കുമമോട്ടോ മാസ്റ്റേഴ്സ് ബാഡ്മിന്റൺ ഫൈനലിലെത്തുന്ന ആദ്യ ഇന്ത്യൻ താരമായി ലക്ഷ്യ സെൻ ചരിത്രം കുറിച്ചു

ജപ്പാനിൽ നടക്കുന്ന ബിഡബ്ല്യുഎഫ് സൂപ്പർ 500 ടൂർണമെന്റായ കുമമോട്ടോ മാസ്റ്റേഴ്സ് ബാഡ്മിന്റണിന്റെ ഫൈനലിൽ പ്രവേശിക്കുന്ന ആദ്യ ഇന്ത്യൻ താരമെന്ന ചരിത്ര നേട്ടം സ്വന്തമാക്കി ലക്ഷ്യ സെൻ.

ആവേശകരമായ സെമി ഫൈനൽ പോരാട്ടത്തിൽ ഇന്തോനേഷ്യയുടെ യുവതാരം അൽവി ഫർഹാനെ 3 ഗെയിം നീണ്ട പോരാട്ടത്തിൽ പരാജയപ്പെടുത്തിയാണ് ലക്ഷ്യ കിരീടപ്പോരാട്ടത്തിന് യോഗ്യത നേടിയത്.ആദ്യ ഗെയിം 21-12 എന്ന സ്കോറിന് അനായാസം സ്വന്തമാക്കിയ ലക്ഷ്യ സെന്നിനെതിരെ രണ്ടാം ഗെയിമിൽ 15-21ന് അൽവി ഫർഹാൻ ശക്തമായി തിരിച്ചടിച്ചു. എന്നാൽ നിർണ്ണായകമായ മൂന്നാം ഗെയിമിൽ സമ്പൂർണ്ണ ആധിപത്യം പുലർത്തിയ ഇന്ത്യൻ താരം 21-11 എന്ന സ്കോറിന് മത്സരം സ്വന്തമാക്കുകയായിരുന്നു.

ഓൾ ഇംഗ്ലണ്ട് ഓപ്പൺ, ഹൈലോ ഓപ്പൺ എന്നിവയ്ക്ക് ശേഷം ഈ വർഷം ലക്ഷ്യ സെൻ കളിക്കുന്ന മൂന്നാമത്തെ ബിഡബ്ല്യുഎഫ് വേൾഡ് ടൂർ ഫൈനലാണിത്.ഈ തകർപ്പൻ വിജയത്തോടെ സീസൺ അവസാനിക്കുന്ന ബിഡബ്ല്യുഎഫ് വേൾഡ് ടൂർ ഫൈനൽസിന് യോഗ്യത നേടാനുള്ള സാധ്യതകളും ലക്ഷ്യ സെൻ സജീവമാക്കി നിലനിർത്തി.

നാളെ നടക്കുന്ന കലാശപ്പോരാട്ടത്തിൽ തായ്‌ലൻഡിന്റെ ലോക ചാമ്പ്യൻ കുൻലവുത് വിറ്റിഡ്സാർൺ, ജപ്പാന്റെ കോക്കി വതനാബെ എന്നിവർ തമ്മിലുള്ള രണ്ടാം സെമി ഫൈനൽ വിജയിയെയാണ് ലക്ഷ്യ സെൻ നേരിടുക.