സന്തോഷ് ട്രോഫിയിൽ ആതിഥേയരായ പഞ്ചാബ് ഫൈനലിൽ. ഇന്ന് നടന്ന ആദ്യ സെമി ഫൈനലിൽ ഗോവയെ തോൽപ്പിച്ചാണ് പഞ്ചാബ് ഫൈനലിലേക്ക് കടന്നത്. ഒന്നിനെതിരെ രണ്ടു ഗോളുകൾക്കായിരുന്നു പഞ്ചാബിന്റെ വിജയം. ഒരു ഇഞ്ച്വറി ടൈം ഗോളാണ് പഞ്ചാബിന് വിജയം നൽകിയത്. കളിയുടെ 12ആം മിനുട്ടിൽ ജസ്പ്രീത് സിംഗിലൂടെ പഞ്ചാബ് ലീഡ് എടുത്തിരുന്നു. ആ ലീഡ് 89ആം മിനുട്ട് വരെ നിലനിർത്താൻ പഞ്ചാബിനായി.
പക്ഷെ 89ആം മിനുട്ടിൽ പഞ്ചാബിനെ ഞെട്ടിച്ച് റൊണാൾഡോ ഒലിവേരയുടെ ഗോൾ പിറന്നു. സ്കോർ 1-1. കളി എക്സ്ട്രാ ടൈമിലേക്ക് നീളും എന്ന് കരുതി എങ്കിലും 92ആം മിനുട്ടിൽ പഞ്ചാബിന്റെ വിജയ ഗോൾ പിറന്നു. ഹർജീന്ദർ ആയിരുന്നു പഞ്ചാബിനെ ഫൈനലിൽ എത്തിച്ച ഗോൾ നേടിയത്. പഞ്ചാബിന്റെ 16ആം സന്തോഷ് ട്രോഫി ഫൈനൽ ആയിരിക്കും ഇത്.
ഇന്ന് വൈകിട്ട് നടക്കുന്ന രണ്ടാം സെമിയിൽ സർവീസസും കർണാടകയും തമ്മിൽ ഏറ്റുമുട്ടും.
