Tag: Sporting Lisbon

യുഫേഫ യൂറോപ്പ ലീഗ് സെമി ഫൈനലിലേക്ക് മുന്നേറി യുവന്റസ്. ആദ്യ പാദത്തിൽ എതിരില്ലാത്ത ഒരു ഗോളിന് ജയിച്ച അവർ രണ്ടാം പാദത്തിൽ പോർച്ചുഗലിൽ സ്പോർട്ടിങിനെ 1-1 നു സമനിലയിൽ തളക്കുക ആയിരുന്നു. സ്പോർട്ടിങ് ലിസ്ബണിന്റെ ആധിപത്യം കണ്ട മത്സരത്തിൽ പക്ഷെ ഇറ്റാലിയൻ ക്ലബ് ആണ് ആദ്യം മുന്നിൽ എത്തിയത്. ഒമ്പതാം മിനിറ്റിൽ കോർണറിൽ നിന്നു ലഭിച്ച അവസരത്തിൽ അലക്‌സ് സാൻഡ്രോയുടെ പാസിൽ നിന്നു റാബിയോറ്റ് യുവക്ക് ആയി ഗോൾ നേടി.

എന്നാൽ 20 മത്തെ മിനിറ്റിൽ റാബിയോറ്റ് പെനാൽട്ടി വഴങ്ങിയപ്പോൾ സ്പോർട്ടിങിന് മത്സരത്തിൽ തിരിച്ചു വരാൻ അവസരം ലഭിച്ചു. പെനാൽട്ടി അനായാസം ലക്ഷ്യം കണ്ട മാർകസ്‌ എഡ്വാർഡ്സ് പോർച്ചുഗീസ് ക്ലബിന് പ്രതീക്ഷ നൽകി. തുടർന്ന് സമനില ഗോളിന് ആയി അവർ പരിശ്രമിച്ചു എങ്കിലും യുവന്റസ് പ്രതിരോധം കീഴടങ്ങിയില്ല. മത്സരത്തിൽ 13 ഷോട്ടുകൾ ആണ് അവർ ഉതിർത്തത്. ജയത്തോടെ യൂറോപ്പ ലീഗ് സെമി ഫൈനൽ ഉറപ്പിച്ച യുവന്റസ് സെമിയിൽ സ്പാനിഷ് ക്ലബ് സെവിയ്യയെ നേരിടും.

യുഫേഫ യൂറോപ്പ ലീഗ് ആദ്യ പാദ ക്വാർട്ടർ ഫൈനലിൽ സ്വന്തം മൈതാനത്ത് സ്പോർട്ടിങ് ലിസ്ബണിനെ എതിരില്ലാത്ത ഒരു ഗോളിന് മറികടന്നു യുവന്റസ്. രണ്ടാം പകുതിയിൽ പ്രതിരോധതാരം ഫെഡറികോ ഗട്ടിയുടെ ക്ലബിന് ആയുള്ള ആദ്യ ഗോൾ ആണ് ഇറ്റാലിയൻ വമ്പന്മാർക്ക് ജയം നൽകിയത്. ആദ്യ പകുതിയിൽ ഇരു ഗോൾ കീപ്പർമാരുടെയും മികവ് ആണ് മത്സരത്തിൽ ഗോൾ പിറക്കുന്നത് തടഞ്ഞത്. ആദ്യ പകുതി അവസാനിക്കാൻ നിമിഷങ്ങൾക്ക് മുമ്പ് നെഞ്ചു വേദന കാരണം യുവന്റസ് ഗോൾ കീപ്പർ വോയ്‌സിനിക് ചെസ്നി കളം വിട്ടത് സങ്കട കാഴ്ചയായി.

മത്സരത്തിൽ ഇടക്ക് ഡി മരിയ സ്പോർട്ടിങ് പ്രതിരോധം പരീക്ഷിച്ചപ്പോൾ പോർച്ചുഗീസ് ടീം ആണ് കൂടുതൽ അപകടകാരികൾ ആയത്. 73 മത്തെ മിനിറ്റിൽ ഡി മരിയയും വ്ലാഹോവിചും ചേർന്നു ഒരുക്കിയ അവസരത്തിനു ഒടുവിൽ റീബോണ്ട് ഗോൾ ആക്കി മാറ്റിയ ഗട്ടി യുവന്റസിന് ജയം സമ്മാനിക്കുക ആയിരുന്നു. സമനിലക്ക് ആയുള്ള സ്പോർട്ടിങ് ശ്രമങ്ങൾ മികച്ച രക്ഷപ്പെടുത്തലുകൾ നടത്തിയ പകരക്കാരൻ ഗോൾ കീപ്പർ മാറ്റിയ പെരിൻ തടയുക ആയിരുന്നു. ആഴ്‌സണലിനെ വീഴ്ത്തി ക്വാർട്ടർ ഫൈനലിൽ എത്തിയ സ്പോർട്ടിങ് പോർച്ചുഗലിൽ വലിയ വെല്ലുവിളി ആവും യുവന്റസിന് നൽകുക എന്നുറപ്പാണ്.

ആഴ്സണൽ യൂറോപ്പ ലീഗ പ്രീക്വാർട്ടറിൽ വീണു. ഇന്ന് നടന്ന രണ്ടാം പാദ പ്രീക്വാർട്ടറിൽ പെനാൾട്ടി ഷൂട്ടൗട്ടിൽ പരാജയപ്പെട്ടാണ് ആഴ്സണൽ പുറത്തായത്. നിശ്ചിത സമയത്ത് കളി 1-1 എന്നായിരുന്നു. അഗ്രിഗേറ്റിൽ 3-3 എന്നും. തുടർന്ന് പെനാൾട്ടി ഷൂട്ടൗട്ടിൽ 5-3നാണ് സ്പോർടിങ് ജയിച്ചത്.

ഇന്ന് സാകയെയും തോമസ് പാർട്ടിയെയും ബെഞ്ചിൽ ഇരുത്തി ആണ് ആഴ്സണൽ മത്സരം ആരംഭിച്ചത്. ആദ്യ പകുതി അർട്ടേറ്റ പ്രതീക്ഷിച്ചത് പോലെ തന്നെ പോയി. 19ആം മിനുട്ടിൽ ജോർജീഞ്ഞോ നൽകിയ ഒരു പാസ് സ്വീകരിച്ച് പെനാൾട്ടി ബോക്സിലേക്ക് കടന്ന മാർട്ടിനെല്ലി തൊടുത്ത ഷോട്ട് അന്റോണിയോ അദാൻ തടഞ്ഞു. പിറകെ എത്തിയ ജാക്ക ഒരു റീബൗണ്ടിലൂടെ പന്ത് വലയിൽ എത്തിച്ചു. സ്കോർ 1-0. അഗ്രിഗേറ്റ് സ്കോറിൽ ആഴ്സണൽ 3-2നു മുന്നിൽ.

ആദ്യ പകുതിയിലെ ആവേശം രണ്ടാം പകുതിയുടെ തുടക്കത്തിൽ ആഴ്സണൽ കാണിച്ചില്ല. 62ആം മിനുട്ടിൽ പെഡ്രോ ഗോൺസാല്വസിന്റെ ഒരു അത്ഭുത ഗോൾ സ്പോർടിംഗിനെ കളിയിലേക്ക് തിരികെ കൊണ്ടു വന്നു. മൈതാന മധ്യത്തു നിന്നു ഗോൺസാലസ് തൊടുത്ത ഷോട്ട് തടയാൻ റാംസ്ഡേലിനായില്ല. ഈ സീസൺ യൂറോപ്പ ലീഗ് കണ്ട ഏറ്റവും മികച്ച ഗോളായിരുന്നു‌ ഇത്‌. സ്കോർ 1-1. അഗ്രിഗേറ്റിൽ 3-3.

ഇതിനു ശേഷം ആഴ്സണൽ പാർട്ടിയെയും സാകയെയും കളത്തിൽ ഇറക്കി. ഇരു ടീമുകൾക്കും വിജയ ഗോൾ നേടാൻ ഉള്ള അവസരങ്ങൾ വന്നു എങ്കിലും മുതലെടുക്കാൻ ആയില്ല. നിശ്ചിത സമയത്ത് വിജയ ഗോൾ വരാതെ ആയതോടെ കളി എക്സ്ട്രാ ടൈമിലേക്ക് നീണ്ടു.

97ആം മിനുട്ടിൽ ഒരു സ്പോടിംഗ് അബദ്ധത്തിൽ നിന്ന് ഒരു സുവർണ്ണാവസരം ആഴ്സണലിനു ലഭിച്ചു. പക്ഷെ ട്രൊസാർഡിന്റെ ഷോട്ട് തടയാൻ അദാനായി‌. അവസാനം 120 മിനുട്ട് കഴിഞ്ഞപ്പോഴും ഒപ്പത്തിനൊപ്പം. പെനാൾട്ടി ഷൂട്ടൗട്ടിൽ സ്പോർടിങ് 5 കിക്കും ലക്ഷ്യത്തിൽ എത്തിച്ചു. മാർട്ടിനെല്ലിക്ക് ആണ് ആഴ്സണൽ കൂട്ടത്തിൽ പിഴച്ചത്‌. പിന്നാലെ പോർച്ചുഗീസ് ടീം വിജയം ഉറപ്പിച്ചു.