വനിത പ്രീമിയര്‍ ലീഗിലെ ആദ്യ സീസൺ കിരീടം സ്വന്തമാക്കി മുംബൈ ഇന്ത്യന്‍സ്. 19.3 ഓവറിൽ 3 വിക്കറ്റ് നഷ്ടത്തിലാണ് മുംബൈ വിജയം കുറിച്ച് കിരീടം സ്വന്തമാക്കിയത്.
ഇന്ന് ആദ്യം ബാറ്റ് ചെയ്ത ഡൽഹിയെ 79/9 എന്ന നിലയിൽ എറിഞ്ഞ് പിടിച്ച ശേഷം അവസാന ഓവറുകളിൽ ഡൽഹിയ്ക്ക് തിരിച്ചുവരുവാന്‍ മുംബൈ അവസരം നൽകിയപ്പോള്‍ ഡൽഹി 131/9 എന്ന സ്കോറാണ് നേടിയത്.
ചേസിംഗിനിറങ്ങിയ മുംബൈയ്ക്ക് 23 റൺസ് നേടുന്നതിനിടെ ഓപ്പണര്‍മാരെ നഷ്ടമായെങ്കിലും നത്താലി സ്കിവ‍ർ – ഹര്‍മ്മന്‍പ്രീത് കൗര്‍ കൂട്ടുകെട്ട് 72 റൺസ് കൂട്ടിചേര്‍ത്ത് മുംബൈയെ മുന്നോട്ട് നയിക്കുകയായിരുന്നു. 37 റൺസ് നേടിയ കൗര്‍ പുറത്തായെങ്കിലും പതറാതെ ബാറ്റ് വീശിയ നത്താലിയ്ക്ക് പിന്തുണയായി മെലി കെറും നിര്‍ണ്ണായക റൺസ് നേടിയപ്പോള്‍ മുംബൈയ്ക്ക് ജയത്തിനായി അവസാന ഓവറിൽ 5 റൺസെന്ന നിലയിലേക്ക് കാര്യങ്ങള്‍ മാറി.
മൂന്ന് പന്ത് അവശേഷിക്കെ ബൗണ്ടറി നേടി നത്താലി മുംബൈയ്ക്ക് കിരിടീം നേടിക്കൊടുത്തപ്പോള്‍ താരം 60 റൺസുമായി പുറത്താകാതെ നിന്നു. മെലി കെര്‍ 14 റൺസ് നേടി. നിര്‍ണ്ണായകമായ 39 റൺസാണ് ഈ കൂട്ടുകെട്ട് 4ാം വിക്കറ്റിൽ നേടിയത്.
