കേരള പ്രീമിയർ ലീഗ് സൂപ്പർ സിക്‌സിലെ ആവേശകരമായ ഏറ്റുമുട്ടലിൽ ഗോകുലം കേരളയ്‌ക്കെതിരെ വയനാട് യുണൈറ്റഡ് 2-0 ന് വിജയിച്ചു. സൂപ്പർ സിക്‌സ് റൗണ്ടിൽ ആദ്യമായി ഇറങ്ങിയ ഇരുടീമുകളും തമ്മിൽ വാശിയേറിയ പോരാട്ടമായിരുന്നു നടന്നത്. ഇരുടീമുകളും മികച്ച പ്രതിരോധം പുറത്തെടുത്തതോടെ കളിയുടെ ഭൂരിഭാഗവും ഗോൾരഹിതമായി തുടർന്നു.
എന്നാൽ, 77-ാം മിനിറ്റിൽ ശക്തമായ സ്‌ട്രൈക്കിലൂടെ അബുലായ് വലകുലുക്കിയതോടെ വയനാട് യുണൈറ്റഡ് സമനില തകർത്തു. തിരിച്ചുവരവിന് ശ്രമിച്ച ഗോകുലം കേരള സമനില ഗോളിനായി തിരഞ്ഞെങ്കിലും വയനാട് ഡിഫൻസ് ഭേദിക്കാൻ ആയില്ല. 88-ാം മിനിറ്റിൽ അമീനാണ് വയനാട് യുണൈറ്റഡിനായി രണ്ടാം ഗോൾ നേടിയത്, ഇതോടെ അവർ വിജയം ഉറപ്പിച്ചു.
മൂന്ന് പോയിന്റുമായി സൂപ്പർ സിക്‌സ് ആരംഭിച്ച വയനാടിന് ഈ വിജയം വലിയ ഊർജ്ജം നൽകും. ലീഗ് ഘട്ടത്തിലും വയനാട് യുണൈറ്റഡ് ഏവരെയും ഞെട്ടിച്ചിരുന്നു. മറുവശത്ത്, ഗോകുലം കേരളയ്ക്ക് ഈ സീസൺ കെ പി എല്ലിലെ അവരുടെ ആദ്യ പരാജയമാണ്.
