Category: Bundesliga

അന്താരാഷ്ട്ര മത്സരങ്ങളുടെ ഇടവേളയ്ക്ക് ശേഷമുള്ള ആദ്യ ബുണ്ടസ് ലീഗ മത്സരത്തിൽ വിജയം കണ്ടു ബയേർ ലെവർകുസൻ. കഴിഞ്ഞ സീസണിൽ ലീഗിൽ പരാജയം അറിയാതെ ജേതാക്കൾ ആയ അവർ മുൻ മത്സരത്തിൽ ആർ.ബി ലെപ്സിഗിനോട് പരാജയം നേരിട്ടിരുന്നു. ഇന്ന് ഹോഫൻഹെയിമിനെ ഒന്നിനെതിരെ നാലു ഗോളുകൾക്ക് ആണ് സാബി അലോൺസോയുടെ ടീം ജയം കണ്ടത്. 2 ഗോളുകളും 1 അസിസ്റ്റും ആയി തിളങ്ങിയ മുന്നേറ്റനിര താരം വിക്ടർ ബോണിഫേസ് ആണ് അവർക്ക് വലിയ ജയം സമ്മാനിച്ചത്.

17 മിനിറ്റിൽ മാർട്ടിൻ ടെറിയറിന്റെ ഗോളിന് അവസരം ഉണ്ടാക്കിയ ബോണിഫേസ് 30 മത്തെ മിനിറ്റിൽ ഗ്രാനിറ്റ് ശാക്കയുടെ പാസിൽ നിന്നു നേടിയ ഉഗ്രൻ ഗോളിലൂടെ ലെവർകുസൻ മുൻതൂക്കം ഇരട്ടിയാക്കി. 37 മത്തെ മിനിറ്റിൽ ബെരിഷയിലൂടെ ഹോഫൻഹെയിം ഒരു ഗോൾ മടക്കിയെങ്കിലും രണ്ടാം പകുതിയിലെ ഗോളുകളിൽ ലെവർകുസൻ ജയം പൂർത്തിയാക്കുക ആയിരുന്നു. 72 മത്തെ മിനിറ്റിൽ ഗ്രിമാൾഡോയെ വീഴ്ത്തിയതിന് ലഭിച്ച പെനാൽട്ടി വിറിറ്റ്സ് ലക്ഷ്യം കണ്ടപ്പോൾ ജെറമി ഫിർപോങിന്റെ പാസിൽ നിന്നു 75 മത്തെ മിനിറ്റിൽ തന്റെ രണ്ടാം ഗോൾ നേടിയ ബോണിഫേസ് നിലവിലെ ജേതാക്കളുടെ ജയം പൂർത്തിയാക്കി. അതേസമയം ലീഗിലെ മറ്റൊരു മത്സരത്തിൽ യൂണിയൻ ബെർലിൻ ആർ.ബി ലെപ്സിഗിനെ ഗോൾരഹിത സമനിലയിൽ തളച്ചു.

പുതിയ പരിശീലകൻ നൂറി സാഹിന് കീഴിൽ പുതിയ സീസണിലെ ആദ്യ ജർമ്മൻ ബുണ്ടസ് ലീഗ്‌ മത്സരത്തിൽ ജയം കണ്ടു ബൊറൂസിയ ഡോർട്ട്മുണ്ട്. കരുത്തരായ ഫ്രാങ്ക്ഫർട്ടിനെ എതിരില്ലാത്ത രണ്ടു ഗോളിന് ആണ് ഡോർട്ട്മുണ്ട് ജയം കണ്ടത്. സ്വന്തം മൈതാനത്ത് ഡോർട്ട്മുണ്ട് ആധിപത്യം കണ്ട മത്സരത്തിൽ രണ്ടാം പകുതിയിൽ നേടിയ ഗോളുകൾക്ക് ആണ് അവർ ജയം കണ്ടത്.

പകരക്കാരനായി ഇറങ്ങി ഇരട്ടഗോൾ നേടിയ ഇംഗ്ലീഷ് അണ്ടർ 21 താരം ജെയ്മി ഗിറ്റൻസ് ആണ് ഡോർട്ട്മുണ്ടിന് വിജയം സമ്മാനിച്ചത്. മത്സരത്തിൽ 72 മത്തെ മിനിറ്റിൽ ക്ലബിന് ആയി ആദ്യ മത്സരം കളിച്ച പാസ്‌കൽ ഗ്രോസിന്റെ പാസിൽ നിന്നു ആണ് ഗിറ്റൻസ് ഡോർട്ട്മുണ്ടിന്റെ ആദ്യ ഗോൾ നേടിയത്. തുടർന്ന് ഇഞ്ച്വറി സമയത്ത് 93 മത്തെ മിനിറ്റിൽ മറ്റൊരു പകരക്കാരനായ റമി നൽകിയ പാസിൽ നിന്നു ഗോൾ നേടിയ ജെയ്മി ഗിറ്റൻസ് ഡോർട്ട്മുണ്ട് ജയം ഉറപ്പിക്കുക ആയിരുന്നു.

തങ്ങളുടെ മുൻ താരം നൂറി സാഹിനെ പരിശീലകൻ ആയി എത്തിക്കാൻ ബൊറൂസിയ ഡോർട്ട്മുണ്ട് ശ്രമം. നേരത്തെ ചാമ്പ്യൻസ് ലീഗ് ഫൈനൽ കളിച്ചെങ്കിലും പരിശീലകൻ എഡിൻ ടെർസിച് ക്ലബ് വിടും എന്നു ഡോർട്ട്മുണ്ട് അറിയിച്ചിരുന്നു. നിലവിൽ സഹ പരിശീലകൻ ആയി ഡോർട്ട്മുണ്ട് പരിശീലക ടീമിലും സാഹിൻ അംഗമാണ്. 35 കാരനായ മുൻ തുർക്കി താരത്തെ പരിശീലകൻ ആയി ഡോർട്ട്മുണ്ട് എത്തിക്കുന്നത് വലിയ പ്രതീക്ഷയോടെ തന്നെയാണ്. ബുണ്ടസ് ലീഗയിൽ അടുത്ത സീസൺ യുവ പരിശീലകർ തമ്മിലുള്ള ഏറ്റുമുട്ടൽ ആവും കാണാൻ ആവുക.

ഡോർട്ട്മുണ്ടിൽ കരിയർ തുടങ്ങിയ സാഹിൻ 2005 മുതൽ 2011 വരെ ഡോർട്ട്മുണ്ടിനു ആയി കളിച്ച സാഹിൻ പിന്നീട്‌ റയൽ മാഡ്രിഡിൽ ചേർന്നെങ്കിലും ലോണിൽ ലിവർപൂളിലും പിന്നീട്‌ ഡോർട്ട്മുണ്ടിലും കളിച്ചു. തുടർന്ന് 2014 ൽ സാഹിൻ വീണ്ടും ഡോർട്ട്മുണ്ടിൽ തിരിച്ചെത്തിയിരുന്നു. ഡോർട്ട്മുണ്ടിന്റെ ജർമ്മൻ ബുണ്ടസ് ലീഗ നേട്ടത്തിലും ചാമ്പ്യൻസ് ലീഗ് ഫൈനൽ പ്രവേശനത്തിലും സാഹിൻ പ്രധാന പങ്ക് വഹിച്ചിരുന്നു. തുർക്കിക്ക് ആയി 52 മത്സരങ്ങൾ സാഹിൻ കളിച്ചിട്ടുണ്ട്. അടുത്ത സീസണിൽ ബയേർ ലെവർകുസൻ സാബി അലോൺസോക്കും ബയേൺ മ്യൂണിക് വിൻസെന്റ് കൊമ്പനിക്ക് കീഴിൽ എത്തുമ്പോൾ അതിനെ സാഹിന്റെ മികവിൽ മറികടക്കാൻ ആവും ഡോർട്ട്മുണ്ട് ശ്രമം.

ബുണ്ടസ് ലീഗയിൽ ബയർ ലെവർകൂസൻ കിരീടത്തിലെ അടുക്കുന്നു. ഇന്ന് എഫ് സി കോളിനെ പരാജയപ്പെടുത്തിയ ലെവർകൂസൻ ലീഗിൽ ഒന്നാം സ്ഥാനത്ത് 10 പോയിന്റിന്റെ ലീഡ് നേടി. ഇന്ന് എതിരില്ലാത്ത രണ്ടു ഗോളുകൾക്കായിരുന്നു അലോൺസോയുടെ ടീമിന്റെ വിജയം.

മത്സരത്തിന്റെ പതിനാലാം മിനിറ്റിൽ ചുവപ്പ് കാർഡ് കിട്ടിയ മിഡ്ഫീൽഡർ തീൽമാൻ പോയത് കൊണ്ട് കോളിൻ പത്തു പേരുമായാണ് ഭൂരിഭാഗം സമയവും മത്സരം കളിച്ചത്. തീൽമാൻ പുറത്തേക്ക് പോകുമ്പോൾ സ്കോർ 0-0 എന്നായിരുന്നു.

കളിയുടെ 38ആം മിനിട്ടിൽ ഫ്രിങ്പോംഗിലൂടെ ലെവർകൂസൻ ലീഡ് എടുത്തു. 74ആം മിനുട്ടിൽ ഗ്രിമാൾഡോ ലെവർകൂസന്റെ വിജയം ഉറപ്പിച്ച രണ്ടാം ഗോളും നേടി. ഇതോടെ രണ്ടാം സ്ഥാനത്തുള്ള ബയേണെക്കാൾ 10 പോയിന്റ് മുന്നിലെത്താൻ ലെവർകൂസനായി. 24 മത്സരങ്ങൾ കഴിഞ്ഞപ്പോൾ 64 പോയിന്റാണ് അവർക്ക് ഉള്ളത്. രണ്ടാമതുള്ള ബയേണ് 54 പോയിന്റുമാണ് ഉള്ളത്. ഇനി ലീഗൽ 10 മത്സരങ്ങൾ മാത്രമാണ് ശേഷിക്കുന്നത്.

ബുണ്ടസ് ലീഗയിൽ ബയേണ് ഞെട്ടിക്കുന്ന പരാജയം. ഇന്ന് ഫ്രാങ്ക്ഫർടിനെ നേരിട്ട ബയേൺ മ്യൂണിക് 5-1ന്റെ വലിയ പരാജയം വഴങ്ങി. ഇന്ന് ആദ്യ 36 മിനുട്ടിൽ തന്നെ ഫ്രാങ്ക്ഫർട് മൂന്ന് ഗോളുകൾക്ക് മുന്നിൽ എത്തി. 12ആം മിനുട്ടിൽ മാർമൗഷിന്റെ ഗോളിൽ ആയിരുന്നു അവർ ആദ്യം ലീഡ് എടുത്തത്. 31ആം മിനുട്ടിൽ ദിന എബിംബെ അവരുടെ ലീഡ് ഉയർത്തി. 36ആം മിനുട്ടിൽ ലാർസൺ കൂടെ ഗോൾ നേടിയതോടെ ഫ്രാങ്ക്ഫർടിന്റെ ലീഡ് 3-0 ആയി.

44ആം മിനുട്ടിൽ കിമ്മിചിന്റെ വക ഒരു ഗോൾ ബയേൺ നേടി എങ്കിലും ഗുണം ഉണ്ടായില്ല. രണ്ടാം പകുതിയിൽ 50ആം മിനുട്ടിൽ ദിന എംബിംബെ വീണ്ടും ഗോൾ നേടി. സ്കോർ 4-1. 60ആം മിനുട്ടിൽ നൗഫിന്റെ കൂടെ ഗോൾ വന്നതോടെ ഫ്രാങ്ക്ഫർടിന്റെ ജയം പൂർത്തിയായി.

ഈ പരാജയത്തോടെ ബയേൺ ലീഗിൽ 32 പോയിന്റുമായി രണ്ടാം സ്ഥാനത്ത് നിൽക്കുകയാണ്‌.

പ്രതിരോധത്തിൽ പരിക്കിന്റെ ഭീഷണികൾ നേരിടുന്ന ബയേൺ മ്യൂണിക്ക്, തങ്ങളുടെ മുൻ താരം ജെറോം ബോട്ടെങ്ങിനെ തിരിച്ചു കൊണ്ടു വരുന്നു. നിലവിൽ ഫ്രീ ഏജന്റ് ആയ താരത്തിന്റെ മെഡിക്കൽ പരിശോധനകൾ അടക്കം ഉടൻ പൂർത്തിയാവുമെന്ന് ഫാബ്രിസിയോ റൊമാനൊ റിപ്പോർട്ട് ചെയ്തു. എന്നാൽ കരാറിന്റെ കാര്യത്തിൽ സൂചനകൾ ഇല്ല. ആറു മാസത്തേക്കോ സീസൺ അവസാനിക്കുന്നത് വരെയോ ആവും ബോട്ടെങ്ങിന്റെ കരാർ. നിലവിൽ ടീമിനോടൊപ്പം ചേർന്ന് ബോട്ടെങ്, താരങ്ങൾക്കൊപ്പം പരിശീലനവും ആരംഭിച്ചു കഴിഞ്ഞു.

കിം മിൻ ജെ, മത്തിയാസ് ഡി ലൈറ്റ് എന്നിവർക്ക് പരിക്കിന്റെ ഭീഷണി ഉണ്ട്. കഴിഞ്ഞ വാരം ഉപമങ്കാനോക്കും പരിക്ക് ഉള്ളതായി ടൂക്കൽ വെളിപ്പെടുത്തി. ഇതിനെല്ലാം പുറമെ പകരക്കാരനായി ടീമിലുള്ള യുവതാരം തരെക് ബുഷ്മാൻ മസിൽ ഇഞ്ചുറി കാരണം കളത്തിലേക്ക് മടങ്ങി എത്താൻ വൈകുമെന്നതും ഉടൻ മറ്റൊരു താരത്തിനെ എത്തിക്കാൻ ബയേണിനെ പ്രേരിപ്പിച്ചു. പത്ത് സീസണിലായി ഇരുന്നൂറ്റി ഇരുപതോളം മത്സരങ്ങൾ ബയേൺ ജേഴ്സിയിൽ ഇറങ്ങിയിട്ടുള്ള ബോട്ടെങ്, 2021ലാണ് ലിയോണിലേക്ക് ചേക്കേറുന്നത്. എന്നാൽ കഴിഞ്ഞ സീസണിൽ കരാർ അവസാനിച്ചതോടെ ഭാവിയിൽ താരം ടീമിൽ തുടരില്ലെന്ന് ലിയോൺ അറിയിക്കുകയായിരുന്നു. ഇതു വരെ ഫ്രീ ഏജന്റ് ആയ താരത്തിനെ അലാബയുടെ പരിക്കിന്റെ പിറകെ റയൽ മാഡ്രിഡ് സമീപിച്ചിരുന്നു എന്ന അഭ്യൂഹങ്ങൾ റോമാനോ നിഷേധിച്ചിട്ടുണ്ട്. അനുഭവസമ്പന്നനായ താരത്തിന്റെ വരവ് ബയേണിന് കരുത്തേകും എന്ന കാര്യത്തിൽ സംശയമില്ല.