ഒഡീഷ എഫ് സിക്ക് അവരുടെ ചരിത്രത്തിലെ ആദ്യ കിരീടം. ഇന്ന് ബെംഗളൂരു എഫ് സിയെ ഒന്നിനെതിരെ രണ്ടു ഗോളുകൾക്ക് തോൽപ്പിച്ച് ആണ് ഒഡീഷ എഫ് സി കിരീടത്തിൽ മുത്തമിട്ടത്. ഇരട്ട ഗോളുകളുമായി ഡിയേഗോ മൗറീസിയോ ആണ് വിജയശില്പിയായത്‌. ഐ എസ് എൽ ഫൈനലിനു പിന്നാലെ സൂപ്പർ കപ്പിലും ഫൈനലിൽ തോറ്റത് ബെംഗളൂരു എഫ് സിക്ക് വലിയ നിരാശ നൽകും.
സെമി ഫൈനൽ സ്റ്റാർട്ടിങ് ലൈൻ അപ്പിൽ നിന്ന് ഒരു മാറ്റവുമായാണ് ബെംഗളൂരു ഫൈനൽ പോരാട്ടത്തിന് ഇറങ്ങിയത്. ഹാവിയർ ഹെർണാണ്ടസിനെ പുറത്തിരുത്തി ജയേഷ് റാണയെ അവർ ആദ്യ ഇലവനിൽ ഇറക്കി. ഒഡീഷ സെമി ഫൈനൽ സ്റ്റാർട്ടിങ് ലൈൻ അപ്പിൽ നിന്ന് മാറ്റമൊന്നും വരുത്തിയില്ല.
മഴയിൽ കുതിർന്ന മൈതാനത്ത് ആദ്യ ഇരുപത് മിനുറ്റിൽ ഇരു ടീമുകളുടെ ഭാഗത്ത് നിന്നും തണുത്ത മുന്നേറ്റങ്ങൾ മാത്രമാണ് ഉണ്ടായത്. 17,18 മിനിറ്റുകളിൽ തുടർച്ചയായ മൂന്ന് കോർണറുകൾ നേടിയെടുക്കാൻ ഒഡിഷക്കായെങ്കിലും ബോക്സിൽ നിന്ന് പന്ത് ലക്ഷ്യത്തിലേക്കെത്തിക്കാൻ കഴിഞ്ഞില്ല.
പിന്നീടുള്ള മിനിറ്റുകളിൽ കളിക്ക് ചൂട് പിടിച്ചു. 23 ആം മിനുറ്റിൽ മൗറീസിയോയുടെ ഒരു മുന്നേറ്റം ഫൗളിലൂടെ തടഞ്ഞതിന് ബെംഗളൂരുവിന്റെ സുരേഷ് സിംഗിന് റഫറി മഞ്ഞ കാർഡ് ലഭിച്ചു. ഒപ്പം ഫ്രീകിക്കും കിട്ടി.
ഫ്രീകിക്ക് എടുത്ത മൗറിസിയോയുടെ കിക്ക് ബെംഗളൂരു ഗോൾകീപ്പർ ഗുർപ്രീതിന്റെ ഒരു വലിയ അബദ്ധം കാരണം വലയിലേക്ക് വീണൂം. എളുപ്പം പിടിക്കാവുന്ന പന്ത് ആണ് തന്റെ കൈകൾക്ക് ഉള്ളിലൂടെ ഗുരൊരീത് വലയിലേക്ക് ഇട്ടത്‌. സ്കോർ 1-0. തിരിച്ചടിക്കാൻ ശ്രമിച്ച ബെംഗളൂരു 28
ആം മിനുറ്റിൽ കൗണ്ടർ അറ്റക്കിൽ ഉദാന്ത സിംഗിന്റെ പാസ്സിൽ സുനിൽ ചെത്രിയുടെ കിക്കിലൂടെ ഗോളിന് അടുത്തെത്തി.
38 ആം മിനുറ്റിൽ മൗറിസിയോയുടെയും ഒഡിഷയുടെയും ഈ കളിയിലെ രണ്ടാം ഗോൾ പിറന്നു. ഇതോടെ ആദ്യ പകുതി 2-0ന് അവസാനിച്ചു. രണ്ടാം പകുതിയിൽ ബെംഗളൂരു കളിയിലേക്ക് തിരികെവരാൻ ശ്രമിച്ചു എങ്കിലും ഗോൾ വരാൻ സമയമെടുത്തു. 84ആം മിനുട്ടിൽ ഒരു പെനാൾട്ടിയിലൂടെ ബെംഗളൂരു അവരുടെ ആദ്യ ഗോൾ കണ്ടെത്തി. സ്കോർ 2-1. ഇത് അവസാന നിമിഷങ്ങൾ ആവേശകരമാക്കി. എങ്കിലും കിരീടം ഒഡീഷയുടെ കൈകളിലേക്ക് തന്നെ എത്തി.
