ഇന്ത്യന്‍ ഒളിമ്പിക് അസോസിയേഷന്‍ പ്രസിഡന്റ് ഡോ. നരേന്ദ്ര ധ്രുവ് ബത്രയ്ക്ക് കൊല്ലത്ത് സ്വീകരണം

Staff Reporter

Download the Fanport app now!
Appstore Badge
Google Play Badge 1

കൊല്ലം ; അന്താരാഷ്ട്ര ഒളിമ്പിക് അസോസിയേഷന്‍ ഭരണസമിതിയംഗവും ഇന്ത്യന്‍ ഒളിമ്പിക് അസോസിയേഷന്‍ പ്രസിഡന്റും അന്താരാഷ്ട്ര ഹോക്കി ഫെഡറേഷന്‍ പ്രസിഡന്റുമായ ഡോ. നരേന്ദ്ര ധ്രുവ് ബത്രയ്ക്ക് കൊല്ലം ന്യൂ ഹോക്കി സ്‌റ്റേഡിയത്തില്‍ ഊഷ്മളമായ സ്വീകരണം നല്‍കി. ജില്ലാ ഒളിമ്പിക് അസോസിയേഷന്റെയും കേരള ഒളിമ്പിക് അസോസിയേഷന്റെയും ജില്ലാ സ്‌പോര്‍ട്‌സ് കൗണ്‍സിലിന്റെയും നേതൃത്വത്തിലായിരുന്നു സ്വീകരണം.

ഇതാദ്യമായി കേരളത്തിലെത്തിയ ഇന്ത്യന്‍ ഒളിമ്പിക് അസോസിയേഷന്‍ പ്രസിഡന്റിനെ ബാന്‍ഡ് മേളത്തിന്റെയും മറ്റ് വാദ്യമേളങ്ങളുടെയും അകമ്പടിയോടെ ക്രൈംബ്രാഞ്ച് ഓഫീസ് പരിസരത്ത് നിന്നും ന്യൂഹോക്കി സ്‌റ്റേഡിയത്തിലേക്ക് ആനയിച്ചു. സ്‌പോര്‍ട്‌സ് സ്‌കൂള്‍ വിദ്യാര്‍ത്ഥികള്‍, എന്‍സിസി, സ്‌കൗട്ട്, ഗൈഡ്‌സ്, മറ്റ് സന്നദ്ധസേനകള്‍,കായികതാരങ്ങള്‍, കായികപ്രേമികള്‍,നാട്ടുകാര്‍ തുടങ്ങിയവര്‍ മാര്‍ച്ച് പാസ്റ്റില്‍ അണിനിരന്നു. തുടര്‍ന്ന് നടന്ന അനുമോദന പരിപാടി ഫിഷറീസ് മന്ത്രി മേഴ്‌സിക്കുട്ടിയമ്മ ഉദ്ഘാടനം ചെയ്തു. കേരള ഒളിമ്പിക് അസോസിയേഷന്‍ പ്രസിഡന്റും കേരള ഹോക്കി പ്രസിഡന്റുമായ വി സുനില്‍കുമാര്‍ അധ്യക്ഷനായ പരിപാടിയില്‍ ഡോ. നരേന്ദ്രധ്രുവ് ബത്ര മുഖ്യാതിഥിയായിരുന്നു.

അന്താരാഷ്ട്ര മത്സരങ്ങള്‍ നടത്താനുള്ള അടിസ്ഥാനസൗകര്യങ്ങള്‍ കേരളത്തിലുണ്ടെന്ന് മുഖ്യാതിഥിയും അന്താരാഷ്ട്ര ഒളിമ്പിക് അസോസിയേഷന്‍ പ്രസിഡന്റുമായ ഡോ. നരേന്ദ്ര ധ്രുവ് ബത്ര പറഞ്ഞു. ഈ അടിസ്ഥാനസൗകര്യങ്ങള്‍ മെച്ചപ്പെടുത്തിയാല്‍ മാത്രം മതിയെന്നും കേരളത്തിന് അന്താരാഷ്ട്ര ടൂര്‍ണമെന്റുകള്‍ അനുവദിക്കുന്ന കാര്യം പരിഗണനയിലാണെന്നും ബത്ര പറഞ്ഞു. ടോക്കിയോ-2020 ഒളിമ്പിക്‌സിന്റെ ഭാഗ്യചിഹ്നത്തിന്റെ ജില്ലാതല അനാവരണം ഇന്ത്യന്‍ ഒളിമ്പിക് അസോസിയേഷന്‍ പ്രസിഡന്റ് ഡോ. നരീന്ദര്‍ ധ്രുവ് ബത്ര നിര്‍വ്വഹിച്ചു.

ജില്ലയിലെ കായിക സംഘടനകള്‍ ഡോ. നരേന്ദ്രധ്രുവ് ബത്രയെ പൊന്നാടയണിയിച്ചു. കേരള ഒളിമ്പിക് അസോസിയേഷന്‍ നടത്തുന്ന പ്രവര്‍ത്തനങ്ങളെ പ്രത്യേകം പ്രശംസിച്ച ബത്ര അഭിമാനാര്‍ഹമായ പ്രവര്‍ത്തനങ്ങള്‍ ഇനിയും തുടരണമെന്നും അദ്ദേഹം കൂട്ടിച്ചേര്‍ത്തു. ഹോക്കി ഇന്ത്യ പ്രസിഡന്റ് മുഹമ്മദ് മുഷ്താഖ് അഹമ്മദ്, ജില്ലാ കളക്ടര്‍ അബ്ദുള്‍ നാസര്‍ ഐ എ എസ്, ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് എക്‌സ് ഏണസ്റ്റ്, വൈസ് പ്രസിഡന്റ് ഡോ. കെ രാമഭദ്രന്‍, ഐ ഒ എ അസോസിയേറ്റ് എക്‌സിക്യൂട്ടീവ് അംഗം ഭോലാനാഥ് സിംഗ്,കെ ഒ എ ട്രഷറര്‍ എം ആര്‍ രഞ്ജിത്ത്,അസോസിയേറ്റ് ജോയിന്റ് സെക്രട്ടറി ആര്‍ ജയകൃഷ്ണന്‍, കെ ഒ എ വൈസ് പ്രസിഡന്റ് ഡോ. സി ബി റെജി, കേരള ഹോക്കി സെക്രട്ടറി ആര്‍ അയ്യപ്പന്‍, ട്രഷറര്‍ സി ടി സോജി, ജില്ലാ ഒളിമ്പിക് അസോസിയേഷന്‍ ചെയര്‍മാന്‍ ഡോ. വിനോദ് ലാല്‍ എന്നിവര്‍ പങ്കെടുത്തു.