പരിക്കേറ്റ രാമകൃഷ്ണ ഘോഷിന് പകരം മക്നീൽ നൊറോണ ചെന്നൈ സൂപ്പർ കിങ്സിൽ
ഐപിഎൽ 2026 സീസണിലെ അവശേഷിക്കുന്ന മത്സരങ്ങൾക്കായി പരിക്കേറ്റ രാമകൃഷ്ണ ഘോഷിന് പകരക്കാരനായി കർണാടകയിൽ നിന്നുള്ള ഓൾറൗണ്ടർ മക്നീൽ നൊറോണയെ ചെന്നൈ സൂപ്പർ കിങ്സ് ടീമിലെടുത്തു. മെയ് 3-ന് മുംബൈ ഇന്ത്യൻസിനെതിരായ മത്സരത്തിനിടെ വലതുകാലിന് പരിക്കേറ്റതിനെത്തുടർന്ന് രാമകൃഷ്ണ ഘോഷ് ടൂർണമെന്റിൽ നിന്ന് പുറത്തായിരുന്നു. 30 ലക്ഷം രൂപയ്ക്കാണ് നൊറോണ ചെന്നൈ ക്യാമ്പിലെത്തുന്നത് എന്ന് സിഎസ്കെ മാനേജ്മെന്റ് ഔദ്യോഗികമായി അറിയിച്ചു.
ആഭ്യന്തര ക്രിക്കറ്റിലെ മികച്ച പ്രകടനമാണ് നൊറോണയെ ഐപിഎല്ലിലേക്ക് എത്തിച്ചത്. 2024–25 സീസണിലെ കേണൽ സി.കെ. നായിഡു ട്രോഫിയിൽ ഏറ്റവും കൂടുതൽ റൺസ് നേടിയ താരമായിരുന്നു അദ്ദേഹം. കൂടാതെ ബിസിസിഐയുടെ നമൻ അവാർഡ്സിൽ മികച്ച പ്രകടനത്തിനുള്ള എം.എ ചിദംബരം ട്രോഫിയും നൊറോണ സ്വന്തമാക്കിയിരുന്നു. സയ്യിദ് മുഷ്താഖ് അലി ട്രോഫിയിൽ കർണാടകയ്ക്ക് വേണ്ടിയും ഈ യുവതാരം കളിച്ചിട്ടുണ്ട്.
ടൂർണമെന്റ് നിർണ്ണായക ഘട്ടത്തിലേക്ക് കടക്കുമ്പോൾ നൊറോണയുടെ ഓൾറൗണ്ട് മികവ് ടീമിന് വലിയ മുതൽക്കൂട്ടാകുമെന്നാണ് ചെന്നൈ ആരാധകരുടെ പ്രതീക്ഷ. മധ്യനിരയിൽ റൺസ് കണ്ടെത്താനും പന്തുകൊണ്ട് നിർണ്ണായക വിക്കറ്റുകൾ വീഴ്ത്താനും നൊറോണയ്ക്ക് സാധിക്കുമെന്ന് സിഎസ്കെ കണക്കുകൂട്ടുന്നു. പരിക്കുകൾ ടീമിനെ അലട്ടുന്ന സാഹചര്യത്തിൽ ഈ പുതിയ സൈനിംഗ് ചെന്നൈയുടെ പ്ലേ ഓഫ് പ്രതീക്ഷകൾക്ക് കൂടുതൽ കരുത്ത് പകരും.