വീണ്ടും കസറി ഷഫാലി, മികവ് പുലര്‍ത്താനാകാതെ ബാക്കി താരങ്ങള്‍ക്ക്, ഇന്ത്യയ്ക്ക് 133 റണ്‍സ്

- Advertisement -

ന്യൂസിലാണ്ടിനെതിരെ വനിത ലോക ടി20യില്‍ ഇന്ത്യയ്ക്ക് 133/8 എന്ന സ്കോര്‍. ഇന്ന് നടന്ന ഇന്ത്യയുടെ മൂന്നാം മത്സരത്തില്‍ ഷഫാലി വര്‍മ്മ ടോപ് ഓര്‍ഡറില്‍ നല്‍കിയ മിന്നും തുടക്കത്തിന് ശേഷം ഇന്ത്യയ്ക്ക് വലിയ സ്കോറെന്ന പ്രതീക്ഷയ്ക്കൊത്തുയരാന്‍ കഴിയാതെ പോകുകയായിരുന്നു. 34 പന്തില്‍ നിന്ന് 46 റണ്‍സ് നേടിയ ഷഫാലി മൂന്ന് സിക്സും നാല് ഫോറും നേടിയപ്പോള്‍ ടീമിന്റെ രണ്ടാമത്തെ ടോപ് സ്കോറര്‍ 23 റണ്‍സ് നേടിയ താനിയ ഭാട്ടിയ ആയിരുന്നു.

9 ഓവറില്‍ ഒരു വിക്കറ്റ് നഷ്ടത്തില്‍ 68 റണ്‍സ് നേടിയ ടീം പിന്നെ തുടരെ വിക്കറ്റുകള്‍ വീണപ്പോള്‍ 111/7 എന്ന നിലയില്‍ ആവുകയായിരുന്നു. ഷഫാലി പുറത്താകുമ്പോള്‍ ഇന്ത്യ 13.5 ഓവറില്‍ 95/5 എന്ന നിലയിലായിരുന്നു. അവസാന ഓവറുകളില്‍ എട്ടാം വിക്കറ്റ് കൂട്ടുകെട്ട് നേടിയ 22 റണ്‍സ് കൂട്ടുകെട്ടാണ് ഇന്ത്യയുടെ സ്കോര്‍ 133 റണ്‍സിലേക്ക് എത്തിച്ചത്.

ന്യൂസിലാണ്ടിനായി റോസ് മേരി മെയ്ര്‍, അമേലിയ കെര്‍ എന്നിവര്‍ രണ്ട് വീതം വിക്കറ്റ് നേടി.

Advertisement