Indian Premier LeagueFeatured

ഒരു യുഗത്തിന് തിരശ്ശീല; എം.എസ്. ധോണി ഐപിഎല്ലിൽ നിന്ന് ഔദ്യോഗികമായി വിരമിച്ചു, ചെന്നൈ സൂപ്പർ കിംഗ്സിന്റെ പുതിയ മെന്ററായി ചുമതലയേൽക്കും

Dhoni

ഇന്ത്യൻ പ്രീമിയർ ലീഗിലെ ഇതിഹാസ നായകൻ മഹേന്ദ്ര സിംഗ് ധോണി കളിക്കാരനെന്ന നിലയിൽ ഔദ്യോഗികമായി വിരമിക്കൽ പ്രഖ്യാപിച്ചു. ഐപിഎൽ 2027 താരലേലത്തിന് മുന്നോടിയായുള്ള നിലനിർത്തൽ പട്ടിക പുറത്തുവിടുന്നതിനിടെയാണ് ചെന്നൈ സൂപ്പർ കിംഗ്സ് ഈ സുപ്രധാന പ്രഖ്യാപനം നടത്തിയത്. കളിക്കളത്തിൽ നിന്ന് പടിയിറങ്ങുന്ന ധോണി വരാനിരിക്കുന്ന സീസണിൽ ചെന്നൈ സൂപ്പർ കിംഗ്സിന്റെ മെന്ററായി പുതിയ റോളിൽ ടീമിനൊപ്പം തുടരും.

ഐപിഎൽ ചരിത്രത്തിൽ 278 മത്സരങ്ങളിൽ നിന്ന് 38.30 ശരാശരിയിലും 137.45 സ്ട്രൈക്ക് റേറ്റിലും 5,439 റൺസാണ് ധോണി അടിച്ചുകൂട്ടിയത്. ഇതിൽ 24 അർദ്ധസെഞ്ച്വറികളും ഉൾപ്പെടുന്നു. തന്റെ തന്ത്രപരമായ നായകത്വത്തിലൂടെ ചെന്നൈ സൂപ്പർ കിംഗ്സിനെ 5 തവണ ഐപിഎൽ കിരീടത്തിലേക്ക് നയിക്കാൻ 45-കാരനായ താരത്തിന് സാധിച്ചു. കഴിഞ്ഞ സീസണിൽ പരിക്കുമൂലം ഒരു മത്സരം പോലും കളിക്കാൻ സാധിക്കാതിരുന്ന ധോണി, പുതിയ സീസണിൽ ഡഗ്ഔട്ടിൽ നിന്ന് ടീമിന് തന്ത്രങ്ങൾ ഓതിക്കൊടുക്കും.

ധോണിയില്ലാതെ ചെന്നൈ സൂപ്പർ കിംഗ്സ് ഇല്ലെന്നും കഴിഞ്ഞ രണ്ട് പതിറ്റാണ്ടായി ടീമിന്റെ വളർച്ചയിൽ അദ്ദേഹം നിർണ്ണായക പങ്കുവഹിച്ചെന്നും ചെന്നൈ ഉടമ എൻ. ശ്രീനിവാസൻ പ്രതികരിച്ചു. പുതിയ പരിശീലകൻ സഹീർ ഖാനും നായകൻ ഋതുരാജ് ഗെയ്‌ക്‌വാദിനുമൊപ്പം ധോണിയുടെ പരിചയസമ്പത്ത് കൂടി ചേരുന്നതോടെ ചെന്നൈ വീണ്ടും കിരീടത്തിലേക്ക് തിരിച്ചെത്തുമെന്ന പ്രതീക്ഷയിലാണ് ആരാധകർ.