്രെണ്ടൻ ആരോൺസണിനേയും കഴിഞ്ഞ ദിവസം എത്തിച്ചിരുന്നു. വിയ്യാറയലിൽ നിന്നും നിക്കോളാസ് ജാക്സൻ, ലെപ്സീഗ് താരം എൻകുങ്കു എന്നിവർ വരുന്നതോടെ ഡെട്രോ ഫോഫാനക്ക് വീണ്ടും അവസരങ്ങൾ കുറയുമെന്ന് ഉറപ്പായിരുന്നു.

ലീഡ്സിന്റെ അമേരിക്കൻ താരം ബ്രണ്ടൻ ആരോൺസൺ യൂണിയൻ ബെർലിനിൽ

ലീഡ്സ് യുണൈറ്റഡ് താരം ബ്രണ്ടൻ ആരോൺസൺ ജർമ്മൻ ക്ലബ് യൂണിയൻ ബെർലിനിൽ. അമേരിക്കൻ താരം ആയ ആരോൺസൺ ഈ സീസണിൽ ലോൺ അടിസ്ഥാനത്തിൽ ആണ് ജർമ്മൻ ക്ലബിന് ആയി കളിക്കുക.

ഈ സീസണിൽ പ്രീമിയർ ലീഗിൽ നിന്നു തരം താഴ്ത്തൽ നേരിട്ടതോടെ ലീഡ്സ് പലതാരങ്ങളെയും ക്ലബിൽ നിന്നു വിടുക ആയിരുന്നു. ഈ വർഷം ചാമ്പ്യൻസ് ലീഗ് കളിക്കാൻ യോഗ്യത നേടിയ യൂണിയൻ ബെർലിൻ ടീമിന് അമേരിക്കൻ താരത്തിന്റെ വരവ് ഒന്നു കൂടി ബലം നൽകും.

യുവതാരങ്ങളുടെ മികവിൽ യൂണിയൻ ബെർലിനെ തോൽപ്പിച്ചു ബൊറൂസിയ ഡോർട്ട്മുണ്ട്

ജർമ്മൻ ബുണ്ടസ് ലീഗയിൽ കിരീട പോരാട്ടത്തിൽ സാധ്യത നിലനിർത്തി ബൊറൂസിയ ഡോർട്ട്മുണ്ട്. മൂന്നാം സ്ഥാനക്കാർ ആയ യൂണിയൻ ബെർലിനെ ഒന്നിനെതിരെ രണ്ടു ഗോളുകൾക്ക് തോൽപ്പിച്ച അവർ ലീഗിൽ ബയേണും ആയുള്ള പോയിന്റ് വ്യത്യാസം രണ്ട് ആയി തന്നെ നിലനിർത്തി. ഡോർട്ട്മുണ്ട് ആധിപത്യം കണ്ട മത്സരത്തിൽ ബെർലിനിൽ നേരിട്ട പരാജയത്തിന് അവർ പ്രതികാരം ചെയ്തു. റാഫേൽ ഗുയെരയുടെ പാസിൽ നിന്നു ഡോണിയൽ മാലൻ 28 മത്തെ മിനിറ്റിൽ ഡോർട്ടുമുണ്ടിന് മുൻതൂക്കം സമ്മാനിച്ചു.

രണ്ടാം പകുതിയിൽ 61 മത്തെ മിനിറ്റിൽ ബെക്കറിന്റെ പാസിൽ നിന്നു ഗോൾ കണ്ടത്തിയ കെവിൻ ബെഹ്റൻസ് ബെർലിനു സമനില സമ്മാനിച്ചു. എന്നാൽ പരിക്കിൽ നിന്നു മോചിതനായി 74 മത്തെ മിനിറ്റിൽ കളത്തിൽ ഇറങ്ങിയ യുവതാരം യൂസോഫ മൗകോക 5 മിനിറ്റിനുള്ളിൽ ഡോർട്ട്മുണ്ടിന് വിജയഗോൾ സമ്മാനിച്ചു. 7 മത്സരങ്ങൾ ലീഗിൽ അവശേഷിക്കുന്ന സമയത്ത് ബയേണിനെ മറികടക്കാൻ ആയെക്കുമെന്ന പ്രതീക്ഷ ഡോർട്ട്മുണ്ട് നിലനിർത്തി.

പിറന്നാൾ ഗോളുമായി മുസിയല,യൂണിയൻ ബെർലിനെ തകർത്ത് ബയേൺ

ബുണ്ടസ് ലീഗയിൽ വമ്പൻ ജയവുമായി ബയേൺ മ്യൂണിക്ക്. മൂന്നാം സ്ഥാനക്കാരായ യൂണിയൻ ബെർലിനെ എതിരില്ലാത്ത മൂന്ന് ഗോളുകൾക്കാണ് ബയേൺ മ്യൂണിക്ക് തകർത്തത്. ചൗപോ മോട്ടിംഗും കിംഗ്സ്ലി കോമനും മുസിയാലയുമാണ് ബയേണിനായി ഗോളടിച്ചത്. തോമസ് മുള്ളർ രണ്ട് ഗോളുകൾക്ക് വഴിയൊരുക്കിയപ്പോൾ കോമൻ ഒരു ഗോളും ഒരു അസിസ്റ്റും നൽകി. ഈ ജയത്തോട് കൂടി ഗോൾ ഡിഫ്രൻസ് കാരണം ഡോർട്ട്മുണ്ടിന് മുൻപിൽ, പോയന്റ് നിലയിൽ ഒന്നാം സ്ഥാനത്താണ് ബയേൺ മ്യൂണിക്ക്.

ജയം മാത്രം ലക്ഷ്യം വെച്ചിറങ്ങിയ ബയേൺ മ്യൂണിക്ക് യൂണിയൻ ബെർലിന് എതിരെ ആദ്യ പകുതിയിൽ തന്നെ മൂന്ന് ഗോളുകളാണ് അടിച്ചു കൂട്ടിയത്‌. ആദ്യ ഗോൾ പിറന്നത് ചൗപോ മോട്ടിംഗിലൂടെയായിരുന്നു. കോമന്റെ ക്രോസ് ഹെഡ്ഡ് ചെയ്ത് എറിക് ജീൻ മാക്സും ചൗപോ മോട്ടിംഗ് ബയേണിന് ലീഡ് നൽകി. വൈകാതെ തന്നെ ബയേണിനായി 430ആം മത്സരത്തിനായി ബൂട്ടണിഞ്ഞ മുള്ളർ കോമന്റെ ഗോളിനും വഴിയൊരുക്കി. ആദ്യ പകുതി അവസാനിക്കാനിരിക്കെ പിറന്നാൾ ആഘോഷിക്കുന്ന മുസിയലയുടെ ഗോളിനും മുള്ളർ അസിസ്റ്റ് നൽകി. 110 ദിവസങ്ങൾക്ക് ശേഷം സാഡിയോ മാനെ കളത്തിൽ തിരികെയെത്തിയതും ബയേണിന് ആശ്വാസമായി.
ഈ വർഷത്തെ യൂണിയൻ ബെർലിന്റെ ആദ്യ തോൽവി ആയിരുന്നു ഇന്നത്തേത്. ബുണ്ടസ് ലീഗയിൽ ഇതുവരെ ബയേൺ മ്യൂണിക്കിനോട് ജയിക്കാൻ യൂണിയൻ ബെർലിനായിട്ടില്ല.

സ്പാനിഷ് മിഡ്ഫീൽഡർ ഇസ്കോ ഇനി ബുണ്ടസ് ലീഗയിൽ അത്ഭുതങ്ങൾ കാണിക്കുന്ന യൂണിയൻ ബെർലിനൊപ്പം

സ്പാനിഷ് മിഡ്ഫീൽഡർ ഇസ്കോയെ ജർമ്മൻ ക്ലബായ യൂണിയൻ ബെർലിൻ സ്വന്തമാക്കുന്നു. റയൽ മാഡ്രിഡിനായി 350-ലധികം മത്സരങ്ങൾ കളിച്ചിട്ടുള്ള ഇസ്കോ ഡിസംബറിൽ സെവിയ്യ വിട്ടതിന് ശേഷം ഒരു ഫ്രീ ഏജന്റായി തുടരുക ആയിരുന്നു. ഇസ്കൊയ്ക്ക് മുന്നിൽ ജനുവരിയിൽ നിരവധി ഓഫറുകൾ ലഭിക്കുന്നുണ്ടായിരുന്നു. അവസാനം ജർമ്മൻ ലീഗിൽ അത്ഭുതങ്ങൾ കാണിക്കുന്ന യൂണിയൻ ബെർലിന്റെ ഓഫർ താരം സ്വീകരിക്കുക ആയിരുന്നു.

ഇപ്പോൾ ലീഗിൽ ബയേണെക്കാൾ ഒരു പോയിന്റ് മാത്രം പിറകിൽ ഉള്ള യൂണിയൻ ബെർലിൻ ബുണ്ടസ് ലീഗ കിരീടം തന്നെയാണ് ലക്ഷ്യം വെക്കുന്നത്. 18 മാസത്തെ കരാർ ഇസ്കോ ജർമ്മൻ ക്ലബുമായി ഒപ്പുവെക്കും. റയലിൽ ആയിരുന്നപ്പോൾ മൂന്ന് ലാ ലിഗ കിരീടങ്ങളും ഒരു കോപ്പ ഡെൽ റേയും അഞ്ച് ചാമ്പ്യൻസ് ലീഗുകളും ഉൾപ്പെടെ 19 ട്രോഫികൾ താരം നേടിയിട്ടുണ്ട്. 38 തവണ സ്‌പെയിനിന്റെ ജേഴ്സിയും അദ്ദേഹം അണിഞ്ഞു.

ഡോർട്ട്മുണ്ടിനെയും തകർത്തു യൂണിയൻ ബെർലിൻ, ലീഗിൽ ഒന്നാമത് തുടരും

ജർമ്മൻ ബുണ്ടസ് ലീഗയിൽ ഒന്നാം സ്ഥാനത്ത് തങ്ങൾ തന്നെ തുടരും എന്നു പ്രഖ്യാപിച്ചു യൂണിയൻ ബെർലിൻ. കരുത്തരായ ബൊറൂസിയ ഡോർട്ട്മുണ്ടിനെ എതിരില്ലാത്ത രണ്ടു ഗോളുകൾക്ക് ആണ് അവർ തകർത്തത്. ഏതാണ്ട് 80 ശതമാനം പന്ത് കൈവശം വച്ചു അവസരങ്ങൾ സൃഷ്ടിച്ച ഡോർട്ട്മുണ്ടിന് പക്ഷെ ബെർലിൻ പ്രതിരോധം ഭേദിക്കാൻ ആയില്ല.

എട്ടാം മിനിറ്റിൽ ഇടത് കാലൻ അടിയിലൂടെ യാനിക് ഹാബറർ ബെർലിനു മുൻതൂക്കം സമ്മാനിച്ചു. തുടർന്ന് 21 മത്തെ മിനിറ്റിൽ ജോർദന്റെ പാസിൽ നിന്നു ബോക്സിന് പുറത്ത് നിന്ന് അതുഗ്രൻ അടിയിലൂടെ ഗോൾ നേടി രണ്ടാം ഗോൾ കണ്ടത്തിയ യാനിക് ഹാബറർ ബെർലിൻ ജയം ഉറപ്പിക്കുക ആയിരുന്നു. ലീഗിൽ 10 മത്സരങ്ങൾക്ക് ശേഷം 23 പോയിന്റുകളും ആയി യൂണിയൻ ബെർലിൻ ഒന്നാമത് നിൽക്കുമ്പോൾ ഡോർട്ട്മുണ്ട് എട്ടാമത് ആണ്.