Tag: Valencia

ലീഗിൽ പ്രതിസന്ധി നേരിടുന്ന വലൻസിയ, പരിശീലകൻ ആയി മുൻ താരം റൂബൻ ബരാഹയെ എത്തിക്കുന്നു. ടീം വിട്ട പരിശീലകൻ ഗട്ടുസോക്ക് പകരക്കാരനായാണ് ബരാഹ എത്തുന്നത്. അടുത്ത ദിവസങ്ങളിൽ തന്നെ അദ്ദേഹം ചുമതല ഏറ്റെടുക്കും എന്ന് അറിയിച്ച ക്ലബ്ബ് കരാർ എത്ര കാലത്തേക്ക് ആണ് എന്ന് വെളിപ്പെടുത്തിയിട്ടില്ല. ക്ലബ്ബിന്റെ പ്രധാന ഉടമകളിൽ ഒരാളായ പീറ്റർ ലിമും മറ്റ് ഡയറക്ടർമാരും നടത്തിയ ചർച്ചകൾക്ക് ശേഷമാണ് തീരുമാനം വന്നത് എന്ന് സ്പാനിഷ് മാധ്യമങ്ങൾ റിപ്പോർട്ട് ചെയ്യുന്നു. ഗട്ടുസോയെ പുറത്താക്കിയ ശേഷം താൽക്കാലിക ചുമതല വഹിച്ചിരുന്ന വോരോ ഗോൺസാലസിന് ഔദ്യോഗിക കുറിപ്പിൽ വലൻസിയ നന്ദി അറിയിച്ചു. മറ്റൊരു മുൻ താരമായാ കാർലോസ് മർച്ചേന്നയേയും ബരാഹയുടെ കൂടെ പരിശീലക സംഘത്തിൽ കൊണ്ടു വരുന്നുണ്ട്.

2000 മുതൽ പത്ത് വർഷത്തോളം വലൻസിയയുടെ ജേഴ്‌സി അണിഞ്ഞ ഇതിഹാസ താരമാണ് ബരാഹ. ലാ ലീഗ, കോപ്പ ഡെൽ റേയ്, യുവേഫ കപ്പ്, യുവേഫ സൂപ്പർ കപ്പ് എന്നിവ നേടിയ ടീമിൽ പങ്കാളിയായി. പിന്നീട് അത്ലറ്റികോ മാഡ്രിഡിലൂടെ അസിസ്റ്റന്റ് കോച്ച് ആയി പരിശീലന കരിയർ ആരംഭിച്ച അദ്ദേഹം, എൽഷേ, റയോ വയ്യക്കാനോ, ഗിജോൺ, റ്റെനെറിഫെ, സരഗോസ എന്നിവരെ പരിശീലിപ്പിച്ചിരുന്നു. എന്നാൽ ഒരു ക്ലബ്ബിലും കാര്യമായ ചലനങ്ങൾ ഉണ്ടാക്കാൻ സാധിക്കാതെ ഇരുന്ന ബരാഹയെ, നിലവിൽ ക്ലബ്ബ് ഉടമക്കെതിരെ വലിയ പ്രതിഷേധങ്ങൾ തീർക്കുന്ന ആരാധകരെ അടക്കാൻ വേണ്ടി മാത്രമാണോ കൊണ്ടു വരുന്നത് എന്നാണ് കണ്ടറിയേണ്ടത്. റിലെഗേഷൻ സോണിൽ എത്തിയിട്ടുള്ള വലൻസിയയെ രക്ഷിച്ചെടുക്കാൻ ബരാഹ കാര്യമായി വിയർപ്പൊഴുക്കേണ്ടി വരും. താൽക്കാലിക പരിശീലകൻ ആയിരുന്ന വോരോക്ക് കീഴിലും ജയം സ്വന്തമാക്കാൻ വലൻസിയക്ക് സാധിച്ചിരുന്നില്ല.

രണ്ടു വീതം ഗോളുകളും ഓരോ ചുവപ്പ് കാർഡും കണ്ട ആവേശ മത്സരത്തിൽ പോയിന്റ് പങ്കുവെച്ച് എസ്പാന്യോളും വലൻസിയയും. സ്വന്തം തട്ടകത്തിൽ എൺപത്തിമൂന്നാം മിനിറ്റിൽ ലീഡ് എടുത്തു വിജയം ഉറപ്പിച്ച എസ്പാന്യോളിന്റെ ഹൃദയം തകർത്ത് കൊണ്ട് ഇഞ്ചുറി ടൈമിൽ ഗോൾ കണ്ടെത്തി വിലപ്പെട്ട ഒരു പോയിന്റ് നേടിയെടുക്കാൻ വലൻസിയക്കായി. ഇതോടെ ലീഗിൽ വലൻസിയ ഏട്ടാമതും എസ്പാന്യോൾ പതിനാറാമതും സ്ഥാനം ഉറപ്പിച്ചു.

പന്തടക്കത്തിൽ വലൻസിയ ബഹുദൂരം മുന്നിൽ നിന്നെങ്കിലും ലക്ഷ്യത്തിലേക്ക് ഉന്നം വെക്കുന്നതിൽ ഇരു ടീമുകളും ഒട്ടും കുറവ് വരുത്തിയില്ല. എതിർ പാളയത്തിലേക്ക് തുടർച്ചയായി ആക്രമണം നയിച്ച ഇരു കൂട്ടർക്കും ആദ്യ പകുതിയിൽ വല കുലുക്കാൻ ആയില്ല. അതിന്റെ കുറവുകൾ എല്ലാം നികത്തുന്നതായിരുന്നു തീപാറിയ മത്സരത്തിന്റെ രണ്ടാം പകുതി. അൻപതിമൂന്നാം മിനിറ്റിൽ ഗബ്രിയേൽ പൗലിസ്റ്റയിലൂടെ എതിർ തട്ടകത്തിൽ വലൻസിയ ലീഡ് എടുത്തു. വെറും മൂന്ന് മിനിട്ടുകൾക്ക് ശേഷം ജോസെലുവിലൂടെ എസ്പാന്യോൾ തിരിച്ചടിച്ചു. തുടർന്ന് നിരവധി അവസരങ്ങൾ ഇരു ടീമുകൾക്കും തുറന്നെടുക്കാൻ സാധിച്ചു.

എൺപത്തിമൂന്നാം മിനിറ്റിൽ എസ്പാന്യോൾ രണ്ടാം ഗോൾ കണ്ടെത്തി. സെർജി ഡാർഡർ ആയിരുന്നു ഹോം ടീമിന് വേണ്ടി വല കുലുക്കിയത്. തുടർന്ന് എൺപതത്തിയഞ്ചാം മിനിറ്റിൽ മർക്കോസ് ആന്ദ്രേ ചുവപ്പ് കാർഡ് കണ്ടതോടെ വലൻസിയ മത്സരം കൈവിട്ടതായി ഉറപ്പിച്ചെങ്കിലും അത്ഭുതങ്ങൾ വരാൻ ഇരിക്കുന്നതെ ഉണ്ടായിരുന്നുള്ളൂ. ഇഞ്ചുറി ടൈമിന്റെ രണ്ടാം മിനിറ്റിൽ മാർട്ടിൻ ബ്രാത്വെറ്റും ചുവപ്പ് കാർഡ് കണ്ടതോടെ ഇരു ടീമുകളും ആളെണ്ണം തുല്യമായി. തൊണ്ണൂറ്റിയാറാം മിനിറ്റിൽ വലൻസിയ കൊമേർട്ടിലൂടെ സമനില ഗോൾ കണ്ടെത്തി. തുടർന്നും ഫൗളുകളും അവസരങ്ങളും കണ്ട മത്സരം സമനിലയിൽ തന്നെ അവസാനിച്ചു.

സ്വന്തം ഗ്രൗണ്ടിൽ നടന്ന മത്സരത്തിൽ വലൻസിയയെ അട്ടിമറിച്ച് റയോ വയ്യക്കാനോ. ഒന്നിനെതിരെ രണ്ടു ഗോളുകൾക്കാണ് വയ്യക്കാനോ വിജയം നേടിയത്. ജേതാക്കൾക്ക് വേണ്ടി പലാസോൺ ഒരു ഗോൾ കണ്ടെത്തിയപ്പോൾ മറ്റൊരു ഗോൾ വലൻസിയ താരം നിക്കോ ഗോൺസാലസിന്റെ പേരിൽ സെല്ഫ് ഗോൾ ആയി രേഖപ്പെടുത്തി. വലൻസിയയുടെ ആശ്വാസ ഗോൾ മത്സരത്തിന്റെ എക്സ്ട്രാ ടൈമിൽ പ്രതിരോധ താരം ദിയാഖബി നേടി.

മത്സരം തുടങ്ങി അഞ്ചാം മിനിറ്റിൽ തന്നെ വയ്യക്കാനോ ലീഡ് നേടി. ട്രെഹോയുടെ അസിസ്റ്റിലാണ് പലാസോൺ ഗോൾ കണ്ടെത്തിയത്. ആദ്യ പകുതിയിൽ ഗോൾ മടക്കാൻ വലൻസിയ കിണഞ്ഞു ശ്രമിച്ചെങ്കിലും നടന്നില്ല. രണ്ടാം പകുതിയിൽ മത്സരം തുടങ്ങി മിനിറ്റുകൾക്കുള്ളിൽ വയ്യക്കാനോയുടെ ലീഡ് ഇരട്ടിയായി. നിക്കോയുടെ സെൽഫ് ഗോൾ വലൻസിയക്ക് വിനയായി.

തുടർന്ന് പുതിയ താരം ജസ്റ്റിൻ ക്ലായിവേർട്ടിനെ അടക്കം വലൻസിയ പരീക്ഷിച്ചെങ്കിലും മത്സരം കൈവിട്ടു പോയിരുന്നു. അവസാനം എക്സ്ട്രാ മിനിറ്റിൽ വലൻസിയയുടെ ആശ്വാസ ഗോൾ എത്തി. ഇതോടെ ഏഴു പോയിന്റുമായി ടേബിളിൽ വലൻസിയക്ക് മുകളിൽ എത്താനും വയ്യക്കാനോക്കായി.