Tag: Leicester City

പ്രീമിയർ ലീഗിൽ നിന്ന്തരം താഴ്ത്തപ്പെട്ടതിന് പിന്നാലെ ലെസ്റ്ററിനോട് കനത്ത തോൽവിയേറ്റുവാങ്ങി ഹഡേർസ്ഫീൽഡ്. ഇന്ന് സ്വന്തം ഗ്രൗണ്ടിൽ നടന്ന മത്സരത്തിൽ ഒന്നിനെതിരെ നാല് ഗോളുകൾക്കാണ് ഹഡേർസ്ഫീൽഡ് ലെസ്റ്ററിനോട് തോറ്റത്. ലെസ്റ്ററിന് വേണ്ടി ഇരട്ട ഗോൾ നേടിയ ജാമി വാർഡിയാണ് തിളങ്ങിയത്. തുടക്കം മുതൽ മത്സരത്തിൽ പൂർണ ആധിപത്യം പുലർത്തിയ ലെസ്റ്റർ ടിലെമൻസിന്റെ ഗോളിൽ ആദ്യ പകുതിയിൽ തന്നെ മുൻപിലെത്തി.

തുടർന്ന് രണ്ടാം പകുതിയുടെ തുടക്കത്തിൽ തന്നെ വാർഡിയിലൂടെ ലെസ്റ്റർ രണ്ടാമത്തെ ഗോളും നേടി. എന്നാൽ മത്സരത്തിന്റെ 52ആം മിനുട്ടിൽ ലഭിച്ച പെനാൽറ്റി ഗോളാക്കി മോയ് ഹഡേർസ്ഫീൽഡിന് നേരിയ പ്രതീക്ഷ നൽകിയെങ്കിലും 79ആം മിനുറ്റിൽ മാഡിസണും 84 മിനുറ്റിൽ പെനാൽറ്റിയിലൂടെ വാർഡിയും ഗോൾ നേടി ലെസ്റ്ററിന്റെ ഗംഭീര വിജയമുറപ്പിച്ചു. ജയത്തോടെ വാറ്റ്ഫോർഡിനെയും വോൾവ്സിനെയും മറികടന്ന് ലെസ്റ്റർ പോയിന്റ് പട്ടികയിൽ ഏഴാം സ്ഥാനത്തെത്തി.

ഇംഗ്ലീഷ് പ്രീമിയർ ലീഗിൽ ലെസ്റ്റർ വിജയകുതിപ്പ് തുടരുന്നു. ബ്രെണ്ടൻ റോഡ്‌ജെർസ് വന്ന ശേഷമുള്ള മൂന്നാമത്തെ വിജയമാണ് ഇന്നവർ ബോൺമൗത്തിനെതിരെ നേടിയത്. എതിരില്ലാത്ത 2 ഗോളുകൾക്കാണ് ലെസ്റ്റർ ജയിച്ചു കയറിയത്. ഇതോടെ ലീഗ് ടേബിളിൽ 8 ആം സ്ഥാനത്ത് എത്തിയ ലെസ്റ്റർ യൂറോപ്യൻ ഫുട്‌ബോൾ യോഗ്യത സാധ്യതയും സജീവമാക്കി.

ആദ്യ പകുതിയിൽ ക്യാപ്റ്റൻ വെസ് മോർഗനിലൂടെയാണ് ലെസ്റ്റർ ലീഡ് നേടിയത്. 11 ആം മിനുട്ടിൽ ബെൻ ചിൽവെലിന്റെ അസിസ്റ്റിൽ നിന്നായിരുന്നു ക്യാപ്റ്റന്റെ ഗോൾ. രണ്ടാം പകുതിയിൽ കളി തീരാൻ 8 മിനുട്ട് ശേഷിക്കെ വാർഡിയും ഗോൾ നേടിയതോടെ എഡി ഹോവേയുടെ ടീമിന്റെ സമനില പ്രതീക്ഷകളും അസ്തമിച്ചു. അന്തരിച്ച ലെസ്റ്റർ ഉടമ വിഷായ് ശ്രീവദനപാരയുടെ 61 ആം പിറന്നാൾ ദിനത്തിൽ ജയിക്കാനായതും ലെസ്റ്റർ ആരാധകർക്ക് ആവേശം നൽകുന്ന ഒന്നായി.

പ്രീമിയർ ലീഗിൽ ഫുൾഹാമിന്റെ സമയത്തിന് അവസാനമാവുമെന്ന് സൂചന. ഇന്ന് നടന്ന മത്സരത്തിൽ ലെസ്റ്റർ സിറ്റിയോടാണ് ഫുൾഹാം ഒന്നിനെതിരെ മൂന്ന് ഗോളുകൾക്ക് തോറ്റത്. ഒരു വേള ലെസ്റ്ററിനെതിരെ പൊരുതി സമനില പിടിച്ചെങ്കിലും മത്സരത്തിന്റെ അവസാന മിനിറ്റുകളിൽ ഇരട്ട ഗോൾ നേടിയ വാർഡിയുടെ പ്രകടനം അവരുടെ തോൽവി ഉറപ്പിക്കുകയായിരുന്നു. കഴിഞ്ഞ ദിവസം ലെസ്റ്റർ പരിശീലകനായി ചുമതലയേറ്റ ബ്രെണ്ടൻ റോജേഴ്സിന്റെ ആദ്യ ഹോം മത്‌സരത്തിൽ തന്നെ ജയം കണ്ടെത്താനും ലെസ്റ്ററിനായി.

മത്സരം തുടങ്ങി 21ആം മിനുട്ടിൽ തന്നെ ലെസ്റ്റർ മുൻപിലെത്തി. ടീലമെൻസ് ആണ് വാർഡിയുടെ നിസ്വാര്‍ത്ഥമായ പാസിൽ നിന്ന് ഗോൾ നേടിയത്. എന്നാൽ രണ്ടാം പകുതി തുടങ്ങി ആറാം മിനുറ്റിൽ തന്നെ ഫുൾഹാം സമനില പിടിച്ചു. പകരക്കാരനായി ഇറങ്ങിയ അയിറ്റെയാണ് ഗോൾ നേടിയത്. എന്നാൽ 78ആം മിനിറ്റിലും 86ആം മിനുട്ടിലും ഗോൾ അടിച്ച് വാർഡി ഫുൾഹാമിന്റെ തോൽവി ഉറപ്പിക്കുകയായിരുന്നു. ലെസ്റ്റർ സിറ്റിക്ക് വേണ്ടി 100 ഗോൾ എന്ന നേട്ടവും ഇന്നത്തെ ഗോളോടെ വാർഡി സ്വന്തമാക്കി. തോൽവിയോടെ പ്രീമിയർ ലീഗിൽ 8 മത്സരങ്ങൾ മാത്രം ബാക്കി നിൽക്കെ 17ആം സ്ഥാനത്തുള്ള ബേൺലിയെക്കാൾ 13 പോയിന്റ് പിറകിലാണ് ഫുൾഹാം.

ഇംഗ്ലീഷ് പ്രീമിയർ ലീഗിലേക്കുള്ള മടങ്ങി വരവിൽ ബ്രെണ്ടൻ റോഡ്ജേഴ്സിന് നിരാശ തുടക്കം. വാട്ട്ഫോഡിനെതിരെ തോൽവി വഴങ്ങിയാണ് ലെസ്റ്റർ പരിശീലക അരങ്ങേറ്റം റോഡ്ജേഴ്‌സ് നടത്തിയത്. ഒന്നിനെതിരെ 2 ഗോളുകൾക്കാണ് വാട്ട്ഫോർഡ് ലെസ്റ്ററിനെ വീഴ്ത്തിയത്. ഇഞ്ചുറി ടൈമിൽ വഴങ്ങിയ ഗോളാണ് ലെസ്റ്ററിന് പോയിന്റ് നഷ്ടപ്പെടുത്തിയത്.

മത്സരത്തിന്റെ തുടക്കത്തിൽ തന്നെ ലെസ്റ്ററിന് തിരിച്ചടിയായിരുന്നു. ആദ്യത്തെ 5 മിനുട്ടിൽ തന്നെ അവർ 1 ഗോളിന് പിറകിലായി. ജെറാർഡ് ഡെലഫോയുവിന്റെ അസിസ്റ്റിൽ ക്യാപ്റ്റൻ ഡീനിയാണ് വാട്ട്ഫോഡിന് ലീഡ് സമ്മാനിച്ചത്. രണ്ടാം പകുത്തിൽ പക്ഷെ ലെസ്റ്റർ സമനില ഗോൾ നേടി. 75 ആം മിനുട്ടിൽ ജാമി വാർഡിയാണ് ഗോൾ നേടിയത്. മത്സരം സമനിലയിൽ അവസാനിക്കും എന്ന ഘട്ടത്തിൽ പക്ഷെ ആന്ദ്രെ ഗ്രെ വാട്ട്ഫോഡിന്റെ രക്ഷക്കെത്തി. ഇത്തവണ ഡീനിയാണ് അസിസ്റ്റ് ചെയ്‌തത്‌.

ജയത്തോടെ 43 പോയിന്റുള്ള വാട്ട്ഫോർഡ് ലീഗിൽ എട്ടാം സ്ഥാനത്താണ്. 35 പോയിന്റുള്ള ലെസ്റ്റർ 11 ആം സ്ഥാനത്തും.

ലെസ്റ്റർ സിറ്റിയുടെ പരിശീലകനായി മുൻ ലിവർപൂൾ പരിശീലകൻ ബ്രെണ്ടൻ റോഡ്ജേഴ്‌സ് നിയമിതനായി. ബ്രെണ്ടനുമായി കരാറിൽ എത്തിയ വിവരം ലെസ്റ്റർ ഔദ്യോഗികമായി സ്ഥിതീകരിച്ചു. സെൽറ്റിക് പരിശീലകനായി റോഡ്ജേഴ്സിന് ലെസ്റ്ററുമായി സംസാരിക്കാൻ അനുമതി നൽകിയതായി സെൽറ്റിക്ക് നേരത്തെ വ്യക്തമാക്കിയിരുന്നു.

46 വയസുകാരനായ ബ്രെണ്ടൻ 2022 വരെയാണ് ക്ലബ്ബ്മായി കരാർ ഒപ്പിട്ടിരിക്കുന്നത്. സെൽറ്റിക്കിനൊപ്പം 7 ഡൊമസ്റ്റിക് കിരീടങ്ങൾ നേടിയ ശേഷമാണ് ബ്രെണ്ടൻ പ്രീമിയർ ലീഗിലേക്ക് തിരിച്ചെത്തുന്നത്. നേരത്തെ സ്വാൻസി സിറ്റിയെയും അദ്ദേഹം പരിശീലിപിച്ചിട്ടുണ്ട്. തന്റെ അനുഭവ സമ്പത്തും ലെസ്റ്ററിലെ മികച്ച കളിക്കാരുടെ സഹായവും കൂടിയാവുമ്പോൾ നിരവധി നേട്ടങ്ങൾ കൊയ്യാനാവും എന്ന പ്രതീക്ഷ ബ്രെണ്ടൻ പങ്കുവച്ചു.

ഗൂഡിസൻ പാർക്കിൽ എവർട്ടനെ വീഴ്ത്തി ലെസ്റ്റർ സിറ്റി 2019 ലെ ആദ്യ പ്രീമിയർ ലീഗ് മത്സരത്തിൽ ജയം സ്വന്തമാക്കി. ജാമി വാർഡി നേടിയ ഏക ഗോളാണ് മത്സര ഫലം നിർണയിച്ചത്. ജയത്തോടെ 31 പോയിന്റുള്ള ലെസ്റ്റർ ലീഗിൽ 7 ആം സ്ഥാനത്തെത്തി. 27 പോയിന്റുള്ള എവർട്ടൻ പത്താം സ്ഥാനത്താണ്.

മാർക്കോസ് സിൽവയുടെ ആക്രമണ നിരയെ വിജയകരമായി പ്രതിരോധിച്ചതാണ് ലെസ്റ്റർ ജയം നേടിയത്. മത്സരത്തിൽ ലെസ്റ്റർ ഗോളിലേക്ക് കേവലം 1 ഷോട്ട് മാത്രമാണ് എവർട്ടന് തൊടുക്കാനായത്. ഗോൾ രഹിതമായ ആദ്യ പകുതിക്ക് ശേഷം 58 ആം മിനുട്ടിലാണ് ലെസ്റ്ററിന്റെ വിജയ ഗോൾ പിറന്നത്. പെരേരയുടെ പാസിൽ നിന്നാണ് വാർഡി ഗോൾ നേടിയത്. പിന്നീടുള്ള സമയമത്രയും കാര്യമായ ശ്രമങ്ങൾ നടത്താൻ എവർട്ടന് സാധിക്കാതെ വന്നതോടെ ലെസ്റ്ററിന് കാര്യങ്ങൾ എളുപ്പമായി.

ഇഞ്ചുറി ടൈം ഗോളിൽ ലെസ്റ്ററിനെ വീഴ്ത്തി കാർഡിഫ് സിറ്റിക്ക് നിർണായക ജയം. ലെസ്റ്റർ പെനാൽറ്റി നഷ്ടപ്പെടുത്തിയ മത്സരത്തിൽ വിക്ടർ കമരാസ നേടിയ ഗോളാണ് വാർനോക്കിന്റെ ടീമിന് ജയം സമ്മാനിച്ചത്. ഈ സീസണിൽ ആദ്യമായാണ് കാർഡിഫ് ഒരു എവേ മത്സരം ജയിക്കുന്നത്.

ആദ്യ പകുതിയിൽ പുലർത്തിയ ആധിപത്യം ഗോളാക്കി മറ്റാനാവാതെ വന്നതിന് ലെസ്റ്ററിന് കനത്ത വിലയാണ് നൽകേണ്ടി വന്നത്. രണ്ടാം പകുതിയിൽ ലഭിച്ച പെനാൽറ്റി ജെയിംസ് മാഡിസൻ നഷ്ടപ്പെടുത്തിയതും അവർക്ക് വൻ തിരിച്ചടിയായി. കളി സമനിലയിൽ അവസാനിക്കും എന്ന ഘട്ടത്തിലാണ് കാർഡിഫിന്റെ ഈ സീസണിലെ മികച്ച താരങ്ങളിൽ ഒരാളായ കമരാസ വിജയഗോളുമായി എത്തിയത്. 92 ആം മിനുട്ടിലാണ് ലെസ്റ്ററിന്റെ ഹൃദയം തകർത്ത ഗോളുമായി കമരാസ കാർഡിഫ് സിറ്റിയുടെ ഹീറോ ആയത്.

ജയത്തോടെ 18 പോയിന്റുമായി 16 ആം സ്ഥാനത്താണ് കാർഡിഫ്. ലെസ്റ്റർ 28 പോയിന്റുമായി എട്ടാം സ്ഥാനത്തും.

ഇംഗ്ലീഷ് പ്രീമിയർ ലീഗിൽ ലെസ്റ്റർ സിറ്റിക്ക് സ്വന്തം മൈതാനത്ത് ലെസ്റ്ററിന് ഗോൾ രഹിത സമനില. ബേൺലിയാണ് അവരെ സമനിലയിൽ തളച്ചത്. സമനിലയോടെ 17 പോയന്റ് ഉള്ള ലെസ്റ്റർ 10 ആം സ്ഥാനത്താണ്. 9 പോയിന്റുള്ള ബേൺലി 15 ആം സ്ഥാനത്താണ്.

ലെസ്റ്റർ ഉടമ വിശായി ശ്രീവദനപ്രഭ അപകടത്തിൽ മരിച്ച ശേഷമുള്ള ആദ്യ ഹോം മത്സരത്തിനാണ് ലെസ്റ്റർ ഇന്നിറങ്ങിയത്. മത്സരത്തിൽ ഉടനീളം പുലർത്തിയ ആധിപത്യം ഗോളാക്കി മാറ്റുന്നതിൽ പരാജയപ്പെട്ടതാണ് ലെസ്റ്ററിന് ജയം തടഞ്ഞത്. പലപ്പോഴും ഭാഗ്യം കൊണ്ട് മാത്രമാണ് ബേൺലി ഗോൾ വഴങ്ങാതെ രക്ഷപെട്ടത്. അവരുടെ ഗോളി ജോ ഹാർട്ടിന്റെ മികച്ച സേവുകളും അവരുടെ രക്ഷക്ക് എത്തി.