കേരള ബ്ലാസ്റ്റേഴ്‌സും അസിസ്റ്റന്റ് കോച്ച് പുരുഷോത്തമനും വേർപിരിഞ്ഞു

കൊച്ചി, ഫെബ്രുവരി 05, 2026: കേരള ബ്ലാസ്റ്റേഴ്‌സ് എഫ്.സിയും ഇന്ത്യൻ അസിസ്റ്റന്റ് കോച്ച് ടി.ജി. പുരുഷോത്തമനും പരസ്പര ധാരണയോടെ വേർപിരിയാൻ തീരുമാനിച്ചു.

2021 ൽ റിസർവ് ടീമിന്റെ മുഖ്യപരിശീലകനായാണ് പുരുഷോത്തമൻ ബ്ലാസ്റ്റേഴ്‌സിനൊപ്പം ചേരുന്നത്. പിന്നീട് അണ്ടർ-18 ടീമിന്റെ ചുമതല വഹിച്ച അദ്ദേഹത്തെ, 2023 ജൂലൈയിലാണ് സീനിയർ ടീമിന്റെ അസിസ്റ്റന്റ് കോച്ചായി നിയമിച്ചത്. 2024-25 സീസണിൽ ടീമിന്റെ ഇടക്കാല മുഖ്യപരിശീലകനായും അദ്ദേഹം സേവനമനുഷ്ഠിച്ചിട്ടുണ്ട്. യുവനിരയിലും സീനിയർ ടീമിലും ഒരേപോലെ അച്ചടക്കത്തോടും പ്രൊഫഷണലിസത്തോടും കൂടി അദ്ദേഹം ക്ലബിന് വേണ്ടി പ്രവർത്തിച്ചു.

ക്ലബ്ബിന്റെ വിവിധ തലങ്ങളിൽ പുരുഷോത്തമൻ നൽകിയ സംഭാവനകൾക്കും കഠിനാധ്വാനത്തിനും കേരള ബ്ലാസ്റ്റേഴ്‌സ് നന്ദി രേഖപ്പെടുത്തി. അദ്ദേഹത്തിന്റെ ഭാവി ഉദ്യമങ്ങൾക്ക് ക്ലബ്ബ് എല്ലാവിധ ആശംസകളും നേർന്നു.