ജർമ്മൻ മത്സരത്തിന് മെസ്യുട് ഓസിലിന്റെ ചിത്രവും ആയി എത്തി കാണികൾ

ജർമ്മനിയുടെ പ്രതിഷേധത്തിന് മറുപടിയായി മുൻ ജർമ്മൻ താരം മെസ്യുട് ഓസിലിന്റെ ചിത്രവും ആയി എത്തി ഖത്തർ കാണികളുടെ പ്രതിഷേധം. മനുഷ്യാവകാശ പ്രശ്നങ്ങൾ ഉയർത്തി വൺ ലവ് ആം ബാന്റ് അണിയാൻ അനുവദിക്കാത്തത് അടക്കം ചൂണ്ടിക്കാട്ടി കഴിഞ്ഞ മത്സരത്തിൽ വാ പൊത്തി ജർമ്മൻ ടീം പ്രതിഷേധം നടത്തിയതിന് മറുപടി ആയാണ് ആതിഥേയരുടെ ഇന്നത്തെ മറുപടി.

ഇന്നത്തെ സ്‌പെയിൻ ജർമ്മനി മത്സരത്തിൽ കാണികൾ ഓസിലിന്റെ ചിത്രം ഉയർത്തി വാ പൊത്തി ജർമ്മൻ താരങ്ങൾക്ക് മറുപടി നൽകുക ആയിരുന്നു. 2018 ലോകകപ്പിലെ പരാജയത്തിന് ശേഷം വിരമിച്ച സമയത്ത് തനിക്ക് നേരെ വലിയ വംശീയ അധിക്ഷേപങ്ങൾ ഉണ്ടായി എന്നു ഓസിൽ ആരോപണം ഉന്നയിച്ചിരുന്നു. അന്ന് ജർമ്മൻ സഹതാരങ്ങൾ ആരും ഓസിലിന് പിന്തുണയും ആയി എത്തിയില്ല എന്നതും അന്ന് അവർ മൗനം പാലിച്ചു എന്നതും ഓർമ്മിപ്പിക്കാൻ ആണ് ഓസിലിന്റെ ചിത്രം ആതിഥേയ കാണികൾ ഉപയോഗിച്ചത്.