സാരി ലാസിയോ വിട്ടു; ഗട്ടൂസോ പകരക്കാരനായേക്കും

മൗറീസിയോ സാരി ലാസിയോയുമായുള്ള കരാർ പരസ്പര സമ്മതത്തോടെ റദ്ദാക്കി ക്ലബ്ബ് വിട്ടു. ബുധനാഴ്ചയാണ് ക്ലബ്ബ് ഇക്കാര്യം ഔദ്യോഗികമായി സ്ഥിരീകരിച്ചത്. ഒൻപതാം സ്ഥാനത്ത് സീസൺ അവസാനിപ്പിക്കേണ്ടി വന്നതും ഇറ്റാലിയൻ കപ്പ് ഫൈനലിലെ തോൽവിയും ക്ലബ്ബ് ഉടമ ക്ലോഡിയോ ലോട്ടോക്കെതിരെയുള്ള ആരാധകരുടെ പ്രതിഷേധവുമെല്ലാം സാരിയുടെ പടിയിറക്കത്തിന് കാരണമായിട്ടുണ്ട്. രണ്ടു വർഷത്തിനിടെ ഇത് രണ്ടാം തവണയാണ് സാരി ലാസിയോയിൽ നിന്ന് പടിയിറങ്ങുന്നത്.

സാരി അടുത്തതായി അറ്റലാന്റയുടെ പരിശീലക സ്ഥാനം ഏറ്റെടുക്കുമെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. എന്നാൽ അറ്റലാന്റ നിലവിൽ ഇക്കാര്യത്തിൽ ഔദ്യോഗിക സ്ഥിരീകരണമൊന്നും നൽകിയിട്ടില്ല. നിലവിൽ റാഫേൽ പല്ലാഡിനോയാണ് അറ്റലാന്റയെ പരിശീലിപ്പിക്കുന്നത്.

അതേസമയം ലാസിയോയിൽ സാരിക്ക് പകരക്കാരനായി മുൻ ഇറ്റാലിയൻ കോച്ച് ജെനാരോ ഗട്ടൂസോ എത്തുമെന്നാണ് കരുതപ്പെടുന്നത്. ലോകകപ്പ് യോഗ്യത നേടാനാവാതെ വന്നതിനെത്തുടർന്ന് ഇറ്റാലിയൻ ദേശീയ ടീമിന്റെ പരിശീലക സ്ഥാനം ഒഴിഞ്ഞ ഗട്ടൂസോയുടെ തിരിച്ചുവരവ് കൂടിയായിരിക്കും ഇത്. നിലവിൽ ലാസിയോയിലെ പ്രധാന പരിശീലക സ്ഥാനത്തേക്ക് പരിഗണിക്കപ്പെടുന്നവരിൽ മുൻനിരയിലാണ് ഗട്ടൂസോയുടെ പേരുള്ളത്.