തുടർച്ചയായ 35 മത്സരങ്ങളിൽ പരാജയം അറിയാതെ അർജന്റീന ഖത്തർ ലോകകപ്പിലേക്ക്. ലോകകപ്പിന് മുമ്പുള്ള അവസാന സൗഹൃദമത്സരത്തിൽ ജമൈക്കയെ അർജന്റീന എതിരില്ലാത്ത മൂന്നു ഗോളുകൾക്ക് ആണ് തോൽപ്പിച്ചത്. തുടർച്ചയായ രണ്ടാം മത്സരത്തിലും ഇരട്ടഗോളുകൾ നേടിയ ക്യാപ്റ്റൻ ലയണൽ മെസ്സിയാണ് അർജന്റീനക്ക് വലിയ ജയം സമ്മാനിച്ചത്. ചെറിയ അസുഖം കാരണം മെസ്സിയെ പകരക്കാരുടെ ബെഞ്ചിൽ ഇരുത്തി ആണ് അർജന്റീന തുടങ്ങിയത്. മത്സരത്തിൽ വലിയ ആധിപത്യം അർജന്റീനക്ക് ആയിരുന്നു. മത്സരത്തിൽ 13 മത്തെ മിനിറ്റിൽ അർജന്റീന മുന്നിലെത്തി. ലൗറ്റോര മാർട്ടിനസിന്റെ മികച്ച നീക്കത്തിന് ശേഷം താരത്തിന്റെ പാസിൽ നിന്നു മാഞ്ചസ്റ്റർ സിറ്റിയുടെ ജൂലിയൻ അൽവാരസ് ആണ് അർജന്റീനക്ക് ആയി ഗോൾ നേടിയത്.
തുടർന്ന് അർജന്റീന നീക്കങ്ങൾ ജമൈക്ക നന്നായി പ്രതിരോധിച്ചു. രണ്ടാം പകുതിയിൽ മെസ്സി പകരക്കാരനായി എത്തി. അവസാന മിനിറ്റുകളിൽ മെസ്സി മാജിക് ആണ് കാണാൻ ആയത്. 86 മത്തെ മിനിറ്റിൽ ബോക്സിന് പുറത്ത് നിന്ന് വളരെ മികച്ച ഒരു ഷോട്ടിലൂടെ മെസ്സി അർജന്റീനയുടെ രണ്ടാം ഗോൾ കണ്ടത്തി. തുടർന്ന് മൂന്നു മിനിറ്റിനു ശേഷം ലഭിച്ച ഫ്രീകിക്ക് മികച്ച ഫ്രീകിക്കിലൂടെ ഗോൾ ആക്കി മാറ്റിയ മെസ്സി അർജന്റീനയുടെ വലിയ ജയം ഉറപ്പിച്ചു. കരിയറിൽ മെസ്സിയുടെ 90 മത്തെ ഗോൾ ആയിരുന്നു ഇത്. ഇതോടെ അന്താരാഷ്ട്ര കരിയറിൽ ഏറ്റവും കൂടുതൽ ഗോൾ നേടുന്ന മൂന്നാമത്തെ താരമായും ലയണൽ മെസ്സി മാറി. ഖത്തർ ലോകകപ്പിൽ പൊരുതാൻ ഉറച്ചു തന്നെയാവും മെസ്സിക്ക് കീഴിൽ അർജന്റീന എത്തുക എന്ന സൂചനയാണ് ഈ മത്സരങ്ങൾ നൽകുന്നത്.
