ഇന്ത്യ പട്ടാളത്തൊപ്പി അണിഞ്ഞ് റാഞ്ചി ഏകദിനത്തില്‍ ഓസ്ട്രേലിയയെ നേരിട്ടതില്‍ രാഷ്ട്രീയം കലര്‍ത്തുന്ന നടപടിയില്ലായെന്നും ഐസിസിയ്ക്ക് അത്തരം ഒരു നിലപാടില്ലെന്നും വ്യക്തമാക്കി ഐസിസിയുടെ സിഇഒ ഡേവിഡ് റിച്ചാര്‍ഡ്സണ്‍. ഐസിസി സ്പോര്‍ട്സും രാഷ്ട്രീയവും ഇടകലര്‍ത്തുവാന്‍ ആഗ്രഹിക്കുന്നില്ല. ഇന്ത്യയ്ക്ക് പട്ടാളത്തൊപ്പി അണിയുവാനുള്ള അവസരം നല്‍കിയത് ഒരു പ്രത്യേക സാഹചര്യത്തിലാണ്. അവര്‍ അനുമതി തേടിയപ്പോള്‍ ഒരു തവണത്തേക്കെന്ന നിലയിലാണ് ഈ അനുമതി നല്‍കിയത്.
പുല്‍വാമ ആക്രമണത്തില്‍ നഷ്ടപ്പെട്ട വ്യക്തികള്‍ക്ക് ആദരാഞ്ജലിയും അവരുടെ കുടുംബത്തിനോടുള്ള സഹാനുഭൂതിയ്ക്കു വേണ്ടിയും അവരുടെ കുടുംബത്തിനു ഫണ്ട് സ്വരൂപിക്കുവാനുള്ള ആവശ്യത്തെ മുന്‍ നിര്‍ത്തിയാണ് ഐസിസിയുടെ അനുമതി. അതിനാല്‍ തന്നെ ഇതില്‍ രാഷ്ട്രീയം കാണുന്നില്ലെന്നും ഡേവിഡ് റിച്ചാര്‍ഡ്സണ്‍ വ്യക്തമാക്കി.
സംഭവത്തിനു ശേഷം ഐസിസി മുമ്പ് ഇത്തരം ചെയ്തികള്‍ക്കെതിരെ നടപടിയെടുത്തിട്ടുണ്ടെന്നും അതിനാല്‍ തന്നെ ഇന്ത്യയ്ക്കെതിരെയും നടപടിയാവശ്യമാണെന്ന് പറഞ്ഞ് പാക്കിസ്ഥാന്‍ രംഗത്തെത്തിയിരുന്നു. ഇതിനെതിരെ ഇന്ത്യയ്ക്കെതിരെ നടപടി വേണമെന്ന് പാക്കിസ്ഥാന്‍ ഐസിസിയോട് ആവശ്യപ്പെട്ട് കത്ത് നല്‍കുകയും ചെയ്തുവെങ്കിലും അന്ന് തന്നെ ഐസിസി അതിനെ അവഗണിച്ചിരുന്നു.
