Tag: Transfer

പ്രീമിയർ ലീഗ് ക്ലബായ ക്രിസ്റ്റൽ പാലസ്, സ്റ്റട്ട്ഗാർട്ടിന്റെ ഫ്രഞ്ച് മിഡ്ഫീൽഡർ നൗയ്‌റോ അഹമദയെ സൈൻ ചെയ്തു. മഴ്സെയിൽ കഴിഞ്ഞ സീസൺ തുടക്കത്തിൽ ആയിരുന്നു ജർമ്മനിയിൽ എത്തിയത്. അവിടെ ഇനിയും മൂന്ന് വർഷത്തെ കരാർ ബാക്കിയുള്ളപ്പോൾ ആണ് അഹമദ ക്ലബ് വിടുന്നത്. ഈ സീസണിൽ സ്റ്റുറ്റ്ഗട്ടിനായി 16 ബുണ്ടസ്‌ലിഗ മത്സരങ്ങൾ കളിച്ച താരം രണ്ട് ഗോളുകൾ ക്ലബിനായി നേടിയിരുന്നു.

20-കാരൻ വേഴ്സറ്റൈൽ താരമാണ്‌. ഹോൾഡിംഗ് മിഡ്ഫീൽഡറായും സെന്റർ ബാക്കായും കളിക്കാനും കഴിവുള്ള താരമാണ് അഹമദ. ഇത് ക്രിസ്റ്റൽ പാലസിന്റെ വിന്റർ ട്രാൻസ്ഫർ വിൻഡോയിലെ ആദ്യ സൈനിംഗ് ആണ്.

കഴിഞ്ഞ ട്രാൻസ്ഫർ വിൻഡോയിൽ റെക്കോർഡ് സൈനിങ് നടത്തിയ നോട്ടിങ്ഹാം ഫോറെസ്റ്റ് ജനുവരിയിലും പുതിയ താരങ്ങളെ എത്തിക്കുന്നത് തുടരുന്നു. പാൽമിറാസിന്റെ മധ്യനിര താരം ഡാനിലോ ആണ് ടീം പുതുതായി നോട്ടമിട്ട താരം. കൈമാറ്റത്തിന് ടീമുകൾ തമ്മിൽ ധാരണയിൽ എത്തിയതായി ഫാബ്രിസിയോ റോമാനോ റിപ്പോർട്ട് ചെയ്തു. നേരത്തെ താരത്തെ ലോണിൽ എത്തിക്കാൻ ആയിരുന്നു ഇംഗ്ലീഷ് ടീമിന്റെ ശ്രമം എങ്കിലും പിന്നീട് ഡാനിലോയെ സ്വന്തമാക്കാൻ തന്നെ അവർ തീരുമാനിക്കുകയായിരുന്നു. ഏകദേശം പതിനെട്ട് മില്യൺ യൂറോയോളമാണ് കൈമാറ്റ തുക എന്നാണ് സൂചനകൾ. ഇത് ആഡ് ഓണുകൾ അടക്കം ഇരുപത് മില്യൺ കടന്നേക്കും.

ഇരുപത്തിയൊന്നുകാരനായ ഡാനിലോ 2020 മുതൽ പാൽമീറാസ് സീനിയർ ടീമിന്റെ ഭാഗമാണ്. നൂറ്റിമുപ്പതോളം മത്സരങ്ങൾ ടീമിന്റെ ജേഴ്‌സി അണിഞ്ഞ താരം പന്ത്രണ്ട് ഗോളുകളും സ്വന്തം പേരിലാക്കി. അവസാന നിമിഷം മൊണാക്കോയിൽ നിന്നും വെല്ലുവിളി ഉയർന്നെങ്കിലും താരവുമായി ധാരണയിൽ എത്താൻ നോട്ടിങ്ഹാമിനായി. നേരത്തെ മധ്യനിര താരം ഗുസ്താവോ സ്കാർപയേയും ജനുവരിയിൽ നോട്ടിങ്ഹാം ടീമിലേക്ക് എത്തിച്ചിരുന്നു.

എസ്പാന്യോൾ മുന്നേറ്റത്തിന്റെ കുന്തമുനയായിരുന്ന റൗൾ ഡേ തോമസ് ഒടുവിൽ ടീം വിടുന്നു. ടീമിന്റെയും ആരാധരുടേയും പ്രിയ താരമായിരുന്ന റൗൾ, പക്ഷെ അടുത്തിടെ ടീമുമായി ഉടക്കിയിരുന്നു. ടീം വിടാനുള്ള നീക്കത്തിലായിരുന്നു താരം. എന്നാൽ ട്രാൻസ്ഫർ വിൻഡോയിൽ ടീം ഉദ്ദേശിച്ച ഓഫറുകൾ ഒന്നും ലഭിച്ചിരുന്നില്ല. താരത്തിന്റെ ഉയർന്ന റിലീസ് ക്ലോസും കാരണമായി. അതേ സമയം റയോ വയ്യക്കാനോയുമായുള്ള ചർച്ചകൾക്കിടെ റയോ പ്രെസിഡണ്ട് പ്രെസയെ താരത്തിന്റെ ഏജന്റ് കയ്യേറ്റം ചെയ്തത് വരെ നീണ്ട വലിയ നാടകങ്ങൾക്കാണ് ഇതോടെ അവസാനമാകുന്നത്.

എട്ട് മില്യൺ യൂറോയാണ് റയോ വയ്യക്കാനോ കൈമാറ്റ തുകയായി നൽകുന്നത്. മൂന്ന് മില്യൺ ആഡ് ഓണായും ഉൾപ്പെടുത്തിയിട്ടുണ്ട്. നാല് വർഷത്തെ കരാർ ഒരു വർഷത്തേക്ക് കൂടി നീട്ടാനും സാധിക്കും. അതേ സമയം ട്രാൻസ്ഫർ വിൻഡോ തുറക്കുന്ന ജനുവരിയിൽ മാത്രമാണ് താരത്തിന് റയോ വയ്യക്കാനോ ജേഴ്‌സിയിൽ ഇറങ്ങാൻ സാധിക്കുക. മാഡ്രിഡ് യൂത്ത് ടീമുകളിലൂടെ വളർന്ന താരം വയ്യക്കാനോ ജേഴ്‌സയിൽ അറുപതോളം മത്സരങ്ങൾ കളിച്ചിട്ടുണ്ട്. 2017മുതൽ 2019 വരെയുള്ള കാലഘട്ടത്തിൽ ആയിരുന്നു ഇത്. 2020ലാണ് എസ്പാന്യോളിൽ എത്തുന്നത്.

നിലവിൽ താരത്തെ എസ്പാന്യോൾ ടീമിൽ ഉൾപ്പെടുത്തുന്നില്ല. ബാഴ്‌സയിൽ നിന്നും ബ്രാത്വൈറ്റിനെ ടീമിൽ എത്തിക്കുകയും ചെയ്തിരുന്നു. ജനുവരി വരെ കളത്തിൽ ഇറങ്ങില്ല എന്നതിനാൽ താരത്തിന്റെ ലോകകപ്പ് സ്വപ്നങ്ങളും ഏകദേശം അവസാനിച്ചു.

ട്രാൻസ്ഫർ വിൻഡോ ഉഴുതുമറിച്ച് മികച്ച താരങ്ങളെ ടീമിൽ എത്തിക്കാൻ ഇത്തവണ ബാഴ്സലോണക്ക് ആയിരുന്നു. അപ്പോഴും പ്രതീക്ഷിച്ച താരങ്ങളെ എത്തിക്കാൻ കഴിയാതെ ഇരുന്ന രണ്ട് പൊസിഷനുകൾ ആയിരുന്നു റൈറ്റ് – ലെഫ്റ്റ് ബാക്ക് സ്ഥാനങ്ങൾ. ഈ സ്ഥാനങ്ങളിലേക്ക് അടുത്ത സീസണിന് മുൻപ് താരങ്ങളെ എത്തിക്കാൻ ബാഴ്സലോണക്ക് പദ്ധതിയുണ്ട്. റൈറ്റ് ബാക്ക് സ്ഥാനത്തേക്ക് ഒരു താരത്തെ ടീം കണ്ടു വെച്ചു കഴിഞ്ഞു എന്നാണ് ഇപ്പോൾ വരുന്ന സൂചനകൾ. അമേരിക്കയിൽ ലോസ് അഞ്ചലസ് ഗാലക്സിക്ക് വേണ്ടി കളിക്കുന്ന മെക്സിക്കൻ താരം ഹൂലിയൻ അരാഹുവോ ആണ് ഈ താരം.

ഈ ട്രാൻസ്ഫർ വിൻഡോയിൽ തന്നെ താരത്തിന്റെ പേര് ബാഴ്‌സയുടെ പരിഗണനയിൽ വന്നിരുന്നു. എന്നാൽ ചർച്ചകൾ ഒന്നും നടന്നിരുന്നില്ല. കാലിഫോർണിയയിൽ ജനിച്ച ഇരുപത്തിയൊന്നുകാരനായ താരം ജൂനിയർ തലത്തിൽ അമേരിക്കക്ക് വേണ്ടിയും പിന്നീട് സീനിയർ തലത്തിലും ഒരു മത്സരം അമേരിക്കൻ ദേശിയ ടീമിന് വേണ്ടി കളിച്ചു. എന്നാൽ പിന്നീട് ഇരട്ട പൗരത്വം ഉള്ള അരാഹുവോ മെക്സിക്കൻ ടീമിലേക്ക് മാറുകയായിരുന്നു. എഫ്സി പോർട്ടോയും താരത്തിന് വേണ്ടി അടുത്തിടെ ശ്രമങ്ങൾ നടത്തിയതായി സൂചന ഉണ്ടായിരുന്നു.

മുൻപ് ബാഴ്‌സലോണയുടെ അരിസോണയിലുള്ള അക്കാദമിയിൽ താരം പരിശീലനം നേടിയിട്ടുണ്ട്. താരത്തിന്റെ പ്രകടനം പല യൂറോപ്യൻ ടീമുകളുടെയും ശ്രദ്ധ ആകർഷിച്ചിരുന്നു. സെർജിന്യോ ഡെസ്റ്റിന് ടീമിന് പുറത്തേക്കുള്ള വഴി തേടിയ ബാഴ്‌സലോണക്ക് നിലവിൽ സെർജി റോബർട്ടോ, ബെല്ലാരിൻ എന്നിവരാണ് റൈറ്റ് ബാക്ക് സ്ഥാനത്ത് ഉള്ളത്. കഴിഞ്ഞ മത്സരങ്ങളിൽ ജൂൾസ് കുണ്ടേയെ സാവി ഈ സ്ഥാനത്ത് പരീക്ഷിച്ചിരുന്നു. ദീർഘ കാലത്തേക്ക് റൈറ്റ് ബാക്ക് സ്ഥാനത്തെക്കുള്ള ടീമിന്റെ ലക്ഷ്യമായാണ് അരാഹുവോയെ ബാഴ്‌സലോണ കാണുന്നത്.

ആർബി ലെപ്സിഗ് താരം ഇലയ്ക്സ് മോറിബ വലൻസിയയിൽ. പത്തൊൻപത്കാരനായ മധ്യനിര താരം ഒരു വർഷത്തെ ലോണിലാണ് വലൻസിയയിലേക്ക് എത്തുന്നത്. നേരത്തെ ജനുവരി മുതൽ വലൻസിയയിൽ ലോണിൽ കളിക്കുകയായിരുന്ന താരം ലോൺ കാലാവധി അവസാനിച്ച് ലെപ്സീഗിലേക്ക് മടങ്ങിയിരുന്നു. ശേഷം അവസരങ്ങൾ കുറവായതിനാൽ പുതിയ തട്ടകം തേടുകയായിരുന്നു.

കാർലോസ് സോളർ പിഎസ്ജിയിലേക്ക് ചേക്കേറിയതോടെയാണ് ട്രാൻസ്ഫർ വിൻഡോയുടെ അവസാന മണിക്കൂറുകളിൽ വീണ്ടും മോറിബയെ എത്തിക്കാനുള്ള തീരുമാനം വലൻസിയ എടുത്തത്. മുൻപ് ലോണിൽ എത്തിയ കാലയളവിൽ പതിനാല് ലീഗ് മത്സരങ്ങളിൽ ടീമിനായി കളിച്ചിരുന്നു. 2021ലാണ് മോറിബ ബാഴ്‌സലോണ വിട്ട് ലെപ്സീഗിൽ എത്തുന്നത്. കോമാന് കീഴിൽ അവസരം ലഭിച്ചിട്ടും താരം ടീം വിടാനുള്ള തീരുമാനം എടുക്കുകയായിരുന്നു.

ബാഴ്സലോണ മുന്നേറ്റ താരം മാർട്ടിൻ ബ്രാത്വൈറ്റ് എസ്പാന്യോളിൽ. താരം പുതിയ ക്ലബ്ബിൽ മെഡിക്കൽ പരിശോധനകൾ പൂർത്തിയാക്കി. എന്നാൽ കൈമാറ്റം പൂർത്തിയക്കണമെങ്കിൽ ബാഴ്‌സലോണയുമായുള്ള നിലവിലെ കരാർ റദ്ദാക്കേണ്ടതുണ്ട്. ഈ ദിവസം തന്നെ അതുണ്ടാകും എന്നാണ് സൂചനകൾ. നേരത്തെ സ്‌പെയിനിൽ നിന്നടക്കം ഓഫറുകൾ ഉണ്ടായിരുന്നെങ്കിലും അതെല്ലാം താരം തള്ളിക്കളഞ്ഞിരുന്നു. എസ്പാന്യോളിൽ എത്തുമ്പോൾ ബാഴ്‌സലോണ നഗരത്തിൽ തന്നെ തുടരാനും താരത്തിനാകും.

മൂന്ന് വർഷത്തെ കരാർ ആവും ബ്രാത്വൈറ്റ് എസ്പാന്യോളിൽ ഒപ്പിടുക. മുന്നേറ്റ താരം റൗൾ ഡെ തോമസ് ടീം വിടുമെന്ന അഭ്യൂഹങ്ങൾ ശക്തമായിരിക്കെ അതിന് ശേഷം പുതിയ താരത്തെ എത്തിക്കാൻ ആയിരുന്നു എസ്പാന്യോളിന്റെ പദ്ധതി. എന്നാൽ ട്രാൻസ്‌ഫർ വിൻഡോ അവസാന ദിനം ആയിട്ടും ക്ലബ്ബുമായി ചെറിയ ഉടക്കിൽ എത്തിയ റൗൾ ഡെ തോമസ് ടീം വിടുന്ന ലക്ഷണമൊന്നും ഇല്ല. ഇതിന് പിറകെയാണ് ബ്രാത്വൈറ്റിനെ എത്തിക്കാൻ അവർ തീരുമാണിച്ചത്. ബാഴ്‌സലോണ ഫ്രീ ഏജന്റ് ആക്കിയതിന് ശേഷം താരത്തെ എസ്പാന്യോൾ ജേഴ്‌സിയിൽ കാണാം.