Category: Europa League

യൂറോപ്പ ലീഗ് ഗ്രൂപ്പ് ഘട്ടത്തിന്റെ ചിത്രം തെളിഞ്ഞപ്പോൾ ഗ്ലാമർ പോരാട്ടങ്ങൾ ഒരുക്കി ഗ്രൂപ്പ് ബി. തങ്ങളുടെ ആദ്യ യുറോപ്യൻ പോരാട്ടത്തിന് എത്തുന്ന ബ്രൈറ്റണിന്, മുൻ യുറോപ്യൻ ചാമ്പ്യന്മാരായ അയാക്സ്, ഒളിമ്പിക് മാഴ്സെ എന്നിവരെ കൂടാതെ എഈകെ ആഥെൻസിനും ഒപ്പമാണ് സ്ഥാനം ലഭിച്ചിരിക്കുന്നത്. വമ്പൻ പോരാട്ടങ്ങൾക്ക് കെൽപ്പുള്ളതാണ് ഈ ഗ്രൂപ്പ് എന്നതിൽ സംശയമില്ല. കോൺഫറൻസ് ലീഗ്‌ ചാമ്പ്യന്മാരായ വെസ്റ്റ്ഹമിനൊപ്പം ഗ്രൂപ്പ് എയിൽ ഒളിമ്പിയാകോസ്, ഫ്രീബർഗ് എന്നിവരുണ്ട്. ലിവർപൂളിന് താരതമ്യേന എളുപ്പമുള്ള ഗ്രൂപ്പ് ആണ്.

ലെവർകൂസൻ, റോമ എന്നിവർക്കും ഗ്രൂപ്പ് ഘട്ടത്തിൽ വെല്ലുവിളി ഉയരാൻ സാധ്യതയില്ല. മുൻ ചാംപ്യന്മാരായ വിയ്യാറയലിന് റെന്നെ, മക്കബി ഹൈഫ, പനതിനയ്കോസ് എന്നിവരെ നേരിടണം. ഗ്രൂപ്പ് ഡിയിൽ അറ്റലാന്റക്കൊപ്പം സ്പോർട്ടിങ്ങും ഉൾപ്പെട്ടു. ഗ്രൂപ്പ് സിയിൽ റേഞ്ചേഴ്‌സ്, റയൽ ബെറ്റിസ് എന്നിവർ മുഖാ മുഖം വരും.

യൂറോപ്പ ലീഗ് ഗ്രൂപ്പ്;

ഗ്രൂപ്പ് എ: വെസ്റ്റ്ഹാം, ഒളിമ്പിയാകോസ്, ഫ്രീബർഗ്, ബക്കാ ടോപ്പോലാ
ഗ്രൂപ്പ് ബി: അയാക്സ്, ഒളിമ്പിക് മാഴ്‌സെ, ബ്രൈറ്റൺ, എഈകെ ആഥെൻസ്
ഗ്രൂപ്പ് സി: റേഞ്ചേഴ്‌സ്, റയൽ ബെറ്റിസ്, സ്പർടാ പ്രാഗ്, അരിസ് ലിമാസോൾ
ഗ്രൂപ്പ് ഡി: അറ്റലാന്റ, സ്പോർട്ടിങ്, സ്റ്റം ഗ്രാസ്, റോക്കോ ചെസ്ടോകൊവ
ഗ്രൂപ്പ് ഈ: ലിവർപൂൾ, ലിൻസർ അത്ലറ്റിക്, യൂണിയൻ എസ്ജി, ടോളൂസെ,
ഗ്രൂപ്പ് എഫ്: വിയ്യാറയൽ, റെന്നെ, മക്കബി ഹൈഫ, പനതിനായ്കോസ്
ഗ്രൂപ്പ് ജി: എഎസ് റോമാ, സ്ലാവിയ പ്രാഗ്, ഷെരീഫ് റ്റിരാസ്പോൾ, സെർവെറ്റ്
ഗ്രൂപ്പ് എച്: ബയേർ ലെവർകൂസൻ, ക്വാരാബാഗ്, മോൽദെ, ഹാഖൻ

യൂറോപ്പ ലീഗ് സെമി ഫൈനൽ രണ്ടാം പാദത്തിൽ റമോൻ സാഞ്ചസിൽ സെവിയ്യ യുവന്റസിനെ വരവേൽക്കുമ്പോൾ ലെവർകൂസന് സ്വന്തം തട്ടത്തിൽ മൗറിഞ്ഞോയുടെ റോമ എതിരാളികൾ. ആദ്യ പാദം കൃത്യമായ സൂചനകൾ ഒന്നും തന്നില്ലെങ്കിലും ഒരു ഗോൾ ലീഡുമായി എത്തുന്ന റോമക്ക് മാത്രമാണ് ഇതുവരെ ആശ്വസിക്കാൻ ഉള്ളത്. വെള്ളിയാഴ്‌ച പുലർച്ചെ 12.30ന് ആരംഭിക്കുന്ന മത്സരങ്ങൾ ബുഡാപെസ്റ്റിലെ പുഷ്‌കാസ് അറീനയിൽ വെച്ച് നടക്കുന്ന ഫൈനലിസ്റ്റുകളെ തീരുമാനിക്കും.

ചാമ്പ്യൻസ് ലീഗിൽ എന്ന പോലെ ഇറ്റാലിയൻ ടീമുകളുടെ മുന്നേറ്റം ആണ് യൂറോപ്പ ലീഗ് സെമിയിലും കണ്ടത്. എന്നാൽ യൂറോപ്പ ഫൈനലിൽ ഇറ്റാലിയൻ ടീം ഉണ്ടാവുമോ എന്നറിയാൻ ഇനിയും കാത്തിരിക്കണം. സീസണിൽ മികച്ച പ്രകടനം പുറത്തെടുക്കുന്ന ലെവർകൂസനെ കീഴടക്കാൻ റോമക്ക് സാധിച്ചു. എഡ്വാർഡോ ബോവേ കുറിച്ച ഗോളിന്റെ ആനുകൂല്യത്തിൽ ആണ് റോമ ലെവർകൂസനെ നേരിടാൻ എത്തുന്നത്. രണ്ടാം പാദത്തിലും നിർണായകനാവാൻ പോകുന്നത് മൗറീഞ്ഞോയുടെ തന്ത്രങ്ങൾ തന്നെ ആവും. പരിക്കേറ്റിരുന്ന ഡൈബാല, ക്രിസ് സ്മാളിങ് എന്നിവർ കഴിഞ്ഞ ദിവസം ടീമിനോടൊപ്പം പരിശീലനം നടത്തിയിരുന്നു. അതേ സമയം സ്വന്തം തട്ടകത്തിൽ റോമയെ വീഴ്ത്താൻ സാധിക്കും എന്ന ആത്മവിശ്വാസത്തിൽ ആവും സാബി ആലോൻസോയും സംഘവും. അതേ സമയം ലീഗിൽ സ്റ്റുഗർട്ടിനോട് സമനിലയിൽ കുരുങ്ങിയ ശേഷമാണ് ലെവർകൂസൻ മത്സരത്തിന് എത്തുന്നത്. റോമയും ബൊളോഗ്നക്കെതിരെ ഗോൾ രഹിത സമനിലയിൽ കുരുങ്ങിയിരുന്നു. സെമിയിൽ ടാമി അബ്രഹാം അടക്കമുള്ള മുൻനിര ഫോമാവുന്നതിനാണ് റോമ ഉറ്റു നോക്കുന്നത്. ഡൈബാലക്ക് കളത്തിൽ ഇറങ്ങാൻ കഴിയുന്ന സമയവും നിർണായകമാവും.

യുവന്റസിന്റെ തട്ടകത്തിൽ ആദ്യം ലീഡ് എടുത്തു ഞെട്ടിച്ച സെവിയ്യക്ക് പക്ഷെ, കണക്ക് കൂട്ടലുകൾ എല്ലാം പിഴച്ചു കൊണ്ട് ഇഞ്ചുറി ടൈമിൽ യുവന്റസ് സമനില ഗോൾ നേടുന്നതിനും സാക്ഷികൾ ആവേണ്ടി വന്നു. സ്വന്തം തട്ടകത്തിൽ മുൻതൂക്കം തങ്ങൾക്ക് തന്നെ എന്ന വിശ്വാസത്തിൽ ആവും സെവിയ്യ. യൂറോപ്പ പോരാട്ടങ്ങൾ വിജയിക്കാനുള്ള തന്ത്രങ്ങൾ ടീമിന് സ്വായത്തമാണ് താനും. ലീഗിൽ അവസാന മത്സരത്തിൽ വല്ലഡോളിഡിനെ എതിരില്ലാത്ത മൂന്ന് ഗോളുകൾക്ക് വീഴ്ത്തി തങ്ങളുടെ ഫോം അവർ വീണ്ടെടുക്കുകയും ചെയ്തിട്ടുണ്ട്. യുവന്റസും ലീഗിൽ ക്രിമോനീസിനെ വീഴ്ത്തിയ ശേഷമാണ് സ്പെയിനിലേക്ക് എത്തുന്നത്. സീസണിലെ ഏക കിരീടം നേടാൻ അല്ലെഗ്രിയും സംഘവും കച്ചകെട്ടി ഇറങ്ങുമ്പോൾ മികച്ചൊരു പോരാട്ടമാണ് പോരാട്ടമാണ് ഫുട്ബോൾ ആരാധകരും കാത്തിരിക്കുന്നത്. ആദ്യ പാദം കളിച്ച താരങ്ങളിൽ നിന്നും ഇരു ടീമിലും വലിയ മാറ്റങ്ങൾ ഉണ്ടാവില്ല.

യൂറോപ്പ ലീഗ് സെമി ഫൈനൽ മത്സരങ്ങൾക്ക് ആരംഭമാവുമ്പോൾ അരങ്ങൊരുങ്ങുന്നത് വമ്പൻ പോരാട്ടങ്ങൾക്ക്. വെള്ളിയാഴ്ച്ച പുലർച്ചെ നടക്കുന്ന മത്സരങ്ങളിൽ എഎസ് റോമ സ്വന്തം തട്ടകത്തിൽ ബയേർ ലവർകൂസനെ നേരിടുമ്പോൾ യുവന്റസ് അല്ലിയൻ സ്റ്റേഡിയത്തിൽ സേവിയ്യയെ വരവേൽക്കും നേരിടാൻ ഉള്ളത്. വമ്പൻ ടീമുകൾ നേർക്കുനേർ വരുമ്പോൾ ആവേശകരമായ മത്സരങ്ങൾക്കാണ് ആരാധകരും കാത്തിരിക്കുന്നത്.

ഇടർച്ചയോടെ തുടങ്ങിയ ശേഷം സീസണിൽ അതിശക്തമായ തിരിച്ചു വരവിന്റെ പാതയിൽ ആണ് സെവിയ്യ. ഒടുവിൽ മാഞ്ചസ്റ്റർ യുണൈറ്റഡിനെയും ആവേശകരമായ മത്സരത്തിൽ കീഴടക്കി പതിവ് പോലെ യൂറോപ്പ കിരീടത്തിന് വേണ്ടിയുള്ള താരങ്ങളുടെ മോഹങ്ങൾ തിരിച്ചു പിടിച്ചിട്ടുണ്ട് അവർ. എങ്കിലും ലീഗിൽ പതിനൊന്നാം സ്ഥാനത്ത് നിൽക്കുന്ന ടീമിന് അടുത്ത സീസണിൽ യുറോപ്യൻ പോരാട്ടങ്ങൾക്ക് പേര് ചേർക്കാൻ ഇത്തവണ യൂറോപ്പ കിരീടം നേടിയെ തീരൂ. സെമി കടന്ന എല്ലാ തവണയും കിരീടം നേടിയിട്ടുണ്ട് എന്ന പെരുമ ഉണ്ടെങ്കിലും ഇത്തവണ മുന്നോട്ടുള്ള വഴി കഠിനം അവർക്ക് തന്നെയെന്നതിൽ സംശയമില്ല. സീസണിൽ മറ്റ് കിരീട സാധ്യതകൾ ഇല്ലാത്ത യുവന്റസിനും യൂറോപ്പ അഭിമാന പോരാട്ടമാണ്. അല്ലേഗ്രിക്കും അടുത്ത സീസണിൽ ടീമിൽ തുടരാൻ വിജയം അനിവാര്യമാണ്. ലീഗിൽ തുടർ വിജയങ്ങളോടെ ആണ് അവർ എത്തുന്നത്. അവസാന മത്സരത്തിൽ അറ്റലാന്റയെ എതിരില്ലാത്ത രണ്ടു ഗോളിന് കീഴടക്കി. വമ്പൻ താരങ്ങൾ ഉണ്ടെങ്കിലും പെരുമക്കോത്ത പ്രകടനം സീസണിൽ പുറത്തെടുക്കാൻ ടീമിനായിട്ടില്ല. പിടിച്ചു വെച്ച പതിനഞ്ച് പോയിന്റ് തിരിച്ചു കിട്ടി ലീഗിൽ രണ്ടാം സ്ഥാനത്തേക്ക് എത്തിയ ആവേശത്തിലാണ് ടീം യൂറോപ്പിലേക്ക് എത്തുന്നത്.

പരിശീലകരുടെ പോരാട്ടം കൂടിയാണ് ലെവർകൂസൻ – റോമ മത്സരം. സാക്ഷാൽ ജോസ് മൗറീഞ്ഞോക്കെതിരെ ജർമൻ ടീമിനെ ഒരുക്കുന്നത് ഓത്തുന്നത് സീസണിൽ പുതു തന്ത്രങ്ങളുമായി എത്തിയ സാബി ആലോൻസോയാണ്. തുടർച്ചയായ 14 മത്സരങ്ങളിൽ ടീമിനെ തോൽവി അറിയാതെ നയിച്ച മുൻതാരം തന്റെ മുൻ പരിശീലകനെതിരെ എന്ത് തന്ത്രമാണ് കാത്തുവെച്ചിരിക്കുന്നത് എന്നത് കൗതുകമുണർത്തും. മൗറീഞ്ഞോ ആവട്ടെ റോമക്ക് ഒപ്പം മറ്റൊരു കിരീടം നേടാൻ ഉള്ള തയ്യാറെടുപ്പിൽ ആണ്. ടീമിന്റെ കിരീട വരൾച്ചക്ക് അറുതി വരുത്തിയ പോർച്ചുഗീസുകാരൻ വീണ്ടുമൊരു യുറോപ്യൻ കിരീടം ടീമിന് സമ്മാനിക്കാൻ ആവുമെന്ന പ്രതീക്ഷയിലാണ്. അതേ സമയം അവസാന മത്സരത്തിൽ ഇന്ററിനോട് കീഴടങ്ങിയത്‌ അടക്കം നാല് മത്സരങ്ങളിൽ ജയം കാണാതെയാണ് റോമ യൂറോപ്പ സെമി മത്സരത്തിന് എത്തുന്നത്.

യുഫേഫ യൂറോപ്പ ലീഗിൽ സെമി ഫൈനലിലേക്ക് മുന്നേറി സാവി അലോൺസോയുടെ ബയേർ ലെവർകുസൻ. ആദ്യ പാദത്തിൽ ബെൽജിയം ക്ലബ് യൂണിയൻ എസ്.ജിയോട് സ്വന്തം മൈതാനത്ത് 1-1 നു സമനില വഴങ്ങിയ ജർമ്മൻ ക്ലബ് പക്ഷെ രണ്ടാം പാദത്തിൽ 4-1 ന്റെ ആധികാരിക ജയവും ആയി അവസാന നാലിലേക്ക് മുന്നേറുക ആയിരുന്നു. മത്സരം തുടങ്ങി 67 മത്തെ സെക്കന്റിൽ തന്നെ ഗോൾ നേടിയ മൂസ ദിയാബി ലെവർകുസനു സ്വപ്ന തുടക്കം ആണ് നൽകിയത്.

തുടർന്ന് 37 മത്തെ മിനിറ്റിൽ ആദം ഹൊസകിന്റെ പാസിൽ നിന്നു മിച്ചൽ ബക്കർ ജർമ്മൻ ക്ലബിന് രണ്ടാം ഗോൾ സമ്മാനിച്ചു. രണ്ടാം പകുതിയിൽ മിച്ചൽ ബക്കറിന്റെ പാസിൽ നിന്നു ജെറമി ഫിർപോങ് ഗോൾ നേടിയതോടെ ലെവർകുസൻ സെമി ഉറപ്പിച്ചു. എന്നാൽ നാലു മിനിറ്റിനുള്ളിൽ കാസ്പർ ട്രഹോ ഒരു ഗോൾ മടക്കിയത് ബെൽജിയം ക്ലബിന് പ്രതീക്ഷ നൽകി. എന്നാൽ 79 മത്തെ മിനിറ്റിൽ തന്റെ ഗോൾ നേടിയ ആദം ഹൊസക് ലെവർകുസൻ ജയം ഉറപ്പിക്കുക ആയിരുന്നു.