സൗദി അറേബ്യയിൽ നടന്ന സന്തോഷ് ട്രോഫി സെമിയിൽ സർവീസസിനെ പരാജയപ്പെടുത്തി കൊണ്ട് കർണാടക ഫൈനൽ ഉറപ്പിച്ചു. ഒന്നിനെതിരെ മൂന്നു ഗോളുകൾക്ക് ആയിരുന്നു കർണാടകയുടെ വിജയം. തുടക്കത്തിൽ ഒരു ഗോളിന് പിറകിൽ പോയ ശേഷമാണ് അവർ വിജയിച്ചു കയറിയത്. നാൽപ്പതാം മിനുട്ടിൽ ബികാഷ് താപയിലൂടെ സർവീസസ് ലീഡ് എടുത്തു.
ഈ ഗോളിന് മൂന്ന് മിനുട്ടിനകൽ കർണാടക മറുപടി പറഞ്ഞു. ഒരു ഗംഭീര ഫ്രീകിക്കിലൂടെ റോബിൻ യാദവ് ആണ് കർണാടകക്ക് സമനില നൽകിയത്. ആദ്യ പകുതി അവസാനിക്കും മുമ്പ് അങ്കിതിലൂടെ കർണാടക ലീഡും നേടി. രണ്ടാം പകുതിയിൽ സുനിൽ കുമാർ കൂടെ ഗോൾ നേടിയതോടെ അവർ വിജയം ഉറപ്പിച്ചു. ഫൈനലിൽ മേഘാലയ ആകും കർണാടകയുടെ എതിരാളികൾ. ആദ്യ സെമിയിൽ മേഘാലയ പഞ്ചാബിനെ തോൽപ്പിച്ചിരുന്നു.
