ആറ് താരങ്ങള് പൂജ്യത്തിനു പുറത്തായെങ്കിലും ജയം സ്വന്തമാക്കി മുംബൈ
പഞ്ചാബിനെതിരെ 35 റണ്സിന്റെ വിജയം സ്വന്തമാക്കി തുടര്ച്ചയായ രണ്ടാം ജയം കരസ്ഥമാക്കി മുംബൈ. ഇന്ന് പഞ്ചാബിനെതിരെ 150/5 എന്ന നിലയില് നിന്ന് 155 റണ്സിനു ഓള്ഔട്ട് ആയ മുംബൈ പഞ്ചാബിനെ 120 റണ്സിനു ഓള്ഔട്ടാക്കിയാണ് ജയം സ്വന്തമാക്കിയത്. ധവാല് കുല്ക്കര്ണ്ണി നാല് വിക്കറ്റുമായി മുംബൈയുടെ ജയത്തിനു ചുക്കാന് പിടിച്ചു. ശുഭം രഞ്ജനേ രണ്ട് വിക്കറ്റും നേടി.
54 റണ്സ് നേടിയ ഓപ്പണര് പ്രഭ്സിമ്രാന് സിംഗ് മാത്രമാണ് പഞ്ചാബ് നിരയില് തിളങ്ങിയത്. ഗുര്കീരത്ത് മന് 24 റണ്സ് നേടി പുറത്തായി. 18.2 ഓവറിലാണ് 120 റണ്സിനു പഞ്ചാബ് ഓള്ഔട്ട് ആയത്.
ആദ്യം ബാറ്റ് ചെയ്ത മുംബൈ സൂര്യകുമാര് യാദവ്(80), ശ്രേയസ്സ് അയ്യര്(46) എന്നിവരുടെ പ്രകടനത്തില് 155 റണ്സ് നേടുകയായിരുന്നു.