ഉടമ വിശായ് ശ്രീവദനപ്രഭയുടെ അപകട മരണത്തിന് ശേഷം ലെസ്റ്റർ സിറ്റി ഇന്ന് ആദ്യ മത്സരത്തിന് ഇറങ്ങും. കാർഡിഫ് സിറ്റിയാണ് ഇന്ന് അവരുടെ എതിരാളികൾ. കാർഡിഫിന്റെ മൈതാനത്താണ് മത്സരം അരങ്ങേറുന്നത്.ഇന്ന് രാത്രി 8.30 നാണ് മത്സരം കിക്കോഫ്.
ഇന്നത്തെ മത്സരത്തിന്റെ ഫലത്തിന് പ്രത്യേകതകൾ ഒന്നും ഇല്ലെങ്കിലും ശ്രീവദനപ്രഭക്ക് വേണ്ടി ജയിക്കാനാവും ശ്രമം എന്ന് ലെസ്റ്റർ പരിശീലകൻ ക്ലോഡ് പ്യുവൽ പറഞ്ഞിട്ടുണ്ട്. ലെസ്റ്റർ ക്യാപ്റ്റൻ വെസ് മോർഗൻ സസ്പെൻഷൻ കഴിഞ്ഞു തിരിച്ചെത്തുന്നത് അവർക്ക് ആശ്വാസമാകും. മാനസികമായി തളർന്ന സഹ താരങ്ങൾക്ക് ഊർജമാകാൻ ക്യാപ്റ്റന് കഴിഞ്ഞേക്കും. പരിക്ക് മാറാത്ത അമർത്തി ഇന്ന് കളിക്കാൻ സാധ്യതയില്ല.
കാർഡിഫ് താരം ജോ റോൾസിന് സസ്പെൻഷൻ കാരണം ഇന്ന് കളിക്കാനാവില്ല. 1962 ന് ശേഷം ഇരു ടീമുകളും വീണ്ടും തമ്മിൽ ഏറ്റു മുട്ടുമ്പോൾ ചരിത്രപരമായ ജയം തന്നെയാവും ഇരു ടീമുകളുടെയും ലക്ഷ്യം.
